President a Odzi Kan Amandzɛɛbɔ, Sanda 2017
Edze Enyi Ritsim Finimfin no Do
President Dieter F. Uchtdorf ne kasae
Ɔpamfo a Otsĩa Ebien wɔ President a Odzi Kan na n’Apamfo mu
Ɔnnkyɛree na mohwɛɛ nkorɔfo kuw bi a worusũasũa egyen totow. Morohwɛ hɔn ara no, ɔdaa edzi pefee kyerɛɛ me dɛ sɛ epɛ dɛ ewea ara yie wɔ egyen na egyen minaba ho a, ɔgye mber na no ho adzesũa.
Minngye nndzi dɛ ibotum enya abɔdzin dɛ enyim egyen tow ber a etotow bɔ afasu pan ho na nkyii edrɔ enyido-tsimdze twa egyen no ho. Ɔsɛ dɛ isũa mbrɛ ebɔhwehwɛ enyido-tsimdze no na abɔ n’enyiwa no mu pɛɛ.
Erekekã Enyido-tsimdze horow mu
Iridzi kan atow na ekyir no adrɔ enyido-tsimdze no bɛyɛ biribi a ɔnntɔ kã kakra dze, naaso ɔtɔfabi a hɛnakasa yɛkyerɛ dɛm suban no wɔ abrabɔ gyinabew binom mu.
Dɛ yɛyɛ Asɔrmba yi, yɛwɔ ntɔyɛɛ dɛ yɛdze hɛnho takyer asɛmpa dwumadzi, nsɛmansɛma, na nkyerɛkyerɛ horow mpo a ɔyɛ dɛ ma hɛn enyi gye ho, ohia hɛn tsitsir, anaa yɛpɛ mpo. Ɔgyegye hɛn do dɛ yebotwa enyido-tsimdze afa ho, ama yɛaagye eedzi dɛ yɛdze hɛn enyi ritsim asɛmpa no ne tsirmpɔw no do.
Iyi ne yɛ yɛ mberɛw.
Mfe pii a abɛsen kɔ nyina mu no, yeenya afotu na nkenyan a ɔkrɔn efi Nyankopɔn no nkɔnhyɛfo hɔ. Yenya akwankyerɛ na nkyerɛkyerɛmu so fi nwoma horow a woetsimtsim, nkyerɛkyerɛ mbuukuu, na Asɔr adzesũa mbukuu horow mu. Ɔyɛ mberɛw dɛ yebeyi asɛmpa ngyinado a yɛpɛ, yɛbɔdrɔ etwa afa ho pɛɛ, na yɛafa kwan bi dɛ yeehu asɛmpa ne tsirmpɔw no.
Agyenkwa no Kyerɛkyerɛ Mu
Iyi nnyɛ nsɛnhia a ɔfa hɛn nda mber yi mu no nko. Tsetse no, nyamesom baanodzifo hweer mber pii dze hyehyɛɛ mbrasɛm aha aha na wokerii, na wɔgyee ho kyim dɛ no mu mmuana na ohia tsitsir.
Da kor bi nyamesom abemfo kuw no kor pɛɛ dɛ ɔtwe Agyenkwa no ba akasakasa no mu. Wobisaa No dɛ Ɔnkyerɛ N’adwen wɔ dza nkorɔfo kumabaa na wotum gye to mu no ho.
Wobisaa no dɛ, “Kyerɛkyerɛfo, mbra no mu asɛnkɛse nye mmuana?”
Hɛn nyina yenyim mbrɛ Jesus sii buae: “Dɔ Ewuradze wo Nyankopɔn wɔ w’akoma nyina mu, nye wo kra nyina mu, nye w’adwen nyina mu.
“Iyi nye mbra no mu asɛm kɛse a odzi kan na ɔsõ.
“Na dza otsĩa ebien no a ɔtse dɛ ɔno nye dɛ, Dɔ wo nyɛnko dɛ wankasa woho.”
Mbransɛm ebien yi do na mbra na nkɔnhyɛfo no nyina sɛn.”1
Meserɛ hom nhyɛ asɛntɔw a odzi ewiei no nsew: “Mbransɛm ebien yi do na mbra na nkɔnhyɛfo no nyina sɛn.
Agyenkwa no annkyerɛ hɛn enyido-tsimdze no nko, mbom Ɔkyerɛɛ hɛn n’enyi pɛɛ no so.
Erobɔ Enyido-tsimdze no Mu
Dɛ yɛyɛ asɔrmba no, yedzi ahyɛmu dɛ yɛdze Jesus Christ Ne dzin bɔto hɛn do. Dza ɔhyɛ dɛm ahyɛmudzi no mu no nye ntseasee no dɛ yɛbɔbɔ mbɔdzen esũa Nyankopɔn ho nsɛm, na yɛadɔ No, yɛato hɛn gyedzi mu wɔ No mu, yeedzi No nyi, yɛanantsew N’akwan mu na yegyina pintsinn dɛ adasefo wɔ No ho.
Yerusũa Nyankopɔn ho nsɛm mbordo no na yɛretse No dɔ ma hɛn no no, na yehu Jesus Christ afɔrbɔ a ɔmmbɔadze no yie dɛ ɔyɛ Nyankopɔn N’akyɛdze a ofi sor. Na Nyankopɔn no dɔ no kenyan hɛn ma yedua nnuhu kwan pa no do, a obegya hɛn akɔ bɔnfakyɛ mu etumdze no ho. Kwan yi do ma yetum nya dɔ kɛse na ayamuhyehye ma hɔn a woetwa hɛn ho ehyia no. Yebosũa ehu atra edzin nto do ho. Yebokwetsir nsɔhwɛ no dɛ yedze binom hɔn bɔn, esintɔ, nkekãa, amambusɛm gyinabew, nyamesom ho gyedzi, aman a wofi mu, anaa hɔn honam enyi horow bobu hɔn fɔ anaa, yɛdze bobua hɔn atsɛn.
Yebohu obiara a yehyia no dɛ ɔyɛ hɛn Ɔsor Egya ne ba—hɛn nuabanyin anaa akyerɛbaa.
Yɛbɛtsen hɛnho dze ntseasee na ɔdɔ akɔ binom hɔ—hɔn mpo a bia ɔyɛ dzen dɛ yɛbɔdɔ hɔn. Yɛnye hɔn a hɔn werɛ ahow bedzi hɔn yaw, nyew, na yɛakyekye hɔn a wohia awerɛkyekyer no hɔn werɛ2
Na yebohu dɛ onnhia mma hɛn dɛ yɛbɛhaw hɛnho afa asɛmpa no nokwar enyido-tsimdze no ho.
Mbrasɛm ebien a ɔsõ kɛse no nye enyido-tsimdze no. “Mbransɛm ebien yi do na mbra na nkɔnhyɛfo no nyina sɛn.3 Sɛ yɛgye iyi to mu a, ndzɛmba pa horow nkaa no nyina no bɛdeda hɔn ananmu.
Sɛ hɛn botae tsitsir, hɛn adwendwen, nye mbɔdzembɔ no tsim yɛrekyerɛ ɔdɔ mbordo ama Nyame Kokoroko na yɛretsen hɛn akoma ama binom a, yebotum ehu dɛ yeehu nokwar enyido-tsimdze no, na hɛn enyi tsim tsirmpɔw no pɛɛ—dɛ yɛbɛyɛ Jesus Christ esuafo nokwafo.
© 2017 by Intellectual Reserve, Inc. Wɔakora do tumdzi nyina. USA na wotsintsimii. English approval: 6/16. Translation approval: 6/16. First Presidency Message, January 2017. ne Nkyerɛasee Fante. 97921 502