Etop eke First Presidency, eke Akpa Ofiong ke isua 2017
Ndiyom se idi Akpaniko
Andino edi President Dieter F. Uchtdorf
Oyoho Onoitem Iba ke First Presidency
Itimke ibighe, ami mma-nse eboho mme owo nte enamde ukpeb mbre nditop utigha. Ke ndisese kpot, oro otim anwanga mi ete edieke owo oyomde nditim mfiok utigha ye idang, oro ada ini ye ukpeb.
Ami nkereke ke mbufo eyekeme ndiworo nda nte akwa otop utigha ke nditop-nwuk ke nnwanga ibibene ndien ekem oduri nde akanare mme idang oro. Mbufo enyene ndikpeb utom ndikut nde oro ndien otop owuk ke esine-ufot oro.
Ndidebi mme Nde oro
Ndibem-iso ntop ndien ediduri nde oro, edi ke ubak-ini nnyin ke idem nnyin imesikut ndaha edu oro ke mme ndaha efen ke uwem.
Nte mbon ufok Abasi, nnyin isiyom ndinam mme edinam, mbubehe, ye ukpebnkpo iko Abasi emi inem odude, edide akpan-nkpo, ye eke nnyin ikopde-inem ibanga. Nnyin iyom ndiduri nde nkanare mme edinam emi, ndinam nnyin inim ke akpaniko ete ke nnyin imekut se idide akpan-nkpo ke iko Abasi.
Emi emem ndinam.
Ke ofuri emana nnyin imebo nti item ye ifiok ito mme prophet Abasi. Nnyin nko imebo ndausung ye edinam-anwanga ito ediwak nwed-emi-ewetde, mkpri-nwed, ye nwed-ukpebnkpo eke ufok Abasi. Nnyin imekeme ndisio ibuot io Abasi emi nnyin imade, iduri akpan-nde ikanare oro, ndien inam idiongo ete ke nnyin imekut se isine ke iko Abasi.
Andinyanga Anam-anwanga ete
Idihe se idi mfina eke eyo nnyin ikpong edi emi. Ke eset, mme adausung edu-ukpono ema esibiat ediwak ini nditum, enim-ke-ndaha-ke-ndaha, ndien efanga ebanga mme ewe kotu ediwak item edi ata akpan item.
Usen kiet eboho eke mme ekpeb edu-ukpono kiet ema edomo ndida Andiyanga nsin ke okposong eneni. Mmo ebup Enye ete anam anwanga eneni kiet emi esisit ibat-owo mikpenyimeke ndinam.
Mmo ebup Enye mbume ete, “Andikpeb, ewe edi akamba iterm ke mbet?”
Kpukpru nnyin imediongo nte Jesus okoborode ete: “Ma Jehovah Abasi fo ke ofuri esit fo, ye ke ofuri ukpong fo, ye ke ofuri ekikere fo.
“Emi edi akamba ye ebe-iso item.
“Udiana onyung ebiet enye, ete, Ma mbohoidung fo nte idem fo.”
“Ofuri mbet ye mme prophet esine ke mme item iba oro.”1
Mbok ti akpatre udim-uyio iko oro ete: “Ofuri mbet ye mme prophet esine ke mme item iba oro.”
Andinyanga ikowutke nnyin nde kpot, edi Enye nko ama owut nnyin akpan mbet nko.
Ndinam se idi Akpan-nkpo
Nte mbon ufok Abasi, nnyin ima idiomo ndida enying Jesus Christ ndori ke idem nnyin. Ke esit ediomo oro edi ndifiok ete ke nnyin iyedomo ndikpeb mbanga Abasi, ima Enye, inam mbuotidem nnyin ke Enye okori, ikpono Enye, isanga ke usung Esie, inyung ituak ida nte mme ntiense ino Enye.
Nte nnyin ibode ukpeb ibanga Abasi awak inyung ikop ima Esie ke idem nnyin, nnyin iyetim ifiok ete ke akwa nwaidem Jesus Christ edi edisana eno eke Abasi. Ndien ima Abasi anam nnyin isanga ke usung eti nkabare-esit, emi edidade ikesim utibe-nkpo eke edifen-nno. Usung emi anwam nnyin ndinyene akwa ima ye mbom ono mbonowo emi ekperede nnyin. Nnyin iyekpeb ndikut nkpo mbe se ewutde-wut. Nnyin iyebe idomo ke ndibiom-owo ikpe oto ke idioknkpo, mmemidem, ndudue, oruk-mbre-ukara, edinim-ke-akpaniko ido-ukpono, idut, mme mbuwet ikpa-idem mmo.
Nnyin iyeda ofuri owo emi nnyin ikutde nte kedi eyen eke Ete nnyin ke Enyong—eyeneka eren ye eyeneka nnwan nnyin.
Nnyin iyesin unwam ino mbon efen ke ifiok ye ima—kpa ye mbon eke mitimke imem ke ndima. Nnyin iyetua ye mmo emi etuangade inyung idong mmo emi efuhode esit.2
Ndien nnyin iyefiok ete ke ufon iduhe ino nnyin ke ndifina-idem mbanga nnen-nnen nde ke iko Abasi.
Mme akamba item iba emi edi akpan nde oro. Ofuri mbet ye mme prophet esine ke item iba oro.3 Nte nnyin inyimede emi, ofuri nti nkpo efen eyediana.
Edieke ata nting-enyin, ekikere, ye ukeme odude ke ndinam ima emi nnyin inyenede ino Abasi okori, inyung isin unwam ino mbon efen, nnyin iyedidiongo ete ke nnyin imekut ata nnen-nnen nde ndien ke ikoyom se idide akpan-nkpo—ndikabare ndi nti mbet Jesus Christ.
© 2017 eketode Intellectual Reserve Inc. Ekpan kpukpru unen ndiming nwed emi. Ekeming ke USA. Enyime edikabare ke Iko Mbakara: 6/16. Enyimme Ndikabare: 6/16. Edikabare Etop eke First Presidency Message, January 2017. Efik. 97921 553