Mensahe iti Visiting Teaching, Nobiembre 2016
Ti Naan-anay a Dalan nga Agturong iti Kinaragsak
Ni Presidente Thomas S. Monson
Paneknekak ti naindaklan a sagut a plano ti Amatayo para kadatayo. Daytoy ti maysa a naan-anay a dalan nga agturong iti talna ken kinaragsak.
Ay-ayatek a kakabsatko, agpada a ditoy iti Conference Center ken iti sangalubongan, agyamanak iti gundaway a mangipeksa kadagiti kapanunotak itoy a bigat.
Limapulo-ket-dua a tawen ti napalabas, idi Hulio 1964, adda naituding nga aramidek iti New York City iti panawen a pannakaangay ti World’s Fair sadiay. Iti maysa a nasapa a bigat, binisitak ti Mormon Pavilion iti dayta nga eksibit. Nakasangpetak sakbay laeng ti pannakaipabuya ti film ti Simbaan Man’s Search for Happiness, maysa a pannakayakem ti plano ti pannakaisalakan a manipud idin nagbalinen ti film a maysa a nalatak iti Simbaan. Nagtugawak iti abay ti maysa nga agtutubo a lalaki a nalabit 35 ti tawenna. Nabiit ti panagsaritami. Saan a miembro ti Simbaantayo. Naglidem dagiti silaw, ken nagrugi a naipabuya ti film.
Dimngegkami iti timek ti narrator bayat ti panagdamagna kadagiti napnuan kaipapanan ken sapasap a saludsod: Sadino ti naggapuak? Apay nga addaak ditoy? Sadino ti papanak no pumanawak ditoy a biag? Sigagagar a dimngeg ti amin kadagiti saludsod, nakaitalimudok dagiti matada kadagiti ladawan iti screen. Naited ti pannakailadawan ti biag sakbay daytoy a biag, a kagiddan ti pannakailawlawag ti panggeptayo iti daga. Nasaksianmi ti makasagid-rikna a pannakailadawan ti ipupusay manipud ditoy a biag ti maysa a lakay a lelong ken ti nadayag a pannakitiponna kadagiti patpatgenna nga immun-una kenkuana a pimmusay a napan iti lubong dagiti espiritu.
Iti panaggibus daytoy napintas a pannakayakem ti plano ti Nailangitan nga Ama para kadatayo, siuulimek a pimmanaw dagiti tao, adu ti nasagid babaen ti mensahe ti film. Saan a timmakder ti sangaili a kaabayko. Dinamagko no nagustuanna ti pabuya. Ti napigsa a sugbatna: “Daytoy ti kinapudno!”
Ti plano ti Amatayo para iti ragsaktayo ken pannakaisalakantayo ket ibingbinglay dagiti misionario iti sangalubongan. Saan nga awaten wenno arakupen daytoy ti amin a dumngeg iti daytoy a nadiosan a mensahe. Nupay kasta, dagiti lallaki ken babbai iti amin a lugar, kas iti agtutubo a gayyemko iti New York World’s Fair, ket nabigbigda ti kinapudno daytoy, ket sititibker a pinilida a suroten ti dalan a mangitunda kadakuada nga agawid a sitatalged. Agnanayon a nagbalbaliw dagiti biagda.
Ti kasapulan iti plano ket ti Mangisalakantayo a ni Jesucristo. No awan koma ti pangbayad-basol a sakripisiona, mapukaw ti amin. Nupay kasta, saan nga umdas, no basta mamatitayo laeng Kenkuana ken iti mision. Nasken nga agbannog ken agsursurotayo, agsukisok ken agkararagtayo, agbabawi ken agsingsingpettayo. Nasken nga ammuentayo dagiti linteg ti Dios ket agtungpaltayo kadagitoy. Nasken nga umawattayo kadagiti pangisalakan nga ordinansa. Iti laeng panangaramid iti daytoy a pakagun-odantayo iti pudno, agnanayon a ragsak.
Nagasattayo a maaddaan iti kinapudno. Addaantayo iti pagrebbengan a mangibinglay iti kinapudno. Agbiagtayo koma iti kinapudno, tapno magun-odtayo ti amin nga adda iti Ama a para kadatayo. Amin nga aramidenna ket agpaay a pagsayaatantayo. Imbagana kadatayo, “Daytoy ti aramidko ken gloriak—ti mangipatungpal iti saan nga ipapatay ken ti agnanayon a biag ti tao.”1
Manipud iti kaunggan ti kararuak ken iti amin a sangkataw-an, paneknekak ti naindaklan a sagut a plano ti Amatayo para kadatayo. Maysa daytoy a naan-anay a dalan nga agturong iti talna ken kinaragsak ditoy ken iti umay a lubong.
Kakabsatko, ibatik kadakayo ti ayatko ken pammendisionko bayat ti panangigibusko, ket sapay koma ta kasta iti nagan ti Mangisalakan ken Mannubbottayo, kas ken Jesucristo, amen.
© 2016 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/16. Pannakaanamongna a maipatarus: 6/16. Pannakaipatarus ti Visiting Teaching Message, November 2016. Ilokano. 12871 864