Ennaan eo an Būreejtōnji eo Kein Kajuon, Nobōm̧ba 2016
Kam̧oolol kōn Raan in Jabōt
Jān Būreejtōn Henry B. Eyring
Rikakpilōklōk eo Kein Kajuon ilo Būreejtōnji eo Kein Kajuon
N̄an Armej ro Rekwojarjar ilo Raan-ko Āliktata, Jabōt ej juon raan in kam̧m̧oolol im iakwe.
Ro jeiū im jatū rejitōn bōro ro rej jepelōklōk ipeļaakin laļ in ilo Kabun̄ eo an Jisōs Kraist im Armej ro Rekwojarjar ilo Raan-ko Āliktata, ij kam̧m̧oolol bwe Būreejtōn Thomas S. Monson ekar kajjitōk ippa bwe in kōnono ilo kweilo̧k in ilo raan in jabōt in. Ij jar bwe Jetōb Kwojarjar eo enaaj ūn̄ūr būruwōmi kōn ennaan in aō.
Rainin, ikōņaan kōnono kōn en̄jake ko ilo bōro. Juon men eo inaaj kōnnaan kake rainin ej kam̧m̧oolol—eļaptata kōn raan in Jabōt.
Jej kam̧m̧oolol kōn men otemjej: jouj jān juon ruwamājet, m̧ōn̄ā n̄e jej ioon kwōle, bōro̧waj n̄e ej itok ļan̄ ko, jako būlo̧k in dii, im ājjimourur in ainikien nin̄nin̄ ko rej kab ļotaktok. Elōn̄ iaad renaaj keememej kam̧m̧oolol ilo iien rot kein.
N̄an Armej ro Rekwojarjar ilo Raan-ko Āliktata, Jabōt ej juon iien, juon raan, in kam̧m̧oolol im iakwe. Irooj ekar kakkōļ Armej ro Rekwojarjar ilo Jackson County, Missouri, ilo 1831 bwe jar ko aer im aer kam̧m̧oolol ren kajju n̄an Anij. Armej ro Rekwojarjar etto rekar bōk revelesōn kōn wāween kōjparok raan in Jabōt im wāween jitlo̧k im jar.1
Er, im kōj, Irooj ekar ba n̄an kōj wāween ad kabun̄ jar im leļo̧k kam̧m̧oolol ilo Jabōt. Āinwōt am̧ jeļā, ta eo eaorōktata ej iakwe eo jej en̄jake n̄an ro rej letok mennin letok ko. Erkein rej naan ko an Irooj kōn wāween leļo̧k kam̧m̧oolol im waween iakwe ilo Jabōt:
“Ij leļo̧k n̄an er juon kien, im ba āindein: Kwōn iakwe Irooj am Anij kōn aolepān būruōm̧, kōn aolepān am maron̄, ļōmņak, im kajoor; im ilo etan Jisōs Kraist kwōn jerbal n̄an E. …
“Bwe jej aikuj kam̧m̧oolol Irooj ad Anij ilo men otemjej.
“Kwōn katok juon katok n̄an Irooj am Anij ilo jejjet, em̧ool eo ej bōro eo erub im jetōb eo ettā.”2
Innām Irooj ej wōnm̧aanļo̧k wōt im kakkōl kōn likjab n̄an iakwe im kam̧m̧oolol Jemedwōj Ilan̄ im Jisōs Kraist āinwōt juon riletok mennin letok ko: “Im ilo ejjeļo̧k men armej ej kainepataik Anij, ak ņae ejjeļo̧k An illu ej urur, ijello̧kun wōt ro rej jab kile Pein ilo men ko otemjeļo̧k, im jab pokake kien ko An.”3
Elōn̄ iaad rej ron̄jake kadede im m̧ōņōņō kōn Jabōt āinwōt juon raan n̄an kakeememej im leļo̧k kam̧m̧oolol n̄an Anij kōn kōjeraam̧m̧an ko. Kom̧wij keememej ke al in ebun̄bun̄:
N̄e kwoj ion buktak ko an metwan Mour.
N̄e jako kōjatdikdik im Kwoj ebwer,
Bwini menin joij n̄ōn Yuk kajo iair,
Inem kwo naj bwilon̄ kin an Yokwe Yuk.
Bwini menin joij;
Kajo iair.
Bwini menin joij;
Im lo bwe ej Yokwe Yuk. …
Ebolikim ke kin men ko rej joon Yuk?
Eddo ke drebail eo ear kir Yuk n̄ōn e?
Bwini menin joij; berre naj jako,
Im kwo naj al im lan̄lōn̄ raan otemjej.4
Ij ello leta im rilotok jān Armej ro Rekwojarjar ilo Raan-ko Āliktata retiljek ro rej eddodo kōn men ko rej joon er. Jet repaake en̄jake in, ekkar n̄an er, aolep naaj jako. Ij kōjatdikdik im jar bwe ta eo ij ba kōn kam̧m̧oolol kōn raan in Jabōt enaaj lukkuun jipan̄ n̄an kōm̧m̧an bwe pere ren jako im al ko ren jino jan̄ ilo būruwōmi.
Kōjeraam̧m̧an eo kein kajuon eo komaron̄ kam̧m̧oolol kake ej bwe kwoj pād ilo kweilo̧k in kwojkwoj eo aolep iien, kuk ippān doon ippān elōn̄ ļo̧k jān juon ak ruo An rikaļoor ilo Et eo Etan. Elōn̄ jet ilo m̧ōko m̧weer rejjab maron̄ jerkak jān peet ko aer. Elōn̄ jet rekōņaan pād ijo kwoj pād ie ak kōnke rej jerbal ilo aujipitōļ ko ak jerbal ko jet n̄an kōjparok aenōm̧m̧an ak baare kōj jān kauwōtata in mour ko aer make ilo āne jam̧dān im jan̄kōļ. Kōn m̧ool in me komaron̄ kobaļo̧k ippān Armej ro jet Rekwojarjar im bōk m̧ōttan kwojkwoj eo enaaj jipan̄ kōj jino kam̧m̧oolol im iakwe kōn jouj an Anij.
Kōn Rikanaan Josep Smith im jepļaaktok eo an gospel, kōjeraam̧m̧an eo kein karuo ej bwe en wōr ad iien n̄an bōk kwojkwoj eo kajjojo wiik—kōpooje, kōjeraam̧m̧ane, im ajjeje jān rikarejaran Anij ro ewōr aer mālim. Jemaron̄ kam̧m̧oolol n̄e Jetōb Kwojarjar eo ej kam̧ool n̄an kōj bwe naan ko ilo jar in kwojkwoj eo, kar kōm̧m̧ane jān ro rikabwijer priesthood eo me emōj kōmālim er, rej mennin utiej ippān Jemedwōj Ilan̄.
Jān aolep kōjeraam̧m̧an kein jemaron̄ bwine, men eo eļaptata ej en̄jake in jeorļo̧k bōd eo ej itok ilo ad bōk m̧ōttan kwojkwoj eo. Jenaaj en̄jake iakwe eo eļapļo̧k im kam̧m̧oolol kōn Rilo̧mo̧o̧r eo, eo katok eo an eļap ekar kōm̧m̧ane bwe jen maron̄ erreo jān jerawiwi. Ilo ad bōk m̧ōttan pilawā im dān, jej keememej bwe Ekar en̄taan kōn kōj. Im n̄e jej en̄jake kam̧m̧oolol kōn ta eo ekar kōm̧m̧ane n̄an kōj, jenaaj en̄jake iakwe eo An n̄an kōj im ad iakwe n̄an E.
Kōjeraam̧m̧an in iakwe eo jej bōke enaaj kōm̧m̧ane bwe en pidodo ad kōjparok kien ko n̄an “keememej e iien otemjej.”5 Komaron̄ barāinwōt en̄jake iakwe im kam̧m̧oolol, āinwōt kar n̄a, kōn Jetōb Kwojarjar eo, eo Jemedwōj Ilan̄ ekar kallim̧ur bwe enaaj pād ippād iien otemjej n̄e jej tiljek wōt n̄an bujen ko jaar kōm̧m̧ani. Jemaron̄ bwini aolep kōjeraam̧m̧an kein aolep Jabōt im en̄jake kam̧m̧oolol.
Jabōt ej juon iien ejjejet n̄an kakeememej bujen eo jaar kōm̧m̧ane ke jaar peptaij n̄an iakwe im jerbal n̄an ajri ro nejin Jemedwōj Ilan̄. Kakūrm̧ool kallim̧ur eo emaron̄ kitbuuj bōk koņaam̧ ilo kūlaaj ko ak doulul ko kōn aolepān būruōm̧ bwe kwon kalōk tōmak im iakwe eo am̧ ilubwilijin m̧aan im kōrā ro jeim̧ im jatūm̧ ro rej pād ippād. Kallim̧ur in enaaj koba m̧ōņōņō in kakūrm̧ool eddo ko ad.
Ij kam̧m̧oolol kōn elōn̄ Jabōt ko ikar katakin juon doulul in tikōn ilo Bountiful, Utah, barāinwōt juon kūlaaj in Jabōt Jikuuļ ilo Idaho. Im ij bar keememej tōre eo iaar jerbal āinwōt juon rijipan̄ n̄an kōrā eo pāleeō ilo kūlaaj eo an nursery, ijo me kar lukkuun eddo eo aō ej elleļo̧k kein ikkure ko im aini.
Ekar eļļāļo̧k iiō ko m̧oktaļo̧k ke iaar kile kōn Jetōb bwe eddo jidikdik eo aō n̄an Irooj ekar lukkuun aorōk ilo mour an ajri ro nejin Jemedwōj Ilan̄. Ikar bwilōn̄, jet iaer rekar keememej wōt ilo aolepān iiō ko in aō jerbal ippāer men̄e ikar jab lukkuun jeļā ak ikar kajjieon̄ n̄an jerbal n̄an Maajta eo ilo raan in Jabōt ko.
Āinwōt kōj jet iien jejjab maron̄ lo tōprak in jerbal ko ad ilo Jabōt, jemaron̄ jab lo tōprak ko an ro jet rikarejaren Irooj. Ak Irooj ej kalōk wōt aelōn̄ in kiin̄ eo An kōn ro rikarejaran retiljek im rettā, ilo an jidikin wōt ad lo wōnm̧aanļo̧k eo n̄an aiboojoj in itok eo an Kraist. Jetōb Kwojarjar wōt emaron̄ kōm̧m̧an bwe jen lo menin ekabwilōn̄lōn̄.
Ikar rūttoļo̧k ilo aō etal n̄an kweilo̧k ko an kwojkwoj ilo branch eo ilo New Jersey ippān jejjo wōt membōr im juon baam̧le, baam̧le eo aō. Jiljilimjuonn̄oul ļalem iiō ko rem̧ootļo̧k, ikar peptaij ilo juon wōt kar mōnjar ilo Pennsylvania im New Jersey. Ijo me ewōr juon branch jidikdik ilo Princeton, New Jersey, ijeņ kiiō ewōr ruo ward ko reļļap ie. Im jejjo raan rem̧ootļo̧k, taujin rūm̧m̧an ded ro rekar ikkure ilo juon iien kam̧ōņōņōik aje eo an Philadelphia Pennsylvania Temple.
Ke ikar likao, kar kūr eō āinwōt juon district mijenede ijo kōm̧ kar kabun̄jar ie ilo mōnjar eo ej make wōt ilo Albuquerque, New Mexico. Rainin ewōr juon tampeļ im elōn̄ stake ko ie.
Ikar etal jān Albuquerque bwe in etal im jikuuļ ilo Cambridge, Massachusetts. Ekar wōr juon mōnjar im juon district eo ikōtaan Massachusetts im Rhode Islands. Ikar ettōr lōn̄ļo̧k ilo toļ ko ilo jikin eo aiboojoj bwe in pād ilo kweilo̧k in kwojkwoj eo ilo juon branch jidikdik, ilo juon jikin rej reen ie ak em̧ ko reddik rej kōkāāli. Kiiō ewōr juon tampeļ eo ekwojarjar im̧ōn Anij ilo Belmont, Massachusetts, im stake ko me rejepelōklōk ilo bukwōn en.
Ta eo ijjab maron̄ lo ilo tōre ko ej bwe Irooj ekar lutōkleplep Jetōb eo an ioon armej ro ilo iien kweilo̧k in kwojkwoj ko. Ikar en̄jake, ak ikar jab lo an eddōkļo̧k im iien eo ejjejet n̄an karōk eo an Irooj n̄an kalōk im kaiboojoj aelōn̄ in kiin̄ eo An. Juon rikanaan, kōn revelesōn, ekar lo im reko̧o̧te ta eo jemaron̄ kiiō loe. Nipai ekar ba bwe oran ro uwaan kabun̄ eo emaron̄ jab lukkuun ļap, ak em̧m̧an in jerbal ko ad rekabwilōn̄lōn̄:
“Im ālikin men kein, iaar lo kabun̄ eo an Lam an Anij, im oran ro ie eaar iiet. …
“Im ālkin men kein, n̄a, Nipai, iaar lo kajoor in Lam an Anij, bwe ekar bun̄ ioon ro rekwojarjar jān kabun̄ eo an Lam eo, im ioon armej in bujen ko an Irooj, ro raar ejjeplōklōk ioon aolepān mejān laļ; im raar pojak kōn jim̧we im kōn kajoor in Anij ilo aiboojoj eļap.”6
Ilo epepen in, ejja kōmeļeļe in kannan in wōt kōn jekjek ko im iien ko rem̧m̧an imaan rej pād ilo Katak im Bujen ko:
“Kom̧ij jan̄in kar meļeļe ewi jon̄an ļap in kōjeraam̧m̧an ko ippān Jemān ilo Pein make im kar kōpooji n̄an kom̧;
“Im kom̧ij jab maron̄ ineek aolep men otemjeļo̧k kiiō; mekarta, kom̧in m̧ōņōņō, bwe Inaaj tōlļo̧k kom̧. Aelōn̄ in kiin̄ eo ej ami im kōjeraam̧m̧an ko ie rej ami, im m̧weiie ko an indeeo rej ami.
“Im e eo ej bōk aolep men ko otemjeļo̧k kōn kam̧m̧oolol naaj kōm̧m̧an bwe en wōj; im men ko an laļ in renaaj kobaļo̧k n̄an e, em̧ool bukwi alen, aaet, eļapļo̧k.”7
Iaar en̄jake oktak in an ļapļo̧k kam̧m̧olool kōn kōjeraam̧m̧an ko im iakwe eo an Anij ej ļapļo̧k ilo aolepān Kabun̄ in. Ilo kalimjōkļo̧k emōkaj an waļo̧k ilubwiljin ro uwaan Kabun̄ in ilo iien ko im jikin ko ijoko eļap idajon̄jon̄e tōmak eo aer, ijoko rej akweļap n̄an Anij n̄an jipan̄ er mour m̧aanļo̧k.
Iien ko jej mour ilo ad ioon melejon̄ ko reppen āinwōt kar armej ro an Alma iumin tōl eo an Amulon eo enana, eo eaar likūt eļap eddo ioon aeraer ko rejjab kar maron̄ ineeki:
“Im ālikin men kein ainikien Irooj eaar itok n̄an er ilo en̄taan ko aer, im ba: Kom̧in kotak bōrami im kom̧in ineem̧m̧an, bwe I jeļā kōn bujen eo kom̧ ar kōm̧m̧ane n̄an Eō; im Inaaj bujen ippān armej ro Aō im kōtļo̧k er jān kōm̧akoko.
“Im Inaaj barāinwōt kōmeraik eddo ko kar likūt ioon aerami, bwe em̧ool kom̧ make kom̧in jab en̄jaki ioon ālkimi, em̧ool n̄e kom̧ij pād ilo kōm̧akoko; im men in Inaaj kōm̧m̧an bwe kom̧in maron̄ jutak āinwōt ri kam̧ool ro n̄an Eō tokālik, im bwe kom̧in maron̄ jeļā kōn m̧ool in bwe N̄a, Irooj Anij, ij loļo̧k armej ro Aō ilo en̄taan ko aer.
“Im kiiō ālikin men kein, eddo ko kar likūt ioon Alma im ro jein im jatin kar kōm̧m̧an bwe ren mera; aaet, Irooj Eaar kōkajoorļo̧k er bwe ren maron̄ kotak eddo ko aer ilo ejjeļo̧k pen, im raar ajeļo̧k er ilo itok-limo im kōn ineem̧m̧an n̄an aolep ankilaan Irooj.”8
Kwe im n̄a jej rikam̧ool bwe jabdewōt iien jej kōjparok kien ko an Irooj, eļaptata n̄e ej pen, Eaar ron̄jake jar in kam̧m̧oolol ko ad kōn ta eo Emōj an kōm̧m̧an n̄an kōj im an uwaak jar ko ad kōn kajoor n̄an niknik ilo tiljek. Im elōn̄ ļo̧k jān juon kōttan an kam̧ōņōņōik eok barāinwōt kōkajoor eok.
Kwomaron̄ bar bwilōn̄ kōn ta eo kwomaron̄ kōm̧m̧ane n̄an mour im kabun̄-jar ilo Raan in Jabōt in n̄an kwaļo̧k kam̧m̧oolol im n̄an kōkajoor kwe make im ro jet kōn mālejjon̄ ko rej pād im̧aam̧.
Komaron̄ jino kōn jar eo am̧ make ettiņo ak jar eo an baam̧le n̄an kam̧m̧oolol kōn aolepān ta eo Anij ekar kōm̧m̧ane n̄an kwe. Komaron̄ jar bwe kwōn jeļā ta eo Irooj ekōņaan bwe kwōn kōm̧m̧ane n̄an jerbal n̄an E im ro jet. Eļaptata komaron̄ jar bwe Jetōb Kwojarjar en jiron̄ eok kōn juon eo ej make iaan ak ej pād ilo aikuj, ro im Irooj ekōņaan bwe kwōn loļo̧k.
Ij kallim̧uri kom̧ bwe jar ko ami renaaj uwaak, im ilo ami jerbal ekkar n̄an uwaak in jar eo ami, kom̧ naaj lo lan̄lōn̄ ilo Jabōt im en̄jake m̧ōņōņō ilo būruwōm̧i.
Ij kam̧ool bwe Anij Jemād ejeļā im ej iakwe kom̧. Rilo̧mo̧o̧r, Irooj Jisōs Kraist, eo ekar pinmuur kōn jerawiwi ko ami kōn iakwe eo n̄an kom̧. Er, Jemān im Nejin, rejeļā etam̧ āinwōt Aer jeļā etan Rikanaan Josep Smith ke Rekar waļo̧k n̄an e. Ij kam̧ool bwe en̄in ej Kabun̄ eo an Jisōs Kraist im bwe Enaaj kautiej bujen ko kwoj kōm̧m̧ani im kōkkāāli ippān Anij. Piktokūm̧ enaaj oktak im erom āinwōt Rilo̧mo̧o̧r eo. Kwonaaj kajoorļo̧k ņae mālijjon̄ ko im ņae en̄jake ko kōn pere kōn m̧ool eo. Kwonaaj lo lan̄lōn̄ ilo raan in Jabōt. Ij kallim̧uri kom̧ ilo etan Irooj Jisōs Kraist, amen.
© 2016 jān Intellectual Reserve, Inc. Aolep jim̧we ko rej pād ippān. Jeje ilo USA. Kōmālim ilo kajin English: 6/16. Kōmālim an ukook: 6/16. Ukook eo an First Presidency Message, November 2016. Marshallese. 12871 874