President a Odzi Kan na N’apamfo Amandzɛɛbɔ, Kwakwar 2017
“Dɛ Mbrɛ Madɔ Hom no”
President Thomas S. Monson kãe
Mfe pii abasen kɔ no me nyɛnko bi a wɔfrɛɛ no Louis kãa ne maame brɛfo a nna ɔkasa bɔkɔɔ noho asɛm a ɔyɛ awɔse kyerɛɛ me. Mber a ofii mu no, oenngya ne mba mbanyin na mbabaa no sika biara, na mbom egyapadze kɛse wɔ fasusu mu, wɔ afɔrbɔ mu, nye setsieyɛ mu.
Wotwaa no kwadwom wiei na wɔdze awerɛhow nantsewee kɔr esiei wiei no, ebusua no yiyii ahonyadze kakra noara enã no gyaa no mu. Louis hun asɛnsin na saafee bi wɔ mu. Asɛnsin no kyerɛkyerɛɛ dɛ: “me pia mu no duoduoomu hɔ no, m’ahwehwɛ no drɔwa ase dze mu no, adakaba ketseketse bi hyɛ mu. M’akoma mu akoradze hyɛ mu. Saafe yi bobuei adakaba no.”
Ɔyɛɛ hɔn nyina nwanwa dza ɔsom bo dodow ara a hɔn nã wɔ ma ɔdze saafee bɔtoow mu.
Woyii adakaba no fii no sumabea hɔ na wɔtɔ hɔn bo ara dze saafee no buei. Ber a Louis nye binom hwehwɛɛ dza ɔwɔ adakaba no mu no, wohun abofra kor biara nonko no mfonyin, a abofra no ne dzin na n’awoda kã ho. Afei Louis yii valentine a wɔyɛɛ no wo fie. Ohun no dɛ ɔyɛ ɔnoara ne mbofraber mu nsaano akyerɛw no, ɔkenkan nsɛm a ɔkyerɛɛw no mfe 60 a ɔabɛsen no dɛ: “Ena Dɔfo, Modɔ wo.”
Akoma brɛɛ adze, ndze yɛ komm, na enyinsuwa guraa hɔn. Nna enã n’akoradze no nye n’onnyiewiei ebusua. A n’ahoɔdzen gyina “Modɔ wo” fapem tsim do.
Ndɛ wiadze yi mu no, bea biara nnyi hɔ koraa a, ɔkyɛn fie a, yehia dɛm ɔdɔ fapem tsim no. Na bea biara nnyi hɔ a ɔwɔ dɛ wiadze nya dɛm fapem no ne fasusu kyɛn Nda a Odzi Ekyir Ahotseweefo hɔn efiefi a wɔdze ɔdɔ ayɛ hɔn ebusua abrabɔ no kotowdo bo no.
Hɛn a yɛkã dɛ yɛyɛ Agyenkwa Jesus Christ N’esuafo no, Ɔmaa nkyerɛkyerɛ a ɔtserɛw yi:
“Mbrasɛm fofor na medze mema hom, Dɛ hom ndodɔ homho nkorkor; dɛ mbrɛ mado hom no, hom so ndodɔ homho dɛmara.
Ɔnam iyi do na nyimpa nyina bohu dɛ hom yɛ m’esuafo, sɛ hom wɔ ɔdɔ wɔ homho nkorkor a.”1
Sɛ yebesie mbrasɛm no dɛ yɛndodɔ hɛnho nkorkor a, otwar dɛ yɛkyerɛ obu na ayamuyie ma hɛnho nkorkor, yɛkyerɛ ɔdɔ wɔ hɛn daa daa nkitahodzi mu. Ɔdɔ ma asɛm pa, abotar ngyedo, ahofama ndzeyɛɛ, asowa a ɔwɔ ntseasee, bɔnfakyɛ akoma. Hɛn nkitahodzi nyina mu no, su yinom na ndzeyɛɛ binom so bɔboa ma ɔdɔ a ɔwɔ hɛn akoma mu no ada edzi.
President Gordon B. Hinckley (1910–2008) hyɛɛ no nsew dɛ: “Ɔdɔ … nye sika mfutuw kuraba no a ɔwɔ nyankontɔn n’ekyir no. Mbom ɔdɔɔ sõ kyɛn dza ɔwɔ nyankontɔn n’ekyir no. Ahyɛase no so, ɔdɔ wɔ hɔ, na ne fibea nye fɛɛfɛwdze no a ɔtsen twa wimu wɔ ehum da mu no. Ɔdɔ nye bambɔ a mbofra sũ gye, mbabun hɔn kɔn dɔ, dza ɔka awar fam ho, na angoa no a osiw wentwiwentwi kwan wɔ fie, ɔyɛ mpanyinyɛber asomdwee, ewia ne kan mu enyidado a owu ber ɔhyerɛn no. Mbrɛ osi na ohyira hɔn a wonya mu enyigye wɔ hɔn ebusua, anyɛnkofo, asɔr na fipamfo nkitahodzi mu a.”2
Ɔdɔ yɛ asɛmpa no ne gyinado, dasanyi ne kra n’enyimnyam su. Ɔdɔ yɛ edur ma ebusua ebusua a wɔyar, sɔn horow a wɔyar, nye amanhorow a wɔyar. Ɔdɔ yɛ anoyerɛw, nsato, asɛm dɛw ne kã, na nkamfo. Ɔdɔ yɛ afɔrbɔ, ɔsom, na ahofama.
Kunnom, hom ndɔ hom yernom. Wɔmfa enyidze na enyisɔ mma hɔn. Nkyerɛbaa, hom ndɔ hom kunnom. Wɔmfa enyinnyam na nkuranhyɛ mma hɔn.
Awofo, hom ndɔ hom mba. Hom mbɔ mpaa mma hɔn, wɔnkyerɛkyerɛ hɔn, na wɔngye dase nkyerɛ hɔn. Mba, hom ndɔ hom awofo. Hom nkyerɛ obu, ndaase na setsie mma hɔn.
Mormon tu fo dɛ sɛ yennyi Christ no dɔ mapa no a, “[yɛnnsɛ] hwee.”3 Me mpaabɔ nye dɛ yebedzi Mormon n’afotu no do dɛ “hom mfa hom akoma mu ahoɔdzen nyina mbɔ mpaa mma Egya no, ama ɔdze dɛm ɔdɔ yi aahyɛ [hom] mã, dza ɔdze egu hɔn a wɔyɛ ne Ba Jesus Christ n’akadofo nokwafo do no, ama [hom] abɛyɛ Nyankopɔn ne mba, ama ber a obopue no, yɛabɛyɛ dɛ ɔno.”4
© 2017 Intellectual Reserve, Inc. Wɔakora do tumdzi nyina. USA na wotsintsimii. English approval 6/16. Translation approval 6/16. First Presidency Message, February 2017 ne nkyerɛasee. Fante 97922 502
Erekyerɛkyerɛ efi Amandzɛɛbɔ Yi Mu
President Monson kyerɛkyerɛ hɛn yɛrekyerɛ nokwar Christ-su ho ɔdɔ, tsitsir ara wɔ fie no ho hia. Susu ho dɛ ibebisa hɔn a esera no ma wɔaboa ano dɛ ebusua na wɔmpɛnsapɛnsa akwan horow a wobotum akyerɛ ɔdɔ mbordo ama hɔnho nkorkor. Ibotum ahyɛ hɔn nkuran ma woeyi dɛm adwen nsusui no mu kor na wɔayɛ ho nhyehyɛɛ dze etum enya, dɛ wɔyɛ ebusua no. Mfatoho, ebusuamba no botum ahwɛ no dɛ wɔbɛyɛ nsumaamu ɔsom bi dze ama ebusua mu ba bi dapɛn biara. Ibotum aserɛ hɔn ma ekyir no wɔadwendwen mbrɛ wobesi bɛper enya hɔn botae no dɛ ɔdɔ bɔdɔɔ sõ wɔ hɔn fie.