iVaqa ni Veisiko, Feperueri 2017
Na Veisorovaki nei Karisito Sa iVakadinadina ni Nona Loloma na Kalou
Vulica ena masumasu na itukutuku oqo ka vakasaqara na veivakauqeti mo kila na ka me wasei.
Vakabauta, Matavuvale, Veivukei
Noda kila ni a solia na Tamada Vakalomalagi na Luvena e Duabau Ga me rawa kina vei keda na tawamate rawa ka rawa ni da bula tawamudu sa vukei keda me da vakila na loloma tawayalani ka sega ni vakasamataki rawa ni Kalou ena vukuda. Sa lomani keda na noda iVakabula.
“O cei me na tawasei keda mai na loloma i Karisito? …
“Niu sa kila vakaidina ni na sega ni rawata na mate, se na bula, se ko ira na agilose, se ko ira sa liu, se ko ira sa kaukauwa, se na veika sa yaco edaidai, se na veika ena yaco e muri,
“Se na ka cecere, se na ka titobu, se duatani na ka me tawasei keda mai na loloma ni Kalou, sa yaco ena vukui Karisito Jisu na noda Turaga.” (Roma 8:35, 38–39).
Ena Veisorovaki i Jisu Karisito, e kaya kina o Elder D. Todd Christofferson ena Kuoramu ni iApositolo Le Tinikarua: “Na nona vakararawataki na iVakabula mai Kecisemani kei na Nona vutugu ena kauveilatai sa vueti keda mai na ivalavala ca ena Nona sotava na gagadre ni lewadodonu vei keda. Sa dedeka yani na loloma veivueti kei na veivosoti vei ira sa veivutuni. Na Veisorovaki talega i Jisu Karisito e sauma na noda dinau ki na lewa dodonu ena nona vakabulai keda ka sauma lesu vei keda na veika rarawa eda sa vosota ena yalodina. ‘A sa colata ko koya na rarawa ni tamata kecega, io na rarawa ni veika bula kecega, na tagane kei na yalewa kei na gone, ko ira na kawa i Atama’ (2 Nifai 9:21; raica talega Alama 7:11–12).”1
Na Karisito sa “ceuti keda ena qeteqete ni Ligana” (Aisea 49:16). E kaya kina o Linda K. Burton na Peresitedi Raraba ni iSoqosoqo ni Veivukei, “Na ivakaraitaki cecere oqori ni loloma sa dodonu me vakavuna vei keda yadua meda tekiduru ka vakavinavinakataka ena masu na Tamada Vakalomalagi ena nona lomani keda taudonu ka tala mai kina na Luvena e Duabau ga ka tawacala me mai vakararawataki ena vuku ni noda ivalavala ca, mosi ni yaloda, kei na veika kece sara e rairai cala ena noda dui bula vakayadua.”2
iKuri ni iVolanikalou kei na iTukutuku
© 2017 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me vaka-Valagi: 6/16. Vakadonui me vakadewa: 6/16. Vakadewa ni Visiting Teaching Message, February 2017. Fijian. 97922 858
Vakasamataka Oqo
Na sala cava beka e rawa ni da vakaraitaka kina na noda vakavinavinaka kei na loloma vua na Kalou kei Jisu Karisito ena isolisoli ni nona Veisorovaki na noda iVakabula?