ຂ່າວສານການຢ້ຽມສອນ, ເດືອນກຸມພາ 2017

ການຊົດໃຊ້ຂອງພຣະຄຣິດ ເປັນຫລັກຖານເຖິງຄວາມຮັກຂອງພຣະເຈົ້າ

ໃຫ້ສຶກສາຂ່າວສານນີ້ດ້ວຍການອະທິຖານ ແລະ ສະແຫວງຫາການດົນໃຈເພື່ອຈະໄດ້ຮູ້ຈັກສິ່ງທີ່ຄວນແບ່ງປັນ.

ການເຂົ້າໃຈວ່າ ພຣະບິດາເທິງສະຫວັນຂອງເຮົາໄດ້ປະທານພຣະບຸດອົງດຽວທີ່ຖືກຳເນີດຂອງພຣະອົງເພື່ອວ່າເຮົາຈະໄດ້ຮັບຄວາມເປັນອະມະຕະ ແລະ ສາມາດໄດ້ຮັບຊີວິດນິລັນດອນ ຊ່ວຍເຮົາໃຫ້ຮູ້ສຶກເຖິງຄວາມຮັກອັນເປັນນິດ ແລະ ບໍ່ສາມາດເຂົ້າໃຈໄດ້ ຂອງພຣະເຈົ້າ ທີ່ມີຕໍ່ເຮົາ. ພຣະຜູ້ຊ່ວຍໃຫ້ລອດຂອງເຮົາ ກໍຮັກເຮົາຄືກັນ.

“ຜູ້ໃດຈະແຍກຄວາມຮັກຂອງເຮົາຈາກພຣະຄຣິດໄດ້? …

“ເພາະເຮົາເຊື່ອແນ່ວ່າ ບໍ່ມີສິ່ງໃດແຍກພວກເຮົາຈາກຄວາມຮັກຂອງພຣະອົງໄດ້, ຄວາມຕາຍຫລືຊີວິດກໍດີ, ທູດ ຫລື ຜູ້ປົກຄອງກໍດີ, ຫລື ບັນດາອຳນາດຢູ່ເທິງຊັ້ນຟ້າສະຫວັນກໍດີ, ສິ່ງທີ່ມີຢູ່ໃນປະຈຸບັນ ຫລື ສິ່ງທີ່ຈະມີມາ ໃນອະນາຄົດກໍດີ, ຫລື ລິດເດດທັງຫລາຍ,

“ຄວາມສູງ ຫລື ຄວາມເລິກກໍດີ, ຫລື ສິ່ງອື່ນໃດ ທີ່ໄດ້ຖືກສ້າງແລ້ວກໍດີ, ຈະບໍ່ສາມາດແຍກພວກເຮົາອອກຈາກຄວາມຮັກຂອງພຣະເຈົ້າ, ຊຶ່ງມີຢູ່ໃນພຣະເຢຊູຄຣິດ ພຣະຜູ້ເປັນເຈົ້າຂອງພວກເຮົາ” (ໂຣມ 8:35, 38–39).

ແອວເດີ ດີ ທອດ ຄຣິສໂຕເຟີສັນ ແຫ່ງກຸ່ມອັກຄະສາວົກສິບສອງ ໄດ້ກ່າວເຖິງການຊົດໃຊ້ຂອງພຣະເຢຊູຄຣິດ ວ່າ: “ຄວາມທຸກທໍລະມານຂອງພຣະຜູ້ຊ່ວຍໃຫ້ລອດ ທີ່ເຄັດເຊມາເນ ແລະ ການຮັບທຸກທໍລະມານຂອງພຣະອົງຢູ່ເທິງໄມ້ກາງແຂນ ໄດ້ໄຖ່ເຮົາຈາກບາບ ໂດຍການສະໜອງຄວາມຍຸດຕິທຳ ທີ່ຮຽກຮ້ອງຈາກເຮົາ. ພຣະອົງໄດ້ປະທານຄວາມເມດຕາ ແລະ ການອະໄພໃຫ້ແກ່ຜູ້ທີ່ກັບໃຈ. ການຊົດໃຊ້ຂອງພຣະເຢຊູຄຣິດກໍຍັງສະໜອງຄວາມຍຸດຕິທຳ ທີ່ເຮົາເປັນໜີ້ນຳອີກ ໂດຍການປິ່ນປົວ ແລະ ຊົດໃຊ້ແທນເຮົາ ສຳລັບຄວາມທຸກທໍລະມານໃດໆກໍຕາມ ທີ່ເຮົາຕ້ອງອົດທົນຕໍ່ ໂດຍທີ່ບໍ່ມີຄວາມຜິດ. ‘ເພາະຈົ່ງເບິ່ງ, ພຣະອົງໄດ້ທົນຮັບຄວາມເຈັບປວດຂອງມະນຸດທັງປວງ, ແທ້ຈິງແລ້ວ, ຄວາມເຈັບປວດຂອງສິ່ງທີ່ມີຊີວິດທີ່ຖືກສ້າງຂຶ້ນທຸກຢ່າງ ທັງຊາຍຍິງ ແລະ ເດັກນ້ອຍທີ່ເປັນຄອບຄົວຂອງອາດາມ’ (2 ນີໄຟ 9:21; ເບິ່ງ ແອວມາ 7:11–12) ນຳອີກ.”¹

ພຣະຄຣິດ “ໄດ້ຈາລຶກ [ເຮົາ] ໄວ້ໃນພຣະຫັດຂອງ [ພຣະອົງ]” (ເອຊາຢາ 49:16). ລິນດາ ເຄ ເບີຕັນ, ປະທານສະມາຄົມສະຕີສົງເຄາະສາມັນ, ກ່າວວ່າ, “ການກະທຳທີ່ສູງສຸດເຖິງຄວາມຮັກ ທີ່ເຮັດໃຫ້ເຮົາຕ້ອງຄຸເຂົ່າລົງອະທິຖານດ້ວຍຄວາມຖ່ອມຕົວ ເພື່ອຂອບພຣະໄທພຣະບິດາເທິງສະຫວັນ ສຳລັບການຮັກເຮົາຫລາຍພໍ ຈົນວ່າພຣະອົງໄດ້ສົ່ງພຣະບຸດອົງດຽວທີ່ຖືກຳເນີດທີ່ດີພ້ອມທຸກຢ່າງຂອງພຣະອົງ ມາຮັບທຸກທໍລະມານແທນຄວາມຜິດບາບຂອງເຮົາ, ຄວາມເຈັບປວດໃຈຂອງເຮົາ, ແລະ ທຸກສິ່ງທີ່ເບິ່ງຄືວ່າ ບໍ່ຍຸດຕິທຳໃນຊີວິດຂອງເຮົາແຕ່ລະຄົນ.”²

ຂໍ້ພຣະຄຳພີ ແລະ ຂໍ້ມູນເພີ່ມເຕີມ

ໂຢຮັນ 3:16; 2 ນີໄຟ 2:6–7, 9; reliefsociety.lds.org

© 2017 by Intellectual Reserve, Inc.All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/16. ການແປໄດ້ຮັບອະນຸຍາດ: 6/16. ແປຈາກ Visiting Teaching Message, February 2017. Laotian. 97922 331