Te Rongorongo man te Moan Beretitentii, Beberuare 2017
“N Ai Arou Ngkai I Tangiringkami”
Iroun Beretitenti Thomas S. Monson
Tabeua te ririki n nako raoraou ae arana Louis e karakina nakoiu te rongorongo ae riinga nanou ae taekan tinana, ae nimamannei man aamarau ngkana e taetae. Ngke e mate, akea ana mwane ae katikua irouia natina mwaane ma natina aine ma bon tii kaubwaina n ana katooto, n te angaanga nano, ao te ongotaeka.
N te taetae n rainanoanga ake a taekinaki imwiin te taunimate ao te mwananga ae kananokawaki ae karaoaki nakon te tabo n taunimwate, natina ake a rikirake man ikawai a tibwai imarenaia kaubwain tinaia ake e katikui. Ibuakon bwaai akanne, Louis e a kunea te reta ao te kiing. Inanon te reta e taekinaki: “N te koona inanon te ruu ni matu, inanon au turooa mai inano, iai te bwaoki inanona ae uarereke. Inanona bon kaubwai aika mamaten nanou. Te kiing aei e na kauka te bwaoki.”
A bane ni miimi bwa bwaai baikara aika bongana mairoun tinaia are e kaaki inanon te bwaoki ma te roka.
E a kamwaingaki te bwaoki man nnena ao ni karauaki ni kaukaki n te kiing. Ngke a tuoa kanoan te bwaoki Louis ma ake tabeman, a kunei tamneia ni kakatemanna ma araia ao aia bong ni bung. Ngkanne Louis e a butaa te valentine are e karaoia. N ae bebete, kanga ai aron tabonibain te ataei, are e kinaa bwa bon tabonibaina, e wareka taekana are e koreia 60 te ririki n nako: “Tinau ae Tangiraki, I tangiriko.”
A rang rootaki, aamarau taian bwanaa ao a ranran maata. Kaubwain te tina bon ana utu ae akea tokina. Korakorana e kataan iaan aan te bwai ni kamatoa ae “I tangiriko.”
N te aonaaba ni boong aikai, akea te tabo ae kainnanoia riki nakon aan kamatoaan te tangira ma tii inanon te mweenga. Ao akea riki te tabo ae e na kunea te aonaaba n te katooto ae tamaroa n aan te kateitei anne nakon are inanon mweengaia Aomata aika Itiaki ake a tia ni karaoa te tangira bwa mwakoron maiuia aia utu.
Nakoia naake a taku bwa ngaiia ana reirei te Tia Kamaiu Iesu Kristo, E anga te kaetieti ae rang uaana:
“I anganingkami te tua nabangkai, ba kam na itangitangiri; n ai arou ngke I tangiringkami, ba kam na itangitangiri naba.”
“Ane a na ataingkami aomata ni kabaneia ba au reirei ngkami n aei, ngkana kam i tangitangiri” (Ioane 13:35).
Ngkana ti kawakina te tua n itangitangiri, ti na riai ni kaota te nanoanga ma te karinerine imarenara, ni kaotakin ara tangira n ara reitaki n te bong ae koraki. Kaotakin te tangira e anga te taeka n akoi, te kaeka ae taotaonakinnano, te mwakuri ni karimoaakin temanna n aki iangoiko moa, te taninga ae oota, te nano ni kakabwarabure. Inanon ara reitaki ni kabane, aikai ma mwakuri riki tabeua a buoka ni kaota te tangira inanora.
E taraia Beretitenti Gordon B. Hinckley (1910–2008): “Te tangira … bon te bwaata ni koora ae e kona ni kuneaki n tokin neiwiraraa. Irarikina e mwaiti riki nakon tokin neiwiraraa. E ririmoa naba te tangira, ao mai iai e karika te tamaroa are e reenanako ni kabuta karawa n te bong ae buaka. Te tangira bon te bwai ni kamanomano ibukin te bwai are a tang iai ataei, are a nano iai kairake, te bwai ni kanim are e kabaea iai te mare, ao te anainano ae rau are e totokoi kamangaongao inanon te mweenga; bon te rau ibukin te ririki ni kara, te kantaninga n ootantaai are e raititi n tain te mate. Aomata akanne a rang kakabwaiaki n aia rereitaki ma aia utu, raoraoia, te ekaretia, ao kaain rarikiia.”2
Te tangira bon aan raoi te euangkerio, anuaia aomata ae mimitong. Te tangira bon bwainaorakian mamaaran te utu, maamaran te kawa, ao aorakin te botanaomata. Te tangira e kona ni kaotaki rinanon te moangare, kateiteani baim, te taeka n akoi, ao te taeka ni kimarimari. Te tangira bon te angaanganano, te mwakuri n ibuobuoki, karimoaakin temanna n aki iangoiko moa.
Buu mwaane, tangiriia buumi. Kaota nakoia te karinerine ao te kakaitau. Aine, tangiriia kainnabami. Kaota nakoia te karinerine ao te kaunganano.
Kaaro, tangiriia natimi. Tataro ibukiia, reireiniia, ao kakoaua nakoia. Ataei, tangiriia ami karo. Kaota nakoia te karinerine, te karabwarabwa, ao te ongotaeka.
Ngkana akea ana tangira Iesu Kristo ae itiaki, e reirei Moomon, “bon akea [ngaira].”3 Au kantaninga bwa ti bia irira ana reirei Moomon n “tataro nakon te Tama ma korakoran nanomi ni kabane, bwa kam na kaonaki n te tangira aio, are e a tia ni katoka iaoia ni kabane ake taan irira Natina, Iesu Kristo; bwa [ti] aonga n riki bwa natin te Atua; bwa ngkana e kaoti ao ti na riki n ai arona.”4
© 2017 irounInterllectual Reserve, Inc. A bane n tauaki mwiin taian kariaia ibukin katootongana. Boretiaki i USA. Kariaiakaki n te Ingiriti: 6/16. Kariaiakaki rairana: 6/16. Rairan te First Presidency Message, February 2017. Kiribati. 97922 859
Reirei man te Rongorongo Aei
E reireiniira Beretitenti Monson kakawakin kaotan ana tangira Kristo ae koaua, ai moarara riki inanon te mweenga. Iangoia n titirakiniia naake ko kawariia n ikotaki ma aia utu ao ni maroroakin kawai ake a kona ni kaota te tangira ae mwaiti imarenaia. Ko na bae ni kaungaia n rinea teuana mai buakon iango akanne ao ni karaoi babaire ni kakoroa nanona n te utu. N aron te katooto, kaain te utu a na bae n ukoukoria ni karaoa aia mwakuri n ibuobuoki ae raba nakoia kaain te utu teuana ni katoa wiiki. Ko na bae n titirakiniia n iangoia rimwi bwa e kanga kakoroan nanon aia kouru ni karikirakea te tangira inanon mweengaia.