iTukutuku ni Mataveiliutaki Taumada, Feperueri 2017
“Niu sa Loloma”
Mai vei Peresitedi Thomas S. Monson
Ena vica na yabaki sa oti a talanoataka vei au e dua na itokani ka yacana o Louis na italanoa vakaciriloloma me baleta na tinana yalovinaka, ka dau vosavosa malua. Ni sa takali yani, a biuta koto mai vei iratou na luvena tagane kei na yalewa e sega na iyau se na ilavo ia e dua na ivotavota iyau ni ivakaraitaki vinaka, ni solibula, ni talairawarawa.
Ni sa cavuti oti na vosa ni veivakacaucautaki ni veibulu ka lakovi na sala vakamosiyalo ki na ibulubulu, era vaqisia na matavuvale na vica wale na iyaya e biuta koto mai na tinadra. A kunea kina o Louis e dua na ivola kei na dua na ki. E tukuni ena ivola: “Ena rumunimoce ena tutu, ena noqu drowa e ra, e toka kina e dua na kisi lailai. E tiko kina na iyautalei ni yaloqu. Na ki oqo ena dolava na kisi oya.”
Era vakataroga kece se cava levu beka e taukena tu na tinadra me lokataki.
A tauri mai na kisi ena vanua a davo koto kina ka dolavi vakamalua ena ki. Ni ra vakadikeva o Louis kei iratou na kena vo na lewe ni kisi, eratou kunea kina e yadua na kedra itaba na luvena yadua, ka toka kina na yacana na gone kei na nona siganisucu. Qai dreta mai o Louis e dua na valentine caka ga e vale. Ena maweniliga ni gone, ka kila rawa ni nona, a wilika na vosa a vola o koya ena 60 na yabaki sa oti: “Tinaqu Lomani, au lomani iko.”
E luluvu na yalo, curuoso na domo, ka to na wainimata. Na iyautalei nei nana na nona matavuvale tawamudu. Na kena kaukauwa e davo koto ena yavuvatu ni “Au lomani iko.”
Ena vuravura nikua, e sega ni dua tale na vanua e gadrevi vakalevu cake kina na yavuvatu oya me vaka na vuvale. Ka sega talega ni dua na vanua vinaka cake me raica kina o vuravura na ivakaraitaki ni yavu oya mai na nodra vuvale ga na Yalododonu Edaidai era sa tura me uto ni nodra bula vakamatavuvale na loloma.
Vei keda eda kaya tiko ni da tisaipeli ni iVakabula o Jisu Karisito, sa solia vei keda o Koya na idusidusi titobu oqo:
“E dua na ivunau vou au sa solia vei kemudou; mo dou veilomani me vaka kau sa lomani kemudou, mo dou veilomani talega vakakina.
“A ka oqo era na kila kina na tamata kecega ni dou sa noqu tisaipeli, kevaka dou sa veilomani.”1.
Kevaka me da muria na ivunau ni veilomani, sa dodonu me da dau yalovinaka ka veirokorokovi, ka vakaraitaka noda loloma ena noda veimaliwai e veisiga. Na loloma ena vakavuna na vosa vinaka, na vosota vakadede, na cakacaka sega ni nanumi koya ga, na daliga dau veiciqomi, na yalo dauvosota. Ena noda bula veimaliwai, na veitovonibula oqo kei na ivalavala tale eso ni bula e vakakina ena vakatakila mai na loloma e tu e lomada.
O Peresitedi Gordon B. Hinckley (1910–2008) a dikeva: “Na loloma … sai koya na kuro koula ena mua ni drodrolagi. Ia e sivia sara na mua ni drodrolagi. E tiko talega ena kena itekivu na loloma, ka seraka mai kina na totoka dau dodo kosova na vunilagi ena siga ucauca. Na loloma sai koya na veitaqomaki era dau tagica na gone, na gagadre ni itabagone, na ivavakabi e dau dregata vata na bula vakawati, kei na ilumu dau vakaotia na duidui e vale; sai koya na sautu ni sa qase na bula, na matanisiga ni inuinui ka na cilabasikati mate. Era vutuniyau o ira era sotava ena nodra bula vakamatavuvale, vakaveitokani, ena lotu, kei na itikotiko.”2
Na loloma sai koya na wakatu ni kosipeli, na ituvaki ni bula vakaturaga duadua ni bula vakatamata. Na loloma na iwali ni matavuvale druka, itikotiko luluqa, kei na matanitu tauvimate. Na loloma sai koya na matadredredre, na yaloyalo, na vosa vinaka, kei na veivakacaucautaki. Na loloma sai koya na solibula, na veiqaravi, kei na sega ni nanumi koya ga.
Kemuni na tagane, lomana na watimu. Dokai koya ka dau taleitaki koya. Kemuni na marama, lomana na watimu. Rokovi koya ka dau vakayaloqaqataki koya.
Kemuni na itubutubu ni lomani ira na luvemuni. Masulaki ira, vakavulici ira, ka wasea vei ira nomu ivakadinadina. Kemuni na gone, lomani ira na nomuni itubutubu. Dau rokovi ira, vakavinavinaka, ka talairawarawa.
Ni sega na loloma savasava i Karisito, e vakasalataka o Momani, “[eda] sa sega sara ni dua na ka.”3 Sa noqu masu me da muria na ivakasala nei Momani me da, “masuta na Tamada ena [yalomudou] taucoko, me vakasinaiti kemudou ena loloma oqo, sa solia vei ira era sa vakabauta na Luvena o Jisu Karisito, mo dou yaco kina mo dou luve ni Kalou; ia ni sa rairai mai ko Koya eda sa na tautauvata kaya.”4
© 2017 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me vaka-Valagi: 6/16. Vakadonui me vakadewa: 6/16. Vakadewa ni First Presidency Message, February 2017. Fijian. 97922 858
iVakavuvuli mai na iTukutuku Oqo
E vakavulica vei keda o Peresitedi Monson na bibi ni noda vakaraitaka na loloma dina Vakarisito, vakauasivi e vale. Vakasamataka mo kerei ira o dau sikova me ra soqoni vata vakamatavuvale ka veivosakitaka na sala e rawa ni levu cake kina noda veilomani vakataki keda. E rawa ni o vakauqeti ira me ra digia e dua vei ira na vakasama oqori ka tuvaka me ra rawata vakamatavuvale. Me vaka beka qo, e rawa ni ra segata na lewe ni matavuvale me ra cakava vuni e dua na cakacaka ni veiqaravi vua e dua tale na lewe ni matavuvale e veimacawa. E rawa ni o qai kerei ira me ra qai vakasamataka se a vakalevutaka vakacava na veilomani e vale na nodra sasaga me ra rawata na nodra nakinaki.