2016
Masarakan ti Rag-o ti Pamilia iti Kinalinteg
Disiembre 2016

Mensahe iti Visiting Teaching, Disiembre 2016

Masarakan ti Rag-o ti Pamilia iti Kinalinteg

Nainkararagan nga adalenyo daytoy a material ken kalikagumanyo nga ammuen no ania ti ibinglayyo. Kasano a ti pannakaawat iti “Ti Kaamaan: Maysa a Waragawag iti Lubong” ket mangpapigsa ti pammatiyo iti Dios ken mangparabur kadagiti ay-aywananyo babaen ti visiting teaching? Para iti ad-adu pay nga impormasion, mapan iti reliefsociety.lds.org.

Pammati, Pamilia, Tulong

Ti Dios “impasdekna dagiti pamilia tapno mangisangbay kadatayo iti ragsak, tapno makatulong kadatayo a makasursuro kadagiti umisu a prinsipio iti naayat nga aglawlaw, ken tapno mangisagana kadatayo para iti agnanayon a biag.”1 Maipapan ti “naindaklan a plano” ti Dios (Alma 42:8), kinuna ni Presidente Russell M. Nelson, Presidente ti Korum dagiti Sangapulo-ket-dua nga Apostol: “Naisaad iti planona a dagiti lallaki ken babbai ket ‘maaddaanda iti rag-o’ [2 Nephi 2:25]. Agtaud dayta a rag-o no pilientayo ti agbiag a maitunos iti agnanayon a plano ti Dios.”2

Dagiti pagtaengan a nakasentro ken ni Cristo ti mangted kadagiti kaindaklanan a gundaway para iti balligi. Ilawlawag ni Elder Richard G. Scott (1928–2015) ti Korum dagiti Sangapulo-ket-dua nga Apostol a kas maysa a lugar “a pakaisuruan iti ebanghelio, pakatungpalan dagiti katulagan, ken pakadur-asan ti ayat,” pakapagbiagan dagiti pamilia “iti managtungpal a biag” ket agbalinda “a sititibker a nagramut iti ebanghelio ni Jesucristo.”3

Kinuna ni Presidente Henry B. Eyring, Umuna a Mammagbaga iti Umuna a Panguluen: “Maikeddengtayo nga aramidentayo ti amin a kabaelantayo a mangisangbay kadagiti bileg ti langit iti pamiliatayo.” Ket ad-adda a maitandudotayo ti ayat, serbisio, panagtulnog, ken ragsak kadagiti pagtaengantayo babaen ti “idedengngeg dagiti annaktayo iti balikas ti Dios ket kalpasanna panangikarigatan daytoy a sipapammati. No aramidenda daytoy, agbalbaliw ti ugalida iti wagas a pakatanoran ti ragsak a sapsapulenda.”4

Dagiti Pagtaengan a Nakasentro ken ni Cristo

Addaantayo kadagiti modelo dagiti pagtaengan a nakasento ken ni Cristo kadagiti nasantuan a kasuratan. Kalpasan ti ipupusay ti amana a ni Lehi, inyadayo ni Nephi ti pamiliana ken dagiti dadduma pay a namati kadagiti ballaag ken paltiing ti Dios ken dimngeg kadagiti balikas ni Nephi manipud iti daga dagiti Lamanite. Iti daytoy baro a lugar, nakapagtungpal dagiti Nephite kadagiti pangngeddeng, alagaden ken bilin ti Apo iti amin a banag, a mayannurot iti linteg ni Moises (kitaen iti 2 Nephi 5:6–10). Ngem uray kadagiti Nephite, adda dagiti in-inut a nagbalin a nasukir.

Ket idinto a no dadduma kumalilis dagiti miembro ti pamiliatayo manipud iti kinalinteg kas iti inaramid dagiti Nephite, kinuna ni Elder Scott a ti pagtaengan a nakasentro ken ni Cristo ti “mangipaay iti kadakkelan a pammatalged para iti talna ken pagkamangan kadagiti pagtaengantayo.” Binigbigna nga “adunto latta dagiti karit wenno sakit ti ulo, ngem uray iti baet ti parikut, mabalintayo a nanamen ti akin-uneg a talna ken napalaus a ragsak.”5

Dagiti Mainayon a Nasantuan a Kasuratan

3 Juan 1:4; 1 Nephi 8:12; 2 Nephi 5:27

© 2016 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/16. Pannakaanamongna a maipatarus: 6/16. Pannakaipatarus ti Visiting Teaching Message, December 2016. Ilokano. 12872 864

Dagiti Nagadawan

  1. Handbook 2: Administering the Church (2010), 1.1.4.

  2. Russell M. Nelson, “Celestial Marriage,” Liahona, Nob. 2008, 92.

  3. Richard G. Scott, “For Peace at Home,” Liahona, May 2013, 30, 31.

  4. Henry B. Eyring, “The Teachings of ‘The Family: A Proclamation to the World,’” New Era, Sept. 2015, 5, 6.

  5. Richard G. Scott, “For Peace at Home,” 31.

Ibilang Daytoy

Ania ti maaramidtayo tapno agbiag a nalinlinteg iti ikub dagiti pamiliatayo?