Messaġġ tal-Għalliema taż-Żjajjar, Diċembru 2016
Il-Ferħ fil-Familja Nsibuh fis-Sewwa
Bl-għajnuna tat-talb studjaw dan il-materjal u fittxu li tiksbu l-ispirazzjoni biex tkunu tafu x’ għandkom taqsmu ma’ ħutkom. Li tifhmu “Il-Familja: Proklamazzjoni lid-Dinja” kif jista’ jwassalkom biex tkabbru l-fidi tagħkom f’ Alla u tbierku lil dawk li intom responsabbli tagħhom permezz tat-tagħlim taż-żjajjar? Għal aktar informazzjoni, żuru reliefsociety.lds.org.
Fidi, Familja, Għajnuna
Alla “waqqaf il-familja biex iwasslilna l-ferħ, biex jgħinna nitgħallmu ċerti prinċipji korretti f’ atmosfera ta’ mħabba, u biex iħejjijna għall-ħajja eterna.”1 Dwar il-“pjan kbir ta’ ferħ” (Alma 42:8), il-President Russell M. Nelson, il-President tal-Kworum tat-Tnax-il Appostlu, qal: “Il-pjan Tiegħu jiddikjara li l-bnedmin ġew fid-dinja ‘sabiex ikollhom il-ferħ’ [2 Nephi 2:25]. Dan il-ferħ jasal meta aħna nagħżlu li ngħixu f’ armonija mal-pjan etern ta’ Alla.”2
Dar iċċentrata fuq Kristu tipprovdi l-akbar opportunitajiet li jwasslu għas-suċċess. Il-Presbiteru Richard G. Scott (1928–2015) tal-Kworum tat-Tnax-il Appostlu ddeskriva d-dar bħala post “li fih jiġi mgħallem l-evanġelju, jinżammu l-patti u tgħammar l-imħabba,” fejn il-familji jistgħu jgħixu “ħajja ubbidjenti” u jkollhom “għeruq sodi mħawlin fl-evanġelju ta’ Ġesù Kristu.”3
Il-President Henry B. Eyring, l-Ewwel Kunsillier fl-Ewwel Presidenza, qal: “Aħna nistgħu niddeċiedu li nagħmlu dak kollu li nistgħu biex inressqu l-qawwiet tas-sema lejn il-familja tagħna.” U jirnexxielna ferm aktar li nħeġġu l-imħabba, is-servizz, l-ubbidjenza u l-ferħ fi djarna jekk “uliedna jisimgħu l-kelma ta’ Alla u wara jippruvawha permezz tal-fidi. Jekk jagħmlu dan, in-natura tagħhom tinbidel b’ mod li tipproduċi l-ferħ li huma jkunu qed ifittxu.”4
Djar Iċċentrati fuq Kristu
Fl-iskrittura nsibu familji li huma eżempju ta’ djar iċċentrati fuq Kristu. Wara li miet missieru, Leħi, Nefi ħa l-familja tiegħu u lil xi nies oħra li kienu emmnu fit-twissijiet u r-rivelazzjonijiet ta’ Alla u li kienu semgħu minn kliem Nefi ‘il bogħod mill-art tal-Lamaniti. F’ dan il-post ġdid, in-Nefiti setgħu jobdu d-digrieti, l-istatuti u l-kmandamenti tal-Mulej f’ kollox, skont il-liġi ta’ Mosè (ara 2 Nephi 5:6–10). Madankollu anke fost il-Nefiti, xi wħud eventwalment spiċċaw diżubbidjenti.
U filwaqt li xi membri tal-familja tagħna xi kultant jafu jitbiegħdu mis-sewwa kif għamlu d-Nefiti, il-Presbiteru Scott qal li dar iċċentrata fuq Kristu xorta waħda “tipprovdi l-akbar assigurazzjoni għall-paċi u r-refuġju fi djarna.” Huwa semma li “xorta waħda nispiċċaw nesperjenzaw bosta sfidi jew uġigħ il-qalb, iżda anke f’ nofs l-inkwiet, aħna nistgħu ngawdu ġewwa fina paċi u hena profonda.”5
Skrittura Addizzjonali
© 2016 minn Intellectual Reserve, Inc. Id-drittijiet kollha riservati. Stampat fil-Ġermanja. Approvazzjoni bl-Ingliż: 6/16. Approvazzjoni tat-traduzzjoni: 6/16. Traduzzjoni ta’ Visiting Teaching Message, December 2016. Maltese. 12872 159
Ikkunsidraw Dan
X’ nistgħu nagħmlu biex ngħixu b’ mod aktar ġust fil-familji tagħna?