Klumech er a First Presidency, Ongetruich ma ta el buil 2016
Omereng el Saul er a Chedaol Sils
Mla er a President Henry B. Eyring
Kot el Counselor er a First Presidency
Sel denguu er a re Uriul-klebesei el Santo, e a Chedaol sils a sils er a omereng el saul me a beltikelreng.
Rodam me a rodos el liueklii a beluulechad el nga er a Ikelesia er a Jesus Kristo er a Uriul-klebesei el Santo. Ak meral ungil a renguk el President Thomas S. Monson a ullengit er ngak el me mengedecheduch er chelecha el Chedaol Sils. Ak meluluuch me a Chedaol Reng a ngmai a tekingek leko er a rengmiu.
Chelecha el sils e ng soak el mo mesaod a domelchesiu er a rengud. El se el bodomes er ngii er chelechang a omereng el saul—tokuni se el Chedaol sils.
Ng betok a doureng a saul el kirel: blekokouii el mla er a diak dodengelii el chad, kall sel de sengerenger, chedeuel a blid lomekdirt er kid sel le ngar ngii a ses el eolt, chelam el chiuis el mla mo mechubs, me a lengelel a dirk ke mlechell el tolechoi. Ng betok er kid a medengei el rengud a mlo mui er a saul er a ika ikid el taem.
Sel denguu er a re Uriul-klebesei el Santo, ea Chedaol Sils a sils er a omereng el saul me a beltikelreng. A Rubak a ulemeklatk er a re Santo er a Jackson County, Missiouri, er se er a 1831 el kmo a nglunguchir me a omereng el saul a di kirel bedul a babeluades. A re mle uchelir a re Santo a ngiluu ocholt el kmo temekerang a longull er a Chedaol sils e mekerang a lolsengerenger e loluluuch.1
Tir, me kid, a bla lolekoi er kid a Rubak el kmo ng mekerang sel dongull e doureng a saul sel Chedaol Sils. Me kau a sebechem el mesang, a kot el klou a ultutelel sel domelchesiu er ngii el mor ngkel milskid a ikal sengk. A ika kid a tekingel a Rubak el mesaod el kmo kede mekerang a doureng a saul e mekerang a doubeltikelreng sel Chedaol sils:
“Ng milskid a llechul, e dilu el kmo: Ng kired loubeltikelreng el mo er a Rubak el Dios er kid el oba rengud el rokir, rokui er kid, uldesued, ma klisiched; e okiu a ngklel a Jesus Kristo e kede mesiou er ngii. …
“Moureng a sulel a Rubak el Dios er a rokui el tekoi.
“E kired el melenget el mo er a Rubak el Dios er kid el nga er a llemalt, el oba klengariou el reng.”2
Me a, Rubak a melemolem el mocha omeklatk el kirel sel bolak doubeltikelreng e doureng a sulel a Chedam er a Babeluades me a Jesus Kristo el tir a uchul a ikal sengk: el dilu el kmo a “chad a diak el temelii a rengul a Dios, malechub e ng diak a ongesechii a cheldechudel reng er ngii, ng bai di tirkel diak lesa chimal er a rokui el tekoi, e diak lolengesenges a llechul.”3
Betok er kemiu lorrenges a mla mo oldeu a rengmiu er a Chedaol sils el sils el mo melbedebek e mereng a sulel a Dios el kirel a klengeltengat. Ke de meketeketang el mengitakl er tial dodengelii el chelitakl:
When upon life’s billows you are tempest-tossed,
When you are discouraged, thinking all is lost,
Count your many blessings; name them one by one,
And it will surprise you what the Lord has done.
Count Your Blessings;
Name them one by one.
Count Your Blessings;
See what God hath done. …
Are you ever burdened with a load of care?
Does the cross seem heavy you are called to bear?
Count your many blessings; ev’ry doubt will fly,
And you will be singing as the days go by.4
Ak ngmai a babilengir me a odngelir a re blak a rengrir el Uriul-klebesei el Santo el tir omelchesiu loltekau a meklou el berraod. A denguu er a rebebil, e te kmedu lomelchesiu, el dikeal sebechel a rokui el tekoi. A kuureng e meluluuch el kmo a ikal bo kulekoi el kirel a omereng el saul se le Chedaol sils a mo ngosukemiu el choroid a rraureng e mo omuchel el mengitakl er a rengmiu.
A ta er a klengeltengat el sebeched el oureng a saul el kirel sel de nga er a ongdibel er a chedaol belsoil el kldibel a tang malechub a reterung el oltirakl er Ngii el nga er a Ngklel. Te ngar ngii a re nga era rekeblirir el diak el sebechir el mekiis er a dukelir. Te ngar ngii a rebebil el sorir el ngar tial omngar ngii e ng di tir a oureor er a osbitar me a re mengkar er a beluu el bulis malechub e te soldau el mengkar er kau el sebechir el metemall el nga er a desert malechub a oreomel. Ng di sel kau el chad el sebechem el mo tmak lobengkel a le dil chimong el Santo e molai er a chedaol belsoil tia kid a di ta el tekoi el mousbech el mo oureng a saul me a beltikelreng er a klungiolel a rengul a Dios.
E le uchul a Prophet Joseph Smith me tial mla moluut el ebangkelio, e a ta er a klengeltengat el sebeched lomechur er ngii sel techelled el melai er a chedaol belsoil er a bek el sandei—el mla mekedmokl, mukngeltengat, e merous lokiu a re mla nguu a ngerachel el mesiungel a Dios. Ng sebeched el mo mui er a saul sel Chedaol Reng loterkeklii el merkid el kmo a ikal tekoi er a nglunguuch er a chedaol belsoil, el mildung lokiu a rengariou a rengrir loba priesthood, a bol keluolu a Demad ra Babeluades.
A ikel rokui el klengeltengat el sebeched el mechur, e sel kot el ngarbab er ngii a sel domelchesiu er ngii el reng er a klausubes el denguu sel dolai er a chedaol belsoil. Kede mo omelchesiu er a klou el beltikelreng me a omereng el saul el kirel Osobel, el Tngakireng er ngii a rullid el mo klikiid er a klengit. Sel dolai er a blauang me a ralm, e kede melbedebek er a ringel el blo er ngii el kired. E sel domelchesiu el mereng a sulel er a ikel Ngii a mla remuul el kired, e kede mo omelchesuar er a beltkil a rengul el merkid me a beltkil a rengud el mor Ngii.
Sel klengeltengat er a beltik el reng el denguu a mo rulii meng mo beot er kid loltirakl er a llach el mo “blechoel el melbedebek er ngii.”5 Ke dirrek el mo melchesuar er a beltikelreng me a omereng el saul, el uai Ngak, el mo er a Chedaol Reng, el Chedam er a Babeluades a mle yaksok el kmo ng blechoel lobengked sel durrekodel a telbiil el de riruul. Ng sebeched lomechur a ikal klengeltengat sel bek el Sandei e domelchesiu loureng a saul.
A Chedaol sils a kmal lungil taem el bo molbedebek a telbiil el kau a ngilai er a ometecholb el ngii a mo oubeltikelreng e mesiou er a rengelekel a Chedam er a Babeluades. A otutel tial telbiil a uldimukl a mo er a klass malechub a quorum el meral nga er a rengud el mo omekdubech a klaumerang me a beltikelreng er a delongeled kid me a rodam me a rodos er kid. Tia dirrek el uldimukl er ngii a kirel lungil a rengud el meruul a ngercheled er a ikelesia.
Ak mereng a saul er a ikel betok el Sandei el kulsisechakl er a quorum er a re deacon er a Bountiful, Utah, me a dirrek el Sandei Skuul er a Idaho. Ak lematk a ikel taem el ngerchelek a olngeseu er a bechik el nga er a nursery, a kuruul er ngii a melai a omotsia el merous e dirrek el mengedmokl.
Ng mlo betok el rak e ak mocha medengei lokiu Chedaol Reng el kmo tial beot el ngerchelek el mo er a Rubak a mla rengii a ultutelel er a klengar er a rengelekel a Chedam er a Babeluades. Ak mo mechas a renguk, le rebebil er tir a dirk ke medengei e oureng a sulek er sel kekerei el ngerchelek el melasem el mesiou el mo er tir leng Mastang a uchul er a ikel temel Chedaol sils.
Ng uaisei el diak de blechoel el mes a redechel a urered el doruul sel le Chedaol sils, ng dirrek el diak deues a betok el bla el ruul a rebebil er a mesiungel a Rubak. E ng di a Rubak a oldubech er a rengedel el mekekokil lokiu a re ngariou e blak a rengrir el mesiungel, el diak lousulecholt er ngii, el merael bedul sel klebekelel el ngarmedad er sel tal telael rak. Ngokiu a Chedaol Reng e kede mesang sel di merael mo klou el klebekelel.
Ak mlukeroul el nga er a ongdibel er a chedaol belsoil er a ikelesia er a New Jersey lobengterir a di mekesai el chedal a ikelesia me a chimol telungalek, er ngak. Okeuid me a eim el rak er a mla memong, e ak miltecholb er a Philadelphia el di mle chimol Ikelesia el sebechemam el mor ngii el nga er a Pennsylvania malechub a New Jersey. Me sel di mle imol kekerei el branch er a Princeton, New Jersey, a mla mor ngii a teblo el meklou el ward er ngii er chelechang. E kmal dirk sesel klebesei er a mla memong, ea betok el telael el ngeasek a uluusekool er a ungil klebesei ruchei er a oterkeklel a Templo er a Philadelpia Pennsylvania.
Se er ak kekerei el chad, e ak mlokedong el district missionary er a di mle chimo el ikelesia er a Albuquerque, New Mexico. Chelechal sils e ng ngar ngii a templo me a kleua el stakes.
Ak tilobed er a Albuquerque el mo er a skuul er a Cambridge, Massachusetts. Ng mlar ngii a chimol ikelesia me a district el nguu a klou er a Massachusetts me a Rhode Island. A kulmekall er a ikel bulk er tial klebokel el beluu el mo er a ongdibel er a chedaol belsoil el nga er a mekekerei el branch, el betok a nga er a lengiil el blai malechub a mekekerei el ruul el blai. Chelechang e ng ngar ngii a chedaol templo er a Dios e ra Belmont, Massachusetts, me a stake el nguu a rokir el ikrel a beluu.
Sel dimlak el bleketakl er a osengek er seikid el taem a sel Rubak a ulechubel er a Chedaol Reng el mo er a rechad el mla er a ikel mekekerei el ongdibel er a chedaol belsoil. Ng mle sebechek el melchesuar, e ng di dimlak kisang a klungel me a temel a Rubak er a moktek er ngii el meleketek e mengebkall er a rengedel. A profet, lokiu a ocholt, a milsang e lilechesii a ikel ngii a sebeched er chelechang el mes e omelchesiu. A Nephi a dilu el kmo a idised a diak el bol betok e ng di sel cherrengelel a llomes a meang osenged er ngii:
“Ma Nephi a milsang a ikelesia er a Ngelekel a Sib er a Dios, me a idisir a mle mekesai. …
“Ma Nephi a milsang a klisichel a Ngelekel a Sib er a Dios, el mle metengel er a resanto er a ikelesia er a Ngelekel a Sib, me a rolab a telbiil el chedal a Rubak, el tir a mle berriid er a beluulechad; te mle bliull er a llemalt me a klisichel a Dios el ngarbab el klebkall.”6
Chelechal taem, ea osisiu el ulaoch el mesaod e ra teletael me a techall el ngarmedad a llechukl el nga er a Doctirne and Covenants:
“A Rubak a dilu el kmo ng diak dungil medengei a meklou el klengeltengat el ngar chimal el blal kedmokl el kired;
“Me kid a diak el sebeched lotekau a rokui er chelechang; e ng di, ng kired el moungil a rengud, e le Ngii a mo omekrael er kid. Tial renged a klokled me a klengeltengat a me er kid, me a iltetel a diak a ulebengelel a klokled.
“Me ngkel ngmai a rokui el tekoi loba omereng el saul a mo mekebkall; ea ikel ngar tial beluulechad a mo medechel el mo er ngii, el nga er a dart, me a lmuut el betok, me bol ungil a rengum.7
Ak mla melchesuar er tial mla mor ngii el omereng el saul el di merael mo klou el kirel a klengeltengat me a beltikelreng el mo er a Dios er a ikal ikelesia. E ual mereched el merael el mo klou er a rechedal a Ikelesia el nga er a basio me a taem el ngar ngii a ringel er a klaumerang er tir, el mocha kirir lolengit er a Dios a ngesou el mo ngosuterir el di melemolem.
A taem el de kiei a bo debetik a meringel el ongarm el di uai tirkel chedal a Alma el mla er a cheungel a omekcharm el Amulon, el milsterir a klou el berraod el meringel er tir oltekau:
“Ma ngerel a Rubak a le rirengesii er a temel a ringel, el melekoi el kmong: Kirir el mai a bderir el merbab e mo klou a rengrir, e le Ngii a medengelii a telbiil el lobengterir; e Ngii a mo tibir lobengterir a rechedal el mo oltobed er tir er a kelebus.
“E Ngii a dirrek el mo ngosur a berraod el ngar ongelngelir, meng mo diak lomelchesiu le nga er a ulekir, me tia chelechal ngaer a kelebus; tia bolrelii el me te mo sioning er Ngii er uriul, te dirrek el meral mo medengei el kmo Ngii, el Rubak el Dios, a me er a loldingel er a rechedal sel le nga er a chelsel a ringel.
“Ma ikel berraod lultekau a Alma me a rodam er ngii a mlo kebekakl; oi, a Rubak a milisiich er tir meng mlo sebechir el beot er tir el chemol a berraod el ngar tir, me tultekau e ungil a rengrir loba kellou el reng er a ikel rokui el urungulel a Rubak.8
Kau me a Ngak a sioning er a ikel taem sel doltirakl a llechul a Rubak, tokuni sel sekum meng kmal mle meringel, Ngii a rirenges a nglunguched er a omereng el saul er a ikel blal kedmokl el kired e mla onger a nglunguched el melai a klisiich me a blak el reng el di melemolem. Ng betok el taem el blal rellau el moungil a rengum e dirrek el mesisiich.
Kom locha melchedech el kmo ngera ikel sebechemiu el meruul e komo kiei e mengull er tial Chedaol sils el ngii a mo cholchotel omereng el saul e mo melisiich er kau me a rebebil el kirel aikel ongarm el ngar medad el merael mei.
Ng sebechiu lomuchel er chelechal sils lultuil er a di nglunguchiu me a nglunguuch er a telungalek el mereng a sulel a Dios er a ikel rokui el bla el ruul el kiriu. Ng sebechiu el meluluuch el mo medengei el kmo ngera soal a Rubak obo moruul el mo mesiou er Ngii me a rebebil. E kmal sebechiu, el meluluuch me a Chedaol Reng bo louchais er kemiu er tirkel sabisi me a re mengebuul el Rubak a soal a bo mesterir.
Ng sebechek el yaksok el kau a mo nguu a nger er a nglunguchem, me sel bo mouedikel el oltirakl a ikal nger el bla mngai, e ke metik er a deureng er a Chedaol sils e a rengum a mo mui er a omereng el saul.
Ak kuuchais el kmo a Dios el Chedam a medengelkau e betik a rengul er kau. A Osobel, el Jesus Kristo, a mle tongetengii a klengar er ngii el kirel a kngtim lokiu a beltkil a rengul kirem. Tir, el Chedam me a Ngalek, a medengelii a ngklem el uai Tir el mle medengelii a ngklel a Profet Joseph Smith er se er a bo el dum er ngii. A kuchais el kmo tia ikid a Ikelesia er a Jesus Kristo e Ngii a mo mengull a ikel telbiil el kau a remuul e omekbeches lobengkel a Dios. A blekerdelem a mo mengodech el mo uaia Osobel. Ke mo mesisiich lotngakl ongetikaik me a rraureng el kirel a klemerang. Ke mo metik er a deureng er a klsel Chedaol sils. Aikang ak yaksok leko er kemiu el nga er a ngklel a Rubak el Jesus Kristo, amen.
© 2016 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/16. Kengei er a oidel: 6/16. Oidel a First Presidency Message, November 2016. Palauan. 12871 881