Mulwol ni Ngan Fil ni Ngan Nang, November 2016
Fare Kanawo’ nibe soer nga Faflaen’ nib Machaelboeg
Yib rok President Thomas S. Monson
Gube micheg mornga’agen fare tawa’ath ni fare tunom rok e Chitamangdad ni fan ngodaed. Reb e kanawo’ ni tha’abi mangil nibe sar ko gapas nge falfalen’.
Pi walageg nib t’uf rog, bay ara’ ulan fare Conference Center nge ulan e fayleng, kug falflaen’ ni rayog Ningu weliy’ e laninug ngomed ko re kakadabul ney.
Bayi wugem nge la’agruw e duw faram, nap’an July 1964, bayi Murwel rog ulane New York City nap’an fare World Fair. Reb e kakadabul Kug waen nga Mormon Pavilion. Kug taw u mon ke tabab e kachido ko Galasia ni kanoeg Man’s Search for Happiness, marngagan fare kanawo’ ko thap e rib fel’ e kachido ko Galasia. Kug paer nga to’oben e mo’on ni fel’ yangren sana bayi 35 e duw rok. Kug sabathingow. Dawri’ mang chonggin e Galasia rodad. Me achichig e magal, me tabab fare kachido.
Kug motoyilgow ngak e cha’ tachepin nap’an ke fith fapi duwer ko urngin e fayleng: Bu’uw ni gub riy’? Mang fan ni gubay uroy? Gu waen ngan tomuren e re yafas ney? Urngin e gidii’ kar motoyilgaed nib almarin ni ngar rung’ag fapi fulweg, nge urngin e owchen kar sap gaed nga fapi ya’en kachido. Ke weliy’ marunga’agen e yafas rodad u mon e fayleng, nge weliy fan dad u fayleng. Kug guy e chepin e titaw ni gaa’ yangren ni ke yim’ nge chuw ko re yafos ney nge sulweg u ta’abang bayay ko gidii’ nib t’uf ngak ni kar ranoed u somm’on.
Nap’an ke mu’ i weliy kanawo’en nib fel’ngin rok Chitamangdaed nu Tharmiy, kar ranoed ulung i gidii’ nga wuru’ ma dariy’ e lingan, bo’or ni kan ninged e gum’racha’raed ko milwol ko kachido. Fare m’on u to’obeg dak i sak’iy ngalang. Kug fith fa’an irba’adag fare milwol. Me fulweg rok nib sumunguy ni: Iraray e riyul’!”
Kanawo’en Chitamangdaed ni fan e falflaen rodad nge thap rodad e bay pii’ fapi tamachib ulan e fayleng. Gathi urngin e gidii’ e ra motoyil ko molwol ara thapeg. Machane, pumo’on nge ppin u gubin nam, woed rogon e fagar rog ni fel’ yangren ulan fare New York World Fair, ra nang fan fatin riyul, mar tababgaed ko re kanawo’ nibe soer nga tabinaew ni yad be kol ayuw. Ra thilyeg e yafos roraed ni manemus.
Bin nib gaa’ fan ko fare kanawo’ Yesus Kristus e i’ir e Tathapeg daed. Fa’an dariy’ e bayul nib maligach Rok, urrngin e ran n’ag. Dani’ mugu’uliy, machane, ninge michaen’ Ngak nge muruwel Rok. Thingar murwel gad min fil, mugay mag meybil, kalngan’ nge mon’og. Thingar fol gad ko pi motochiyel ko Got. Thingar ningad thapeged fapi gam’ing ko thapeg. Ni kemus aray rogon ningad thapeg e falflaen’, nib riyul’ ko manemus.
Kan taw’ath nagdaed ni bay e tin riyul’ rodad. Bayi chi’len rodad ningad weliyed fare riyul’. Ninge yoeg ningad paered ko fare riyul’ ney ningad mat’awgaed ningad thapeged urngin e tirok Chitamangaed nira pii’ ngodaed. Danir’ rrin’ ba’nen ni go’ ni fan daed. Ke yog ngodaed, “Iraray e muruwel nge fel’ngin—e muruwel ko yafos ni dari tungun nge yafos ni manemus ni fan ko gidii’.”1
U to’orngin e ya’el rog, ufithik e sobtaen, Gube pii’ e m’ag ni marunga’agen fare bin thabi gaa’ e taw’ath i’ir e kanawo’en Chitmangdaed ni fandad. I’ir e kanawo’ nib machaelboeg u fithik e gapas nge falflaen ara’ u fayleng nge ulane fayleng ni bay yib.
Pi walageg, Gube pii’ ngomed e t’ufeg nge taw’ath nap’an Gura ning, ma Gube rrin’ u dakaen fithingan ko Tathapeg nge Tabiyul rodad, arragon Yesus Kristus, amen.
© 2016 by Intellectual Reserve, Inc. All rights reserved. Kan yoloey u Mariken. Kan micheg nag ko thin nu Ngalis: 6/16. Micheg nag i pilyeg: 6/16. Pilyeg thin ko Visiting Teaching Message, November 2016. Yapese. 12871 905