Iren Mahsen en Presidensi Keieu, Nopempe 2016
Kaping Kalahngan Rahn en Sapad
Sang Presiden Henry B. Eyring
Sounsawas Keieu nan Presidensi Keieu
Ong Souleng en Imwin-rahn akan, Rahn Sarawi iei rahn en kaping oh limpoak.
Riei ohl oh lihoko me mihmi wasa koaros nan sampa me iang towe Mwomwohdiso en Sises Krais en Souleng en Imwin Rahn-akan, I inenen kapingki Presiden Thomas S. Monson ah ketin mweidohngie ansou mwahu kiset pwe ien iang padahk nan kapokon en rahn Sarawi wet. I kapakapki me Ngehn Sarawio pahn wahwei mahsen pwukat nan mohngiongimwail kan.
Rahnwet I men kosoia pepehm en nan ahi mohngiong. Me I pahn udahn doke iei kaping—mehlel nan rahn en Sapad.
Kitail kin kapingki soahng tohto: kadek sang aramas me kitail sehse, mwengeh kan ni ansou en atail duhpek, imwatail ihmw kan ansou en melimel, atail ohla kan me kin mwahula, oh ngihl kehlail en kisin seri kan me ahpwtehn ipwidi. Me tohto kitail kak tamanda soahng kei me kitail kin men kapingki.
Ong Souleng en Imwin Rahn-akan, Rahn en Sapad iei ansou mwahu, ahpw mehlel rahn, en kaping oh limpoak. Kauno padahkiong Souleng kan nan Jackson County, Missouri, nan 1831 me arail kapakap oh kaping pahn kin ongete Koht. Irail Souleng en mahs oko kin alehdi kaudiahl akan me pid wauniki rahn Sarawi oh ia mwomwen kaisihsol oh kapakap.1
Irail oh kitail, esehier sang rehn Kauno ia mwomwen atail pahn kin kaudok oh kasapahl kalahngan nan rahn Sarawi kan. Ke kak nda me, dahme keieu kesemwpal iei ia mwomwen atail pepehm ong irail soun kisakis kan. Iet mahsen en Kauno kan ong iamwomwen atail pahn kasalehda atail kasapahl kalahngan oh limpoak ni rahn Sarawi.
E ketkiong kitail kosoned ehu, me koasoia: Kitail anahne poakong Kauno atail Koht sang nan atail mohngiong unsek, atail kehl unsek, atail madmadau, oh roson unsek; oh ni mwaren Sises Krais me kitail pahn papah Ih. …
“Kitail pahn kalahngankiohng Kauno atail Koht ki mehkoaros.
“Kitail anahne wia atail tohnmetei ong Kauno atail Koht ni pwung, itarete ma mie insensued laud nan atail mohngiong oh palingenitail ahniki pahtou.”2
Oh Kauno eri doula oh kaweidkieng irail duwen kahpwal en sohte kaping ong Sahm Nanleng oh Sises Krais ni ara ketin wia soun kihda kisakis kan: “Oh sohte mehkot me aramas kak kasongsongehki Koht, de uhwong, ni ah pahn ketin kadaredo kinsiniei, pohn irail kan me sohte kin wehkada dahme irail wiahda, oh sohte peikiong Sapwellime kosonned akan.”3
Me tohto kumwail me wie rongorongehr kehnehr kaperen en rahn en Sapad me e wia rahn en kataman oh kaping kiong Kauno kapai kan. Kumwail tamataman ngilen koulo:
Ma ni omw mour kahpwal kan pahn lelong uhk,
Ni omw pahtoukihla me salongla kan,
Wadek kapai pomw kan; ehu oh ehu,
Koh ahpw pahn pehm en Koht ah kupwurei iuk.
Wadek Omw Kapai kan;
Ehu oh ehu.
Wadek Omw Kapai kan;
Tehk dahme Koht ketin wiaier. …
Ia duwen omw kin pepehm ni ahmw pwunod?
Oh duwen omw pehm toutou en dipomw kan?
Wadek omw pai; ni omw saledek sang dihp,
Ko ahpw pahn koul pereperen rahn koaros.4
I alehdi kisin likou kei oh mie Souleng loaloapwot kei en Mwomwohdiso me kin pwarek ie me kin toutoukihla arail pwunod. Ekei irail kin ahnkihdi madamadau me ong irail, solahr irail mehkot. I koapworopworki oh kapakapki me dahme I pahn koasoia duwen kapingki rahn en Sapad pahn sewesei kumwail en kak saledek sang nan dihp oh amwail mohngiong kan pahn tepda pereperen.
Ehu kapai me kitail anahne kapingki iei atail kin iang sarawi en kamadipw sarawi, ehupene ni Mware ni atail tohtohkihsang emen de riemen Sapwellime tohnpadahk. Mie ekei me mihmi ni imwarail kan sohte kak pwourdahsang nan douwarail kan. Mie ekei irail me kin men iang mih wasa kitail mih ie ahpw sohte kak pwe irail wie doadoahk nan imwen wini de palien polihs de irail sounpei kan me kin doarei kumwail sang nan kahpwal en mahwen kan ni arail kin mweidala arail mour kan nan sapwtehn de nanwel akan. Ni mehlel ma kitail kak wahdo emen Souleng oh iang ale kamadipw sarawio pahn sewesei kitail tepda pehm kaping oh limpoak ong Sapwellimen Koht kadek.
Pwehki Soukohp Joseph Smith oh kopwurpwurdohn rongamwahuwet, pil ehu kapai me kitail kak wadek iei ansou mwahu me kitail anhiki en ale kamdipw sarawi nan wihk koaros—kaunopada, kapaida, oh pahs sang irail soun papah en Koht kan me ahniki mweimwei. Kitail pahn pil kapingki Ngehn Sarawi ah kaselehiong kitail me kapakap en kamadipw sarawi, me kin wiawi sang irail prihsduhd kan me ahneki mweimwei, kasarawihla sang rehn Samatail Nanleng.
Nan pwungen kapai kan me kitail kak wadekada, me keieu kaselel iei pehm mahk me kin kohdo sang atail kin ale kamadipw sarawio. Kitail pahn kehn limpoak oh kaping laud ong Sounkomouro, me sapwellime tohnmetei me kahrehiong atail kak mwakelekelda sang nan dihp. Ni atail pahn ale pilawahu oh pihlo, kitail kin tamataman me E ketin lokolongkinkitail. Oh ahnsou me kitail kehn kaping ong dahme E ketin wiadahr ong kitail, kitail pahn kehn Sapwellime limpoak ong kitail oh atail limpoak ong Ih.
Kapai en limpoak me kitail alehdi pahn sowese kital en kak kolokol kosonned en “tamataman ih ansou koaros”5 Kumwail kak kehn limpoak, duwehte ahi kehn, pwe Ngehn Sarawio, me Samatail Nanleng inoukiong kitail me e pahn ieiang kitail ansou koaros ni atail pahn kolokol atail inou kan me kitail wiahda. Kitail kak wadek kapai kan koaros rahn Sarawi koaros oh ahneki kaping.
Rahn en Sapad iei pil ansou mwahu en tamataman inou kan me kitail wiahda ni atail bepdaiso oh en poakong oh papah Sapwellimen Sahm Nanleng serih kan. Pwe en kapwaiada inou en rahn en Sapado pahn iangahki patehng klahs kan de pwihn kan ni mohngiong unsek pwe en kalaudehla pwoson oh limpoak ong riatail ohl oh lih akan me iang kitail mih mwo. Inouwo pahn kapatahieng atail pereniki kapwaiada pweidahn atail pwukoah kan.
I kapingki rahn Sarawi tohto I kin padahki irail pwihn en dihken kan nan Bountiful, Utah, pil ansouwo I wia sounpadahk en Sandi Skuhl nan Idaho. Oh I pil tamatamante ahi wia soun sawas ong ahi pwoud nan nerseri, ih ahi pwukoah kihiei mehn mwadong oh kihpene.
Sounpar kei mwohn ahi esehda sang ni kaweid en Ngehno me kisin sawas tikitik me I wia ong Kauno inenen katapan ong nan mour en Sapwellimen Sam Nanleng serih kan. I pwuriamweiki, ekei irail arail kak tamatamante oh kapingkihongie pwehki ei kin nantieng papah irail pwehki Kauno nan rahn en Sapad ko.
Duwehte ekei pak kitail kak sohte kilang wahn atail doadoahk me kitail kin wia rahn Sarawi kan, kitail pil kak sohte kilang doadoahk mwahu kan me ekei ladu en Kauno kin wiahda. Ahpw Kauno kin kaukauwada Sapwellime wehi ni mehleilei sang rehn Sapwellime soun papah loaloapoat oh akitikitik kan, ni e kin ekis ekis sansalada, pahn kohkohwei lau lel nan mwein milenium. E pahn kalinganahla sang ni Ngehn Sarawio.
Ahi tikida I kin iang mihting en kamadipw sarawi nan kisin branch ehu en New Jersey me toweh kan malaulau oh iangahki peneinei ehu, me iei ahi peneinei. Sounpar isihsek limau samwalahro I bepdais nan Philedelphia nan Ihmw Sarawi ehute me kokouda me se kak kohlaie nan Pennsylvania de New Jersey. Ahpw mie kisin branch tikitik ehu me mih Princeton, New Jersey, met miehier ward laud riau mwo. Oh rahn ekei samwalahro, aramas pwulopwul kid samwa me kaunopada pwe irail en kasarawiahla Tehnpas Sarawi en Philadelphia Pennsylvania.
Ni ansou me I wia pwutak pwulopwul, I wia pwukoahn distrik misineri wasa me se kin kaudok Rahn Sarawi kan nan imwen sarawi en Albuquerque, New Mexico. Rahnwet mie tehnpas sarawi ehu oh stake pahieu.
I mwesel sang Albuquerque kohla skuhl Cambridge Massachusetts. Imwen sarawi ehute oh distrik ehu me mie Massachusetts oh Rhode Island. I kin draip dahla pohn kisin nahna kan en wehio pwe ien iang sarawi en kamadipw sarawi ni kisin branch kan, pali laud nan kisin imwen rent tikitik kan de ni kisin imwen kouson kan me wiwiawi. Ansou wet miehier tehnpas sarawi en Koht nan Belmont, Massachusetts oh stake kei me pil wiawihdahr nan wehio.
Dahme I sohte kak kilang ansouwo iei Kauno ah kin ketin kamwerediong Sapwellime Ngehno pohn aramas akan nan kisin ansou en kamadipw sarawi ko oh nan arail wasahn kouson akan. I kak kehn ahpw I sohte kak kilang iahd oh ansouda me Kauno pahn ketin kawada oh kalinganahla Sapwellime wehio. Soukohp men, kilangehr sang ni kaudiahl, oh ntingiedi dahme kitail kak pein kilang ansouwet. Nihpai koasoia me atail nempeh kan sohte pahn laud ahpw laudlahn maraino pahn karehiong mehteikan kak kilangada wasa:
Nihpai koasoaia me e kilangada mwomwohdiso en Sihmwpwul en Koht, oh irail malaulau. …
Oh Nihpai kilangada manaman en Simwpwul en Koht, me e ketdidohr pohn souleng en mwomwohdiso en Simwpwulo, oh pohn irail sapwellimen Kauno seri en inou kan, me milahr wasa koaros pohn sampa; me silasilkidier pwung oh ni manaman en Koht lingan lapalap.6
Nan mwehi wet, kokohp me pil duwehte met oh soahng kan me pil kokohdo mwohtail ntingdier nan Doctrine and Covenant:
Kauno mahsani me kitail saik wewekihla ia wen laud en kapai me Sahmo ketin Sapwellimaniki me e ketin kaukaunop ong kitail;
Oh kitail saikinte kak wahda soahng koaros met; ahpw, kitail en perenda, pwe E pahn ketin kahlwai kitail. Wehio iei atail wehi oh kapai koaros atail oh kepwepwe koaros en mour soutuk iei atail.
Oh irail kan me alehdi soahng koaros ki kaping kalahngan pahn indandla; oh soahng koaros pohn sampa pahn kapatapatehng, pahn kak ale pak epwiki de tohtoh sang.7
I kehnehr wekilah kan en diralahn kaping ong kapai kan oh limpoak en Koht wie tohtola nan Mwomwohdiso wet. E mwomwen tang mwadang ong irail toweh kan en Mwomwohdiso ni ansou kan oh wasa kan me mie songpen arail pwoson mie, ni arail pahn peki ni ngidingid rehn Koht en sewese irail en kak peusehla arail mour.
Kitail momour ansou ieu me pahn inenen apwal oh kasongsong laud me duwehte dahme wiawiong nein Alma aramas akan me mihla pahn manaman en Amulon, me kiong irail kapwunod kan me irail sohla kakehng wahda:
Kepitiehn Kauno peidohng irail nan arail apwal akan, masanih me irail anahne sarada oh nsenamwahula, pwehki E esehier inou kan me irail wiahiong Ih; oh Epahn inouieng Sapwellime aramas akan oh wa irail sang nan arail kahpwal akan.
Oh E pahn pil kihsang katoutou kan me kataur irailahr, me irail pahn sohla kak kehn wisik toutou pwukat, pil ni ansou me irail mihmihte nan katoutou kan; oh E pahn ketin wia met pwe irail en wiahla Sapwellime soun kadedeh, oh irail en ese ni mehlel me Ih me Kauno Koht, me kin pwarek Sapwellime aramas akan nan arail kahpwal akan.
Oh katoutou kan koaros me kohiengehr pohn Alma oh rieh kan mararadahr; Kauno ketin kakehlail irailda pwe irail en kak pitsang arail katoutou kan, oh irail perendahr kouwahlap oh wiadahr soahng koaros me Kauno kupwurki irail en wia.8
Kitail koaros wia soun kadedeh kei ansou me kitail kin kapwaiada atail inou kan rehn Koht, ahpw mehlel ni ansou apwal, E kin karonge atail kapakap akan en kapingki dahme E ketin wiahiong kitailehr oh kin sapeng atail kapakap ong kakehlail oh dadaurete atail pwoson. Oh pakehr tohto E karehiong kitail peren oh ni ansouohte kehlail.
Kumwail kak medemedewe mwahu dahme kumwail pahn wia pwe kumwail en momour oh kaudokiong Ih rahn Sarawi oh kasalehda amwail kaping oh kakehlailih pein amwail oh mehteikan ong apwal akan me mihmi mwohmwail.
Kumwail kak tepkihda rahnwet kapakap en peneinei oh kapingki soahng koaros me Koht ketin wiahiong kumwail. Kumwail kak kapakap pwe kumwail en esehda dahme Kauno men kumwail en wia ni amwail pahn papah Ih oh mehteikan. Mwohn mehkoaros, kumwail kak kapakapki Ngehn Sarawi en kaweid kin kumwail emen aramas me ahniki pahtou de anahne sawas me Kauno pahn kupwurki kumwail en kohla tuhwong.
I kak inou kiong kumwail me amwail kapakap akan pahn pasapeng, oh ma kumwail pahn doadoahngki pasapeng kan me kumwail alehdi, kumwail pahn diarada popohl en rahn en Sapad, oh kehn peren nan ahmwail mohngiong kan direkihla kaping kalahngan.
I kadedeh me Koht Sahm mwangih oh poakoahng kumwail. Sounkomouro, Kaun Sises Krais, tomwkihla dipamwail kan sang ni eh ketin poakehng kumwail. Ira mwahngih adamwail kan duwehte Ira, Sahmo oh Sapwellimehu, mwahngih edemwail kan duwehte Ara ese eden Soukohp Joseph Smith ni ansou me Ira pwarehngo. I kadedeh me iei Mwomwohdiso en Sises Krais met oh E pahn wauneki inou kan me kumwail wiahda oh wiliakapwih amwail inou kan rehn Koht. Kumwail udahn pahn wekila oh duwehla Sounkomouro. Kumwail pahn silasildihsang kasongosong kan oh pepehm en peikasalki me mehlel kan. Kumwail pahn diar peren nan rahn en Sapad. I inoukihong kumwail ni mwaren Kaun Sises Krais, amen.
© 2016 by Intellectual Reserve, Inc. All rights reserved. Ntingdahr nan USA. Kamanaman ong lokaiahn wai: 6/16. Kamanaman ong kawehwe: 6/16. Kawehwehpen First Presidency Message, November 2016.Pohnpeian. 12870 885