Mulwol ko Bin Somm’on e Presidency, November 2016
Magaer nap’an fare Rran ni Madnom
Yib rok President Henry B. Eyring
Bin Somm’on e Counselor ulane Bin Somm’on e Presidency
Ko Giddi’en Got ko Tin Tomur e Rran, fare rran ni Madnom i’ir a rran ko magaer nge t’ufeg.
Pi walageg ni ba’ u gubin yang ko fayleng ko Fare Galasia rok Yesus Kristus ni fan ko Gidii’en Got Rok ko Tin Tomur e Rran. Gu falfalan’ ni President Thomas S. Monson ke pinnningeg nggu gog u conference biney e Madnom. Gu meybil ni fare Kan ni Thothup e rra tay e thin rog nga lan gum’ircha’med.
Daba’ gu ba’adag nggu gog marunga’agen pi thamey ko gum’ircha’ey. Ta’reb e nggu gog marunga’agen e magaer—amrogon riy nufithik e sik’eng.
Gadadma og nag e magaer ni fan bo’or pin’en riy: woed bugol rok bee’ ni dadnang, ggan napan ke bilig nagdad, e chigiy nib fel fini ba’ e yoko’, gol nag e yil kan m’ing, nge fare yoer nib ga’ laman e titiy nib be’ech. Bo’or e gadadra puguran e thamiy nib mager ko pi rofen nem.
Ni fan ko pi Gidii’en Got, rran ni Madnom ni’ir e rran woed e binir nib suguy ko magaer nge t’uf. Somoel ke fonow nag pi nii’ Rok u Jackson County, Missouri, u 1831 ni pi meybil nge magaer e ngariy yaen nga tharimiy. Pi giddi’en Got chirofen nem e kan pii’ e thogthog ko uragon ningar liyor nag e rran ni Madnom, ma uragon ni ngar baley nag e abich rorad nge meybil.1
Yad, nge gadad, e kan noeg Somoel ngorad uragon nggu liyor gad min og nag e magaer u Madnom. Riyul’, tin th’abi ga’ fan e ke uragon gadad ma sap ngak cha’an ni ke pii re taw’ath. Ireray e pi thin Somoel ko uragon nggad oged magaer nge uragon nggu ngongoliy tufeg ko rran ni Madnom:
Gube pi’ ngorad e motochiyel, ni ga’ar: Gimed e ngariy adag dakaen e Somoel ni Got romed ni gubin e gum’ircha’med, gelingmed, lem, nge ayuw; ma u fithingan Yesus Kristus e ngariy pigpig ir. …
Ngariy oged magaer ngak Somoel ni Got romed ni fan gubin.
Aygi gimed ra pii’ e miligach ngak Somoel ni Got romed nib yul’yul’ rogon, ni’ir e gum’ircha’ey kan ming, nge ya’el nib sobut.2
Ma ere, Somoel ma ul’uluy ni nge fonow ni dam pagtalin nggam adag dakaen min liyor nag Chitimangiy nu Tharmiy nge Yesus ni’ir gali cha’an ke pii’ urngin: Dariy e ban’en ni ngan fekey e puwan’ fa gelingin Got, mus ni picha’an ni dani oge magaer ngak ni fan gubin mar th’aeb e motochiyel rok.3
Bo’or e gimed nib e motoyil chiney ma tay e rran ni Madnom ni’ir e rran ni ngan sulaen’med min og nag e magaer ngak Got ni fan e taw’ath rom. Ba’ tang ni ga’ar:
U nap’an e yoko’ lan e yafos rom,
U napan ke kirebaen’, ka malog gubin,
Mu thi’eg pi taw’ath; mu thi’eg nag rad,
Amrogon mra ayuweg Somoel rom.
Mu thi’eg pi taw’ath;
Mu thi’eg nagrad.
Mu thi’eg pi taw’ath;
Got ke ayweg nem. …
Bay ngiyal’ nap’an be gel e sik’eng rom?
Ke tomal e kruth nga lan e yafos rom?
Mu thi’eg pi taw’ath rom; mra yaen murus,
Gara pii’ e tang nap’an e rran ke yaen.4
Gu athapeg pi babyor nge visit rok pi Gidii’en Got ni yad be thamiy ke tomal e kruth ngorad ko yafos ney. Boech ma thamiy woed rogon kan malog nib manemus. Gu athapeg min meybil ni tin nggu gog e ra ayuweg ni nge yaen e murus romed mra pag e tang ni nge tabab lan gum’ircha’med, ma amrogon lan pi mo’olug ko sacrament rom.
Som’on e taw’ath ni rayog nggam og nag e magaer ni fan e ni kam ba’ ko fa binem e mo’olung ko sacrament, mukun ko ta’areb fa la’agruwi gachalpen Rok u Fithingan. Ba’ boech lane pi sengil rorad ni de yoeg ni nge sak’iy nga lang. Ba’ boech ni yad ba’adag nggar paer ko gin ni kam ba’ machane ke thimur ni ngar pig’pig lane pi ospital, min muruwliy e murwel ko police fa salthaw lan e ted fa paan. Got min fekew e sacrament e ireram kemus ban’en nib t’uf ni ngam thamiy e magaer nge t’ufeg ko wurengaen’ Got rom.
Bachan fare Profet Joseph Smith nge fare gospel nikan sulweg chilan rogon, bin l’agruw e taw’ath ni ngad thi’eged riy’ e rayog nggu fekey e sacrament gubin e week—kan fal’eg, yibliy nag, min pii’ rok pi tapi’pig kan duwgliy Got riy’. Rayog ni ngam oge magaer napan Kan Thothup ma pii’em llowan’ ni pi thin ko meybil e sacrament, kan pii’ rok picha’ nib sobut nibe koeled fare priesthood, e kan motoyil ngak Chitimangdad nu Tharimy.
Ko urngin e taw’ath ningad maatheg, fa bin thabi gaa’ i’ir e thamtham ni n’ag nibe yib nap’an ngad feked fare sacrament. Gadadra thamiy e t’ufeg ngad pinning e magaer ngak en Tathapeg, maligach nib manemus rok ke bing e wo’en nogdaded ningan be’echnagdaed ko denen. Nap’an ngad feked fare raen nge flowa, ngad puguraengaed ni Ke gafgow ni fandaed. Ma nap’an ngad thmiyed e magaer ni fan e ngongol Rok ni fandad. Ngad thamiyed e t’ufeg Rok ngodad nge t’ufeg rodad Ngak.
Rayog ni ngam to’aer nag e t’ufeg Ngak ma ngak Tathapegdad ni ke bayuliy nagdad ni nge yoeg pi taw’ath ngodad nap’an kam bi’ech pi m’ag rom ni nam “yib uran ngak.”5 Rayog ni ngam thaimiy e t’ufeg nge magaer ngak Kan ni Thothup, ni Chitimangdad nu Tharmiy e micheg nra paer rom gubin ngiyal’ ni kam yul’yul’ ngak pi micheg kam tay. Rayog ni ngam thi’eg pi taw’ath ney urngin e madnom nge gubin yay kam pug uran pi micheg nem.
Rran ni madnom e ngiyal’ nib fel’ ni ngam puguran fare m’ag kam toey u’mon pi raen ko tawfe ni ngam adak dakaen min ayuweg bitir rok Chitimangdad nu Tharmiy. Mugu’uliy e micheg nem e ra un ngay ni ngam maen nga class fa quorum nib yul’yul’ e gum’ircha’ey ni ngam toey e michaen’ nge adag nufithik pi walagem. Nibe un ngay ni ngam ngongoliy pi calling rom nib falfalan’.
Ke sulaen’ ug bo’or e rran ni Madnom kug fil rogon pi deacon u Bountiful, Utah, nge reb e Sunday School class u Idaho. Gu puguran rofen ni kug pigpig u tangin pa’an e le’engig ko fare nursery, ni muruwel rok e nggu bi’ech nag min yarimy pi toy.
Ke yo’or e duw u’mon ni kug nang u dakaen Kan Thothup ni muruwel rog e ke ga’ fan lan e yafos pi bitir rok Chitimangdad nu Tharmiy. Kug gin’ ni boech e yad e kar puguran gad faram mada’ ko chiney ni kug gay rogon nggu pig’pig nagrad nifan Masta rodad.
Woed e de yoeg bingyal’ nggu guy e wa’amngin e gakiy ko pig’pig rodad u rran ni Madnom, de yoeg bingyal’ nggu guy e wa’amngin rok yug picha’an rok Somoel. Machane Somoel ma mon’og e gil’ilingun Rok nib mocho’ rogon ni nge soer riy’ ngak gin nib machalbog. Be t’uf e Kan Thothup ni ngan guy e fla’ab riy. Picha’ ni ba’adag ni nge mul fare Galasia ney e ra kiribaen’ riy.
Ya nap’an gub pagael kug un pi mo’olung ko sacrament lane branch u New Jersey ni ba’ kemus buchuw e chonggin riy’ nge ta’reb e tabinaw, tabinaw rog. Medlipi ragag nge lal e duw faram, kug tawfe lan kemus e na’un kan toey e Galasia u Pennsylvania nge New Jersey. Machane gil ni ke ba’ kemus ta’reb e branch u Princeton faram, ka ba’ l’agruw e ward nib gaa’ chiney. Ma buchuw e rran faram, biyu’ ngo biyu e gidii’ kar uned re madnom ni fan e yibliy nag ko Philadelphia Pennsylvania Tempel.
Nap’an gub pagal, kug pinning nggu mang district missionary u kemus e chapel ni ba’ ko Albuquerque, New Mexico. Daba’ ke bay e temple nge bo’or e stake riy.
Kug waen’ rok Albuquerque nggu un ko skul u Cambridge, Massechusetts. Ba’aram kemus ta’reb e chapel nge district ni ke yaen ko bo’or e Massachusetts nge Rhode Island. Kug waen dakaen pi burey e fa binem e yang ko nam rodad nggun pi mo’olung ko sacrament u pi branch nib chig, bo’or riy’ nga lan pi na’un kan rent nag fa lan sengil e bee’. Chiney ba’ temple nib thothup rok Got u Belmont nge pi stake niba’ u bang ko nam.
De yoeg nggu guy ko rofen nem ni Somel e ke pu’oeg Kan Thothup Rok nga dakaen picha’an niba’ ko pi mo’olung ko sacrament nem nge tabinaw rorad. Kug thamiy amrogon, machane de yoeg nggu guy ko uragon nge we’in Somoel e ra toey min fla’ab nag e gil’ilingun Rok ngaram. Dakan e thog’thog, e profet ke guy me yoloey ban’en ni chiney rayog nggu guy min thamiy. Nephi me yoeg ni kemus buchuw ngodad, machane fare tamilang rodad e ra m’ug nib ga’.
“Me yibi buch nug gguy fare galasia rok’ fare Saaf ku Got, nib lichlich e gidii’ riy. …
“Me yibi buch ni Gag, Nephi, e gguy fare gelingin fare Saaf ku Got, ni yibi aw nga dakean chonggin e galasia rok’ fare Saaf, ngo dakean fapi gidii’ rok’ Somoel ni fal’eg ba m’ag nga thilraed, ni pi’in ni kar garar gaed u fayleng; ni kar longbiyed yaed ko fel’ u gelingin Got u fithik’ e rir.”6
Lan e ngiyal;’ ney, ba’ reb e profet ni ke guy rogon e paer rodad nge muruwel rodad nga mo’on. Kan yoloey u Doctine nge Covenants. Ni ga’ar:
Dawor kam nang fan ke uragon mab fla’ab e taw’ath fare Chitimangiy ke ba’ lan pa’ rok ni fanam:
Ma de yoeg ni ngam nangfan gubin chiney; machane, mu falfalan, ya Gu ra powi’iyem iyaen. Fare gil’ilingun e gil’ rom nge fare taw’ath riy’ e tawath rom, nge amrogon e fla’ab nib manemus.
Ma enra athapeg gubin e pin’en nib suguy gum’ircha’ ko magaer e ra mang nib gel; nge pin’en e fayleng e ra yoeg ngak, woed ni miri’ay rogon riy, arragon, yug boech.7
Kug thamiy ni ke thiliyeg me mon’og e magaer ni fan pi taw’ath nge adag rok Got ni ke ga’ nag lan e Galasia. Ke m’ug nib riyul’ ni ke papay nag nu fithik pi chonggin e Galasia u napan ke ba’ pi sik’eng ko mich rorad, nap’an ke t’uf ni ngar wenig nag ngak Got ni fan ayuw ni ngar athamgil gad.
Rofen ni gadad ba’ riy chiney e ke ba’ riy pi sikeng nib gel woed e pi sik’eng ke ba’ giddi’ rok Alma u tan pa’ fare to’ogor ni Amulon, ni ke toey pin’en tomal dakaen keru’rad ni de yoeg ni ngar fek iyaen:
“Me yibi buch ni yib laman fare Somoel ngoraed u fithik’ e pi gafgow roraed, ni be ga’ar: Mu puged oewchmed ngalang ma nge pagaen’med, ya gumnang fare m’ag ni kam tayed u thildaed; ma gura fal’eg ba m’ag u thilmaed e gidii’ rog mug chuwegraed u kalbus.
“Ma kubay gu ba’udeg e pi muruwel ni yibe tay nga dakean poemed, nri dab kum thamiyed u dakean keru’med, ni ku mus ko ngiyal’ ni gimed bay u kalbus; ma biney e nggu rin’ ni nge yog ni ngam manged mich rog u tomuren e ngiyal’ ney, ma nge yog ni ngam nanged nib dugil ni gag, fare Somoel ni Got, e guma ayuweg e gidii’ rog u fithik’ e pi gafgow roraed.
“Ere chiney e yibi buch ni fapi muruwel ni kan pii’ ngak’ Alma nge pi walagen e ni ba’udeg ngoraed; arragon, fare Somoel e pii’ gelingraed ni nge moem e pi muruwel roraed ngoraed, mar fol gaed u fithik’ e falfalaen’ nge gum’aen’ ko gubin e pin’en ni ba’adag fare Somoel.”8
Gur nge gag kad guyed ni u nap’an kad koeled chilen e motochiyel rok Somoel, ma amrogon nap’an ke mom’aw riy’, Ke runga’ag pi meybil rodad nib magaer ko tin ni Ker in ni fan dad faram me fulweg pi meybil ni fan e gelingin nggu athamgil nib yul’yul’ rogon. Bo’or e yay Ke ayuwegem nggu thamiy e falfalan’ mab gel.
Sana gabe lemnag ko uragon rayog ni nge yoeg ni ngam paer min liyor biney e rran ni Madnom ni ngam oge magaer ngom min gel nigem nge gidii’ rom u m’on pi sik’eng romed nga mo’on.
Sana gabe lemnag ko uragon rayog ni nge yoeg ni ngam paer min liyor biney e rran ni Madnom ni ngam oge magaer ngom min gel nigem nge gidii’ rom u m’on pi sik’eng romed nga mo’on. Rayog ni ngam meybil ni ngam nang fan tin Somoel e ra adag ni ngam rin nin gam pigpig Ir. Amrogon, rayog ni ngam meybil ni Kan Thothup e ra yoeg ngom minii’ e dariy fagaer riy’ fa b’tuf ayuw.
Rayog nggu micheg ngomed ni pi meybil romed e ra fulweg, ma napan gabe ngongoliy pi fulweg ke ba rom, gara pirieg e falfalan’ u rran ni Madnom min thamiy e falfalan’ lan gum’ircha’em.
Gube micheg ni Got ni Chitimangiy e manang ma ba’adag em. En Tathapeg, ni en Somoel Yesus Kristus, ke bayuliyem ufithik e t’ufeg. Yow manang fithingam woth kar nangew fithingan Profet Joseph nap’an Kar mug’ew ngak. Gube yoeg ni biney e Galasia rok Yesus Kristus, nge Ir e ra liyor nag pi m’ag kam toey Ngak. E rogom ran thilyeg ningam mang woed rogon Tathapeg. Ran matangiyem ko lumel nge thamtham ko muluwaen’ ko tin riyul’. Gara thamiy e faflaen’ nap’an fare rran ni Madnom. Gube micheg udakaen e fithingan ku Somoel ni Yesus Kristus, amen.
© 2016 by Intellectual Reserve, Inc. All rights reserved. Kan yoloey u Mariken. Kan micheg nag ko thin nu Ngalis: 6/16. Micheg nag i pilyeg: 6/16. Pilyeg thin ko First Presidency Message, November 2016. Yapese. 12781 905