Pweng ke Forfor Luti, Nohfuhmpuh 2016
Inkacnek Suwohswohs nuh ke Engan
Sel Prestuhn Thomas S. Monson
Nga fahkwack ke mwe sang yohk suc pa plwacn luhn Pahpah nuh sesr. Pa inkacnek suwohs se nuh ke mihslac ac engan uh.
Tamuhlwel ac tahmtahel sacohk wiyuck, kwewana mwet oasr ke Lohm Luhlahp in Toeni ac ke facluh nohfohn, nga arulacna tarilacna in akacsruhi nuhnak luhk yuruwos olutu.
Yac luhmngaul-luo tari ah, ke Julahe 1964, nga eis sie kunohkohn fin acn New York City ke pacl ma World’s Fair oasr we. Sie lututacng ah nga som liye Mormon Pavilion oasr ke fair se. Nga tuhkuh met liki petsac se luhn Alu uh ma pahngpahng Man’s Search for Happiness, [Mwet Suk ke Ohiyac Engan] muhtwacwacack, petsac se ke plwacn in molwelah ma ingena etweyuck sin mempucr. Nga muhta sisken mukul se suc sahp matwac yac 35. Kuht sramsram ke lusen pacl fototo. El tiac mempucr ke alu lasr uh. Na kunkunlac lahm uh, ac petsac uh muhtwacwacack.
Kuht lohng puhsra ke petsac ah ke el siyuck kihsensiyuck yohk ac oacna sie sin mwet nuh kwewa uh: Nga muhta oyac tuhkuh? Efuh nga oasr inge? Ngwac som nuh oyac tukun moul se inge? Mwet nuh kwewa srihke lohng top nuh kac, ac muhta nuh kwewa lohacng nuh ke petsac. Sie ahkuhtweyac luhn moul lasr met liki kuht tuhkuh sruhmuhnyuck, ac oacyacpac srihpac lasr fin facluh. Kuht liye ke petsac sie pahpah mahtuh suc som liki moul se inge ac ke tuhkweni lal yurin mwet luhngse suc som tari nuh ke facl luhn nguhn.
Ke sahflahiyacn petsac kahto an ke plwacn luhn Pahpah Lucng nuh sesr, un mwet sac kahkahsrihk tifoklac, puhs selos moklweyuck ke pweng luhn petsac sac. Mwet fuhsr se siskuck ah tiacna tuyak in som. Nga siyuck sel lah el luhngse mwe luti ac. Top kuh lal pa: “Pa inge ma pwacye!”
Plwacn luhn Pahpah tuhmasr nuh ke engan lasr ac molwelah lasr sruhmuhnyuck sin misineri lasr ke facluh nohfohn. Tiac mwet nuhkwewa ma lohng pweng se inge eis ac sruokyac. Tuhsruhktuh, mukul ac muhtwacn acn nuh kwewa, oacna kawuck se luhk ke World’s Fair fin acn New York, akihlen ma pwacye, ac elos sang niyaclos nuh ke inkacnek ma ac koluhlos nuh lohm ah. Moul lalos eklac ma pahtpaht.
Ma yohk srihpac ke plwacn uh pa Mwet Lahngo lasr, Jisus Kraist. Fin wacngihnlac kihsac Lal, ma nuh kwewa tuhlac. Suhfal, finne ohinge, in luhlahlfongi na Kacl ac ke misin Lal. Kuht enenuh in orekma ac lotwelah, suk ac pruhe, auliyak ac ahkwoye. Kuht enenuh in etuh masap luhn God ac moulkihn. Kuht enenuh in eis akwuck in molwelah Lal. Ke ohiyac se inge muhkwena pa kuht kuh in eis engan pwacye ac kawihl.
Kuht insewowo tuh oasr ma pwacye yohrohsr. Oasr kunohkohn lasr in akacsruhi ma pwacye uh. Lwelah kuht in moulkihn ma pwacye kuht in muh kuh in eis ma nuh kwewa Pahpah El ke use nuh sesr. El tiac oruh kuhtwena ma fin tiac ma in kahsrwe kuht. El fahk nuh sesr lah orekma lal ac wolacna lal—pa in kahsruh mwet in eis moul ma pahtpaht yohrohl.1
Ke acn loal luhn nguhnihk, ac ke inse puhsisacl, nga fahkwack ke mwe sang yohk suc pa plwacn luhn Pahpah nuh sesr. Pa inkacnek suwohs soko nuh ke mihslac ac engan kwewana ke acn se inge ac ke facluh se fahsruh uh.
Tamuhlwel ac tahmtahel wiyuck, nga ahksahfye ke luhngse luhk ac mwe insewowo luhk nuh suwos, ac nga oruh ke inen Mwet Lahngo ac Mwet in Molwelah lasr, finne Jisus Kraist, amen.
© 2016 sel Intellectual Reserve, Inc. Kuh ac suwohs nuhkwewa ahkkweyeyucklac. Sihmlac fin acn USA. Ahkkweyeyucklac ke kahs English: 6/16. Ahkkweyeyucklac ke lweng: 6/16. Lwenglah luhn Visiting Teaching Message, November 2016. Kosraean. 12871 868