Naan in Katak an Kōrā ro, Nobōm̧ba 2016
Iaļ Eo Ejim̧we n̄an Lem̧ōņōņō
Jān Būreejtōn Thomas S. Monson
Ij kam̧ool kōn menin letok eo eļap eo ej karōk eo an Jemed n̄an kōj. Ej juon iaan iaļ ko rejim̧we n̄an aenōm̧m̧an im mōņōņo̧.
Ro jeiū im jatū rejitōn bōro, jim̧or ijin ilo Conference Center in im ipeļaakin laļ in, ewi jon̄an aō kam̧m̧oolol kōn iien in em̧m̧an bwe imaron̄ kwaļo̧k ļōmņak ko aō ippem̧i jibbon̄ in.
Lemen̄oul ruo iiō ko rem̧ootļo̧k, ilo Juļae 1964, ikar bōk juon ijjitōn̄ ilo New York City ilo juon Iien Ekkatak an aolep laļ ekar kōm̧m̧an ijeņ. Juon jibbon̄ ikar etal n̄an ekkatak eo kōn Mormon Pavilion eo. Ikar itaakļo̧k m̧okta jān aer kwaļo̧k pija eo an Kabun̄ in Man’s Search for Happiness, juon pija kōn karōk in lo̧mo̧o̧r eo ekar erom juon pija ebun̄bun̄ ilo Kabun̄ in. Ikar jijet iturin juon likao eo bōlen ekar 35 iiō rūttoon. Kōm̧ro kar kōnono jidik. Ekar jab juon membōr in Kabun̄ in ad. Innām tōm̧a ko rekar marokļo̧k, innām pija eo ekar ijjino.
Kōm̧ kar ron̄jake ainikien eo ej kōm̧m̧ane pija eo ej kwaļo̧k kajjitōk ko rem̧m̧an im meļeļe n̄an aolep: Ij itok jān ia? Etke Ij pād ijin? Ij etal n̄an ia n̄e inej etal jān mour in? Aolep rekar kijerjer in ron̄ uwaak ko, im aolep rekar alooj kepaakļo̧k pija eo. Juon kōmeļeļe kōn mour eo m̧okta kar letok, ippān tok juon kōmeļeļe kōn unleplep in mour in ioon laļ in. Kōm̧ kar kam̧ool juon pija ekaburom̧ōjm̧ōj kōn jako eo an juon jim̧m̧a jān laļ in im aiboojoj in an bar koba ippān ro rej iakwe ro rekar wōnm̧aanļo̧k wōt ippān n̄an laļ eo an jetōb.
Ilo jem̧ļo̧kin pija in aiboojoj kōn karōk eo an Jemedwōj Ilan̄ n̄an kōj, jarlepju eo rekar diwōjļo̧k jān ruum̧ eo, elōn̄ rekar waļo̧k aer kar en̄jake jān ennaan eo an pija eo. Rilotok eo ej jijet iturū ekar jab jutak. Ikar kajjitōk ippān n̄e ekar em̧m̧an pija eo ippān. Ekar uwaak: “Menin em̧ool!”
Karōk eo an Jemed n̄an m̧ōņōņō eo ad im lo̧mo̧or eo ad ej waļo̧k jān mijenede ro ipeļaakin laļ in. Ejjab aolep armej ro rej ron̄jake ennaan in ekwojarjar rej bōke im kautiej e. Ijoke, em̧m̧aan ro im kōrā ro ijoko jabdewōt, āinwōt likao in m̧ōtta ilo Iien Ekkatak eo ilo New York, ekar kile m̧ool ko an, im rekar likūt neer ioon iaļ eo enaaj tōļļo̧k er n̄an kapijuknen eo. Mour ko aer rekar oktak n̄an indeeo.
Men eo eaorōk n̄an karōk in ej ad Rilo̧mo̧or, Jisōs Kraist. Eļan̄n̄e en kar jab katok in Pinmuur in An, aolep ren kar jako. Ejjab bwe, ijoke, baj tōmak ilo E im mijen eo An. Jej aikuj in jerbal im ekkatak, kappukōt im jar, ukweļo̧k im kōm̧anm̧anļo̧k kōj. Jej aikuj in jeļā kakien ko an Anij im mour kaki. Jej aikuj bōk kain̄i in lo̧mo̧o̧r ko An. Jen wōt ad kōm̧m̧an wāween in, jenaaj bōk m̧ōņōņō eo em̧ool.
Jej jeraam̧m̧an bwe ewōr ippād m̧ool eo. Ewōr ippād mālim n̄an kwaļo̧k m̧ool eo. Jen mour kōn m̧ool eo bwe jen maron̄ bōk aolep men ko Jemed ekar kōpooji n̄an kōj. Ejjeļo̧k juon men E ej kōm̧m̧ane ijjelo̧kin men eo ej n̄an jeraam̧m̧an eo ad. Ekar jiron̄ kōj, “En̄in ej jerbal eo Aō im aiboojoj eo Aō—n̄an kakūrm̧ool jab wabanban im mour indeeo an armej.”1
Jān m̧wilaļ ko an jetōb eo aō, im ilo aolep ettā, ij kam̧ool kōn menin letok eo eļap eo ej karōk eo an Jemed n̄an kōj. Ej juon iaļ ejim̧we n̄an aenōm̧m̧an im mōņōņo̧ jim̧or ijin im ilo laļ eo ej itok.
Ro jeiū im jatū, ij likūt aō iakwe ippem̧i im aō kōjeram̧m̧an āinwōt aō kōjem̧ļo̧ke, im ij kōm̧m̧an āindein ilo etan ad Rilo̧mo̧o̧r im Ripinmuur, aaet Jisōs Kraist, amen.
© 2016 jān Intellectual Reserve, Inc. Aolep jim̧we ko rej pād ippān. Jeje ilo USA. Kōmālim ilo kajin English: 6/16. Kōmālim an ukook: 6/16. Ukook eo an Visiting Teaching Message, November 2016. Marshallese. 12871 874