Mensahe ti Umuna a Panguluen, Disiembre 2016
Talna iti Daytoy a Biag
Presidente Henry B. Eyring
Umuna a Mammagbaga iti Umuna a Panguluen
Iti amin kadatayo nga immay iti mortalidad, kinuna ti Mangisalakan, “Iti lubong addaankayto iti rigat” (Juan 16:33). Ngem intedna daytoy napintas a kari kadagiti disipulona kabayatan ti mortal a panagministrona: “Ibatik ti talna kadakayo, itedko ti talnak kadakayo: saan a kas iti panangted ti lubong, ti itedko kadakayo” (John 14:27). Makaliwliwa nga ammuen a daytoy a kari ti personal a talna ket agtultuloy para iti amin a disipulona iti agdama.
Sumagmamano kadatayo ti agbibiag kadagiti napintas ken natalna nga aglawlaw, ngem mapaspasarantayo dagiti didigra iti uneg. Marikna dagiti dadduma ti kappia ken naan-anay a talinaay iti baet ti dakkel a bukod a pannakapukaw, trahedia, ken dagiti agtultuloy a pannubok.
Mabalin a nakitayon ti milagro ti talna iti rupa ti maysa a disipulo ni Jesucristo wenno nangngegyon daytoy kadagiti balikasna. Nakitakon daytoy iti adu a gundaway. No dadduma adda daytoy iti maysa a siled ti ospital a nagguummongan ti pamilia a nanglawlaw iti maysa a katulongan ti Dios a dumanin matay.
Malagipko idi sarungkarak ti maysa a babai iti ospital sumagmamano nga aldaw sakbay a matay gapu iti sakit a kanser. Intugotko ti dua nga ubbing pay nga annakko a babbai a mangkadua kaniak gapu ta daytoy nasingpet a kabsat a babai ket maestrada idi iti Primary.
Nagguummong dagiti miembro ti pamiliana a nanglawlaw iti katrena, a mangnamnama a makadennada isuna kadagiti maudi a kanitona iti daga. Nasdaawak idi bumangon isuna iti katrena. Inawidna ti dua nga annakko a babbai ket inyam-ammona ida, a saggaysa, iti tunggal miembro ti pamiliana. Nagsarita isuna a kasla prinsesa dagiti annakko a naidatag iti korte ti maysa a reyna. Nakakita iti wagas tapno maisaona ti maysa a banag maipapan iti wagas a pakapagbalinan a disipulo ti Mangisalakan ti tunggal tao iti siled. Malagipko pay laeng ti pigsa, ti kinalamuyot, ken ti ayat iti timekna. Ken nalagipko ti pannakasdaawko iti naragsak nga isemna uray no ammona nga ababa laeng ti panawen ti panagbiagna.
Nakaawat isuna kadagiti bendision ti priesthood para iti pannakaliwliwa, ngem inikkannakami amin iti nabiag a pammaneknek a pudno ti kari ti Apo iti talna: “Insaok dagitoy a banag kadakayo, tapno maaddaankayo iti talna. Ditoy lubong addanto rigatyo: ngem mananginanamakayo; siak pinarmekko ti lubong” (Juan 16:33).
Inawatna ti awisna, a kabaelantayo amin nga awaten, ania man dagiti pannubot ken parikuttayo:
“Umaykayo kaniak dakayo amin nga agrigrigat ken madagdagsenan, ta paginanaenkayto.
“Alaenyo ti sangolko kadakayo, ket agsursurokayo kaniak; ta siak naemmaak ken napakumbabaak iti panagpuspusok: ket makasarakkayto iti inana a maipaay kadagiti kararuayo” (Mateo 11:28–29).
Iti laeng babaen ti panagsurot iti Mangisalakan a pakasarakan ti asino man kadatayo iti talna ket talinaay kadagiti pannubok a dumtengto iti amin kadatayo.
Dagiti kararag ti sakramento ket makatulong kadatayo a mangammo no kasano a masarakan dayta a talna iti baet dagiti rigat ti biag. No makiranudtayo iti sakramento, maikeddengtayo ti agbalin a napudno kadagiti katulagantayo a sumurot Kenkuana.
Ikari ti tunggal maysa kadatayo a manglaglagip iti Mangisalakan. Mabalinyo a pilien ti manglaglagip Kenkuana iti wagas a kasayaatan a mangyasideg iti pusoyo Kenkuana. Para kaniak no dadduma, iti panunotko, makitak Isuna a nakaparintumeng iti Minuyongan ti Getsemani wenno makitak Isuna nga umaw-awag ken ni Lazaro a bumangon manipud iti tanem. Bayat ti panangaramidko, mariknak ti kinasinged Kenkuana ken ti panagyaman a mangisangbay iti talna iti pusok.
Ikariyo met ti agtungpal kadagiti bilinna. Ikariyo nga awatenyo ti naganna kadakayo ket agbalinkayo a saksina. Ikarina a no agtungpalkayo kadagiti katulaganyo Kenkuana, addanto kadakayo ti Nasantuan nga Espiritu. (Kitaen iti DkK 20:77, 79.)
Daytoy ti mangisangbay iti talna iti dua a wagas. Ti Espiritu Santo ti mangdalus kadatayo manipud iti basol gapu iti Pannubbot ni Jesucristo. Ken ti Espiritu Santo ti makaited kadatayo iti talna a sumangbay manipud iti kaadda ti yaanamong ti Dios ken ti namnama ti agnanayon a biag.
Insarita ni Apostol Pablo ti maipapan iti daytoy nakaskasdaaw a bendision: “Ngem ti bunga ti Espiritu ket ayat, rag-o, talna, naunday a panagibtur, kinaalumamay, kinasayaat, pammati” (Taga Galacia 5:22).
Idi impadamag dagiti nailangitan a mensahero ti pannakayanak ti Mangisalakan, impakdaarda, “Gloria iti Dios iti kangatuan, ken talna iti daga ” (Lucas 2:14; nainayon ti panangyunay-unay). Paneknekak a kas maysa a saksi ni Jesucristo a ti Ama ken ti Ay-ayatenna nga Anak ket maibaonda ti Espiritu tapno mangipalubos kadatayo a mangsarak iti talna iti daytoy a biag, ania man dagiti pannubok a mabalin a dumteng kadatayo ken kadagiti ipatpategtayo.
© 2016 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/16. Pannakaanamongna a maipatarus: 6/16. Pannakaipatarus ti First Presidency Message, December 2016. Ilokano. 12872 864
Panangisuro manipud iti Daytoy a Mensahe
Isuro ni Presidente Eyring a makatulong kadatayo dagiti kararag ti sakramento a mangammo no kasano a masarakantayo ti talna kabayatan dagiti pannuboktayo. Dagitoy ti mangipalagip kadatayo a no agtungpaltayo kadagiti katulagantayo, adda kadatayo ti kari ti Dios a kadkaduaennatayonto ti Espiritu Santo. Saludsodenyo kadagiti sursuruanyo no kasano a makatulong kadatayo a maaddaan iti talna ti kaadda ti Espiritu Santo. Mabalinyo met nga ibinglay dagiti kapanunotanyo wenno padas maipapan ti no kasano a nakatulong kadakayo ti Espiritu Santo a nakarikna iti talna iti maysa a pannubok. Mabalinyo nga allukoyen dagiti sursuruanyo a mangutob iti daytoy a mensahe kabayatan ti sakramento iti daytoy a lawas.