ຂ່າວສານການຢ້ຽມສອນ, ເດືອນພະຈິກ 2016
ເສັ້ນທາງບໍລິບູນທີ່ພາໄປສູ່ຄວາມສຸກ
ໂດຍປະທານທອມມັສ ແອັສ ມອນສັນ
ຂ້າພະເຈົ້າເປັນພະຍານເຖິງຂອງປະທານອັນຍິ່ງໃຫຍ່ ຊຶ່ງເປັນແຜນຂອງພຣະບິດາເທິງສະຫວັນ ສຳລັບເຮົາ. ມັນເປັນເສັ້ນທາງບໍລິບູນເສັ້ນດຽວທີ່ພາໄປສູ່ຄວາມສະຫງົບ ແລະ ຄວາມສຸກ.
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ທັງຢູ່ໃນສູນກາງປະຊຸມໃຫຍ່ນີ້ ແລະ ຕະຫລອດທົ່ວໂລກ, ຊ່າງເປັນຄວາມກະຕັນຍູຢ່າງຫລວງຫລາຍ ທີ່ຂ້າພະເຈົ້າໄດ້ມີໂອກາດມາແບ່ງປັນຄວາມຄິດກັບທ່ານ ໃນເຊົ້າມື້ນີ້.
ເມື່ອຫ້າສິບສອງປີກ່ອນ, ໃນເດືອນກໍລະກົດ ປີ 1964, ຂ້າພະເຈົ້າໄດ້ຮັບການມອບໝາຍ ໃຫ້ໄປເມືອງນິວຢອກ ຕອນກຳລັງມີງານສະແດງສິນລະປະຈາກທົ່ວໂລກ. ໃນເຊົ້າຂອງມື້ໜຶ່ງ ຂ້າພະເຈົ້າໄດ້ໄປຊົມຫໍສະແດງຂອງຊາວມໍມອນ ຢູ່ໃນງານສະແດງສິນລະປະ. ຂ້າພະເຈົ້າໄດ້ໄປເຖິງພໍດີ ກ່ອນການສາຍໜັງສັ້ນຂອງສາດສະໜາຈັກ ເລື່ອງ ການສະແຫວງຫາຄວາມສຸກຂອງມະນຸດ, ຊຶ່ງສະແດງເຖິງແຜນແຫ່ງຄວາມລອດ ແລະ ນັບແຕ່ນັ້ນມາ ມັນໄດ້ກາຍເປັນທີ່ຮູ້ຈັກກັນດີ ໃນສາດສະໜາຈັກ. ຂ້າພະເຈົ້າໄດ້ນັ່ງຢູ່ທາງຂ້າງຂອງຊາຍໜຸ່ມຄົນໜຶ່ງ ອາຍຸປະມານ 35 ປີ. ພວກເຮົາໄດ້ເວົ້າລົມກັນບຶດໜຶ່ງ. ລາວບໍ່ໄດ້ເປັນສະມາຊິກຂອງສາດສະໜາຈັກຂອງເຮົາ. ແລ້ວໄຟກໍຖືກປິດ, ແລະ ໜັງກໍເລີ່ມຕົ້ນ.
ພວກເຮົາໄດ້ຟັງສຽງຂອງຜູ້ບັນຍາຍ ຊຶ່ງໄດ້ຖາມຄຳຖາມທີ່ສຳຄັນ ແລະ ສຳລັບທຸກຄົນ ມີຄຳວ່າ: ເຮົາມາຈາກໃສ? ເປັນຫຍັງເຮົາຈຶ່ງມາຢູ່ນີ້? ເຮົາຈະໄປໃສ ຫລັງຈາກຊີວິດນີ້? ທຸກຄົນກໍລໍຖ້າຟັງຄຳຕອບ, ແລະ ເບິ່ງຮູບພາບຢ່າງຕັ້ງໃຈ. ຊີວິດກ່ອນເກີດຂອງເຮົາໄດ້ຖືກບັນຍາຍ, ພ້ອມທັງການອະທິບາຍເຖິງຈຸດປະສົງຂອງເຮົາຢູ່ໃນໂລກນີ້. ພວກເຮົາໄດ້ເຫັນພາບທີ່ປະທັບໃຈ ຂອງຊາຍຊະລາຄົນໜຶ່ງ ຜູ້ກຳລັງຈະຈາກໂລກນີ້ໄປ ແລະ ໄດ້ເຫັນພາບທີ່ລາວມີຄວາມສຸກຫລາຍ ເມື່ອພົບພໍ້ຄົນທີ່ລາວຮັກ ທີ່ໄດ້ຕາຍໄປກ່ອນລາວ ຢູ່ໃນໂລກແຫ່ງວິນຍານ.
ຫລັງຈາກໄດ້ເບິ່ງການສະແດງອັນສວຍງາມນີ້ ກ່ຽວກັບແຜນ ຊຶ່ງພຣະບິດາເທິງສະຫວັນໄດ້ຈັດຕຽມໄວ້ສຳລັບພວກເຮົາ, ທຸກຄົນໄດ້ຍ່າງອອກຈາກຫ້ອງໄປດ້ວຍຄວາມມິດງຽບ, ຫລາຍຄົນໄດ້ຖືກປະທັບໃຈຈາກຂ່າວສານໃນໜັງເລື່ອງນັ້ນ. ຊາຍໜຸ່ມຜູ້ທີ່ນັ່ງຢູ່ທາງຂ້າງຂອງຂ້າພະເຈົ້າບໍ່ໄດ້ລຸກຂຶ້ນ. ຂ້າພະເຈົ້າໄດ້ຖາມລາວວ່າ ລາວມັກໜັງເລື່ອງນັ້ນຫລືບໍ່. ລາວໄດ້ຕອບຢ່າງມີພະລັງວ່າ: “ນັ້ນເປັນຄວາມຈິງແທ້ໆ!”
ແຜນຂອງພຣະບິດາຂອງເຮົາສຳລັບຄວາມສຸກຂອງເຮົາ ແມ່ນຖືກແບ່ງປັນໂດຍຜູ້ສອນສາດສະໜາຕະຫລອດທົ່ວໂລກ. ບໍ່ແມ່ນທຸກຄົນທີ່ໄດ້ຍິນຂ່າວສານທີ່ປະເສີດນີ້ ຈະຮັບເອົາມັນ. ແຕ່ຊາຍ ແລະ ຍິງໃນທຸກແຫ່ງຫົນ, ຄືກັນກັບເພື່ອນໜຸ່ມຂອງຂ້າພະເຈົ້າຄົນນີ້ ຜູ້ຢູ່ໃນງານສະແດງສິນລະປະຈາກທົ່ວໂລກ ທີ່ເມືອງນິວຢອກ, ໄດ້ຮັບຮູ້ເຖິງຄວາມຈິງຂອງມັນ, ແລະ ເຂົາເຈົ້າໄດ້ເຂົ້າມາສູ່ເສັ້ນທາງທີ່ຈະພາເຂົາເຈົ້າກັບຄືນໄປບ້ານດ້ວຍຄວາມປອດໄພ. ຊີວິດຂອງເຂົາເຈົ້າໄດ້ປ່ຽນໄປຕະຫລອດການ.
ສິ່ງສຳຄັນຕໍ່ແຜນນີ້ ແມ່ນພຣະຜູ້ຊ່ວຍໃຫ້ລອດ, ພຣະເຢຊູຄຣິດ. ປາດສະຈາກການເສຍສະລະຊົດໃຊ້ຂອງພຣະອົງ, ເຮົາທຸກຄົນຈະບໍ່ສາມາດກັບບ້ານ. ເຖິງຢ່າງໃດກໍຕາມ, ການພຽງແຕ່ເຊື່ອໃນພຣະອົງ ແລະ ເຊື່ອໃນພາລະກິດຂອງພຣະອົງເທົ່ານັ້ນ ແມ່ນບໍ່ພຽງພໍ. ເຮົາຕ້ອງໃຊ້ຄວາມພະຍາຍາມ ແລະ ຮຽນຮູ້, ສະແຫວງຫາ ແລະ ອະທິຖານ, ກັບໃຈ ແລະ ພັດທະນາຕົນ. ເຮົາຕ້ອງຮູ້ຈັກກົດຂອງພຣະເຈົ້າ ແລະ ດຳລົງຊີວິດຕາມນັ້ນ. ເຮົາຕ້ອງໄດ້ຮັບພິທີການຊ່ວຍໃຫ້ລອດຂອງພຣະອົງ. ພຽງແຕ່ໂດຍການເຮັດຕາມດັ່ງທີ່ກ່າວມານີ້ ເຮົາຈຶ່ງຈະໄດ້ຮັບຄວາມສຸກນິລັນດອນ ທີ່ແທ້ຈິງ.
ເຮົາໄດ້ຮັບພອນຫລາຍ ທີ່ ມີ ຄວາມຈິງ. ເຮົາໄດ້ຮັບບັນຊາໃຫ້ ແບ່ງປັນ ຄວາມຈິງ. ຂໍໃຫ້ເຮົາ ຈົ່ງດຳລົງຊີວິດ ຕາມຄວາມຈິງ ເພື່ອວ່າເຮົາຈະສາມາດໄດ້ຮັບທຸກສິ່ງທີ່ພຣະບິດາມີສຳລັບເຮົາ. ພຣະບິດາເຮັດທຸກສິ່ງເພື່ອຜົນປະໂຫຍດຂອງເຮົາ. ພຣະອົງໄດ້ບອກເຮົາວ່າ ນີ້ຄືວຽກງານຂອງພຣະອົງ ແລະ ລັດສະໝີພາບຂອງພຣະອົງ—ຄືການທີ່ຈະເຮັດໃຫ້ເກີດຄວາມເປັນອະມະຕະ ແລະ ຊີວິດນິລັນດອນຂອງມະນຸດ.1
ຈາກສ່ວນເລິກຂອງຈິດວິນຍານຂອງຂ້າພະເຈົ້າ, ແລະ ດ້ວຍຄວາມຖ່ອມຕົວທີ່ສຸດ, ຂ້າພະເຈົ້າເປັນພະຍານເຖິງຂອງປະທານອັນຍິ່ງໃຫຍ່ ຊຶ່ງເປັນແຜນຂອງພຣະບິດາສຳລັບເຮົາ. ມັນເປັນເສັ້ນທາງທີ່ບໍລິບູນເສັ້ນດຽວ ທີ່ຈະພາໄປຫາຄວາມສະຫງົບ ແລະ ຄວາມສຸກ ຢູ່ໃນໂລກນີ້ ແລະ ໃນໂລກໜ້າ.
ອ້າຍເອື້ອຍນ້ອງຂອງຂ້າພະເຈົ້າ, ຂ້າພະເຈົ້າຂໍມອບຄວາມຮັກ ແລະ ພອນຂອງຂ້າພະເຈົ້າໃຫ້ແກ່ທ່ານ ໃນທ້າຍສຸດນີ້, ແລະ ຂ້າພະເຈົ້າກະທຳໄປໃນພຣະນາມຂອງພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ຂອງເຮົາ, ແມ່ນແຕ່ພຣະເຢຊູຄຣິດ, ອາແມນ.
© 2016 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/16. ການແປໄດ້ຮັບອະນຸຍາດ: 6/16. ແປຈາກ Visiting Teaching Message, November 2016. Laotian. 12871 331