Iren Mahsen en Padahk en Pas, Nopempe 2016
Ahlen Mour Kaselel ong Popohl
Sang Presiden Thomas S. Monson
I kadehdehki kisakis laud me Samatailo kosonehdi ong kitail. E wia ahlen mour kaselel ong meleilei oh popohl.
Riei ohl oh lih kempoake kan, iangahki kumwailteikan me iang towehda Wasahn Tiepene wet oh wasa teikan nan sampah, I inenen kapingki ansou mwahu en ehukiheng kumwail ahi madamadau kan menseng wet.
Sounpar limeisek-riau samwalahro, nan July 1964, kapwukoah ieu kohiengie nan Kahnihmw en New York nan ansou me Kapokon en Sampah wiawi mwo. Ehu nihmensehngo I pwarala ni Mormon Pavilion, wasahn kapwar dipwisou mihieo. I lella mwohnte kasansal en kasdohn Mwomwohdiso me ede {Man’s Search for Happiness, ehu kilel en kosondi en komourla me wiahlahr ehu kasdohn Mwomwohdiso en mahs. I mwohnd limwahn ohl pwulopwul men me ele mahki sounpar 35. Se mwur koasoaipene. E sohte wia tohn Mwowohdiso wet. Dengki ko eri kokundi, oh kasdohu eri tepda.
Kiht eri rong ngilen lahp koasoakoasoaio eh wia kalelapak kesempwal kei: Ia wasa I kohsangie? Ia kahrepen ei mihmi met? Ia wasa I pahn kohlaie mwurin mour wet? Koaros men rong pasapengko, oh koaros kilkilang soahng kan me wiwiawi nan kasdohu. Kawehwehpen mour mwohn mourwet wiawi pil iangahki kawehwehpen kahrepen atail mihmi pohn sampah. Se iangehr kilangkilel mwekid kempoakehieu me pidada melahn pahpa kahlap men oh eh ahpw kolahr oh tuhwong ah peneinei kan me e kin poakpoake me awiawiher nan sapwen ngen.
Ni keimwseklahn kilell mwekid kaselel wet me pid duwen Sapwellimen Samatail Nanleng koasoandi ong kitailo, pokono pidohi sohte mwesei, padahk en nan kasdohu sairada pali laud en irail Pwutak pwulopwul me mwohd limwahio sohte kesihnenda. I idek ma e mwahuki dahme kasansaladao. Ah pasapeng dene: “Met mehlel!”
Sapwellimen Samatailo koasoandi ong atail peren oh komourpatail, neitail misineri kan nan sampah me kin kapehsehieng kitail. Kaidehn koaros me rongehr kaweid sarawi wet aledahr oh piladahr ren idawehn. Ahpw, ohl oh lih wasa koaro, duwehte kempoakepahi me pwulopwulo nan New York World’s Fair, alehda mehlel en dahme e kilango, oh re piladahr irail en keid pohn ahlo me pahn kahlwairail lahngni imwarail kan sohte lel kahpwal. Arail mour wekideklahr kohkohlahte.
Me keieu kesemwpwal nan koasoandioieiatail Sounkomour, Sises Krais. Ma sohte Sapwellime tomw en tohnmeteio, koaruhsie pahn salongala. E sohte itar, ahpw ihte, kitail en kamehlelehte Ih oh Sapwellime doadoahk me E ketin wia pohn sampa. Kitail anahne doadoahk oh wehwehkihla, rapahki oh kapakap, koluhla oh mwahu sang rahnteio. Kitail anahne wehwehkihla Sapwellimen Koht kosonned akan oh wie momourki. Kitail anahne alehdi Sapwellime tiahk sarawih kan. Sang ni wiewia met kitail pahn esehla laud mehlel, duwen peren poatoapoat.
Kitail kin kapaida pwe kitail en kolokol mehlelo. Kitail ahniki kapwukoah en ehukiheng mehteikan dahme mehlel. Kitail momourki dahme mehlelo pwe kitail en kak alehdi mehkoaros me Sahmo sapwelimaniki ong kitail. E sohte kin ketin wia mehkot ihte ma e wia kamwahupatail. E mahsanihong kitailehr me Sapwellime —doadoahk oh lingan iei en ketin kapwaiala mour kohkohlahte oh mour soutuk en aramas.1
Ni karakarahk mehlel, oh mpahi, I kadehdehki kisakis kesempwal me wia Sapwellimen Samatailo koasoandi ong kitail. E wia ahl keieu mwahu ong meleilei oh peren ong ansou wet ong nan mour me kohkohdoh.
Riei ohl oh lih akan, I kihdiong kumwail ahi limpoak oh kapai kumwaildani ahi pahn kaimwsakala, oh I wia ni mwaren Sounkomour oh Soundoar, iei Sises Krais, amen.
© 2016 by Intellectual Reserve, Inc. All rights reserved. Ntingdahr nan USA. Kamanaman ong lokaiahn wai: 6/16. Kamanaman ong kawehwe: 6/16. Kawehwehpen Visiting Teaching Message, November 2016. Pohnpeian. 12871 885