ຂ່າວສານຈາກຝ່າຍປະທານສູງສຸດ, ເດືອນກຸມພາ 2017
“ດັ່ງທີ່ເຮົາໄດ້ຮັບພວກເຈົ້າ”
ໂດຍປະທານທອມມັສ ແອັສ ມອນສັນ
ເມື່ອຫລາຍປີກ່ອນ ເພື່ອຄົນໜຶ່ງຊື່ ຫລຸຍ ໄດ້ເລົ່າເລື່ອງລາວທີ່ປະທັບໃຈໃຫ້ຂ້າພະເຈົ້າຟັງ ກ່ຽວກັບແມ່ ຜູ້ອ່ອນໂຍນຂອງລາວ. ຕອນນາງໄດ້ເສຍຊີວິດໄປ, ນາງບໍ່ໄດ້ປະເງິນຄຳໃຫ້ພວກລູກຊາຍ ແລະ ລູກສາວຂອງນາງ ແຕ່ໄດ້ປະມໍລະດົກແຫ່ງຄວາມຮັ່ງມີໃນການເປັນຕົວຢ່າງ, ໃນການເສຍສະລະ, ໃນການເຊື່ອຟັງ ໄວ້ໃຫ້ເຂົາເຈົ້າ.
ຫລັງຈາກການກ່າວປາໄສຢູ່ໃນພິທີສົ່ງສະການ ແລະ ການແຫ່ສົບ ດ້ວຍຄວາມໂສກເສົ້າ ໄປຫາປ່າຊ້າແລ້ວ, ຄອບຄົວໄດ້ໄປເກັບທ້ອນຊັບສົມບັດຈຳນວນເລັກນ້ອຍທີ່ແມ່ຂອງເຂົາເຈົ້າໄດ້ປະໄວ້ໃຫ້. ໃນບັນດາຊັບສົມບັດເຫລົ່ານັ້ນ, ຫລຸຍ ໄດ້ພົບເຫັນຂໍ້ຄວາມ ແລະ ກະແຈດວງໜຶ່ງ. ຂໍ້ຄວາມບອກວ່າ: “ຢູ່ແຈຫ້ອງນອນ, ຢູ່ລີ້ນຊັກອັນຕ່ຳສຸດຂອງແມ່, ມີກ່ອງນ້ອຍໜ່ວຍໜຶ່ງ. ມັນບັນຈຸຊັບສົມບັດທີ່ແມ່ທະນຸຖະໜອມຫລາຍທີ່ສຸດ. ກະແຈດວງນີ້ ຈະເປີດກ່ອງໜ່ວຍນັ້ນ.”
ທຸກຄົນກໍຢາກຮູ້ວ່າ ແມ່ຂອງເຂົາເຈົ້າມີຫຍັງ ທີ່ມີຄ່າຫລາຍແທ້ໆ ຈົນເຖິງກັບຕ້ອງລ໊ອກໄວ້ ແລະ ມີກະແຈ.
ກ່ອງດັ່ງກ່າວໄດ້ຖືກເອົາອອກມາຈາກບ່ອນມ້ຽນຂອງມັນ ແລະ ໄດ້ຖືກເປີດຢ່າງລະມັດລະວັງ ດ້ວຍກະແຈ. ເມື່ອຫລຸຍ ແລະ ຄົນອື່ນໆໄດ້ກວດເບິ່ງສິ່ງຂອງທີ່ຢູ່ໃນກ່ອງ, ເຂົາເຈົ້າໄດ້ພົບເຫັນຮູບຂອງຕົວເອງແຕ່ລະຄົນ, ພ້ອມດ້ວຍຊື່ ແລະ ວັນເກີດ. ແລ້ວຫລຸຍໄດ້ຈັບເອົາໃບວັນວາເລັນທາຍທີ່ເຮັດເອງອອກມາ. ລາວເຫັນລາຍມືຂອງເດັກນ້ອຍທີ່ຂີ້ເຮິ, ຊຶ່ງລາວຈື່ໄດ້ວ່າ ເປັນລາຍມືຂອງລາວເອງ, ລາວໄດ້ອ່ານຖ້ອຍຄຳທີ່ລາວໄດ້ຂຽນ ເມື່ອ 60 ປີກ່ອນ ວ່າ: “ແມ່ທີ່ຮັກ, ລູກຮັກແມ່ເດີ.”
ຫົວໃຈໄດ້ອ່ອນລົງ, ສຽງກໍນິ້ມນວນ, ແລະ ຕາກໍປຽກ. ຊັບສົມບັດຂອງແມ່ ແມ່ນຄອບຄົວນິລັນດອນຂອງນາງ. ຄວາມເຂັ້ມແຂງມາຈາກຮາກຖານອັນແຂງແກ່ນ ຂອງຄຳທີ່ວ່າ “ລູກຮັກແມ່ເດີ.”
ໃນໂລກທຸກວັນນີ້, ບໍ່ມີບ່ອນໃດ ທີ່ຕ້ອງການຮາກຖານອັນແຂງແກ່ນຫລາຍເທົ່າກັບຢູ່ໃນບ້ານເຮືອນ. ແລະ ບໍ່ມີບ່ອນໃດຢູ່ໃນໂລກນີ້ ທີ່ຈະພົບເຫັນຕົວຢ່າງຂອງຮາກຖານທີ່ດີໄປກວ່າ ຢູ່ໃນບ້ານເຮືອນຂອງໄພ່ພົນຍຸກສຸດທ້າຍ ຜູ້ໄດ້ເຮັດໃຫ້ຄວາມຮັກເປັນຫົວໃຈຂອງຊີວິດຂອງຄອບຄົວຂອງເຂົາເຈົ້າ.
ຕໍ່ພວກເຮົາຜູ້ຍອມຮັບວ່າຕົນເປັນສານຸສິດຂອງພຣະຜູ້ຊ່ວຍໃຫ້ລອດ ພຣະເຢຊູຄຣິດ, ພຣະອົງໄດ້ໃຫ້ຄຳແນະນຳທີ່ແຜ່ໄປໄກ ດັ່ງຕໍ່ໄປນີ້:
“ເຮົາມອບກົດບັນຍັດຂໍ້ໃໝ່ໃຫ້ພວກເຈົ້າຄື ຈົ່ງຮັກຊຶ່ງກັນແລະກັນ; ເຮົາຮັກພວກເຈົ້າຢ່າງໃດ, ພວກເຈົ້າກໍຈົ່ງຮັກຊຶ່ງກັນແລະກັນຢ່າງນັ້ນ.
“ຖ້າພວກເຈົ້າຮັກຊຶ່ງກັນແລະກັນ, ທຸກຄົນກໍຈະຮູ້ວ່າພວກເຈົ້າເປັນສາວົກຂອງເຮົາ.”1
ຖ້າຫາກເຮົາຮັກສາພຣະບັນຍັດ ທີ່ຈະຮັກຊຶ່ງກັນແລະກັນ, ແລ້ວເຮົາກໍຈະປະຕິບັດຕໍ່ກັນແລະກັນ ດ້ວຍຄວາມເຫັນອົກເຫັນໃຈ ແລະ ດ້ວຍຄວາມເຄົາລົບ, ໂດຍການສະແດງຄວາມຮັກຂອງເຮົາໃນການປະຕິບັດຕໍ່ກັນແຕ່ລະວັນ. ຄວາມຮັກຄືຖ້ອຍຄຳທີ່ດີ, ການຕອບຮັບດ້ວຍຄວາມອົດທົນ, ການກະທຳທີ່ບໍ່ເຫັນແກ່ຕົວ, ການຮັບຟັງດ້ວຍຄວາມເຂົ້າໃຈ, ການໃຫ້ອະໄພດ້ວຍໃຈຈິງ. ໃນຄວາມສຳພັນທັງໝົດຂອງເຮົາ, ການກະທຳທີ່ກ່າວມານັ້ນ ພ້ອມທັງການກະທຳອື່ນໆ ຈະເປັນຫລັກຖານເຖິງຄວາມຮັກທີ່ມີຢູ່ໃນໃຈຂອງເຮົາ.
ປະທານກໍດອນ ບີ ຮິງລີ (1910–2008) ໄດ້ສັງເກດວ່າ: “ຄວາມຮັກ … ເປັນໄຫຊັບທີ່ຢູ່ສົ້ນຂອງຮຸ້ງກິນນ້ຳ. ແຕ່ມັນມີຄວາມໝາຍຫລາຍກວ່າສົ້ນຂອງຮຸ້ງກິນນ້ຳ. ຄວາມຮັກກໍມີຢູ່ໃນບ່ອນເລີ່ມຕົ້ນຄືກັນ, ແລະ ຈາກບ່ອນນັ້ນ ມັນໄດ້ນຳຄວາມສວຍງາມທີ່ເປັນວົງໂຄ້ງໃຫຍ່ປະກົດຢູ່ໃນທ້ອງຟ້າ ຫລັງຈາກລົມຝົນ. ຄວາມຮັກເປັນສິ່ງປ້ອງກັນ ຊຶ່ງເດັກນ້ອຍຮ້ອງໄຫ້ຫາ, ຊຶ່ງຊາວໜຸ່ມສະແຫວງຫາ, ເປັນກາວຕິດການແຕ່ງງານ, ແລະ ເປັນນ້ຳມັນຂັດຖູບ້ານເຮືອນບໍ່ໃຫ້ເສົ້າໝອງ; ມັນເປັນຄວາມສະຫງົບຂອງຄົນໄວຊະລາ, ເປັນຄວາມສະຫວ່າງຂອງຄວາມຫວັງ ສ່ອງຜ່ານຄວາມຕາຍ. ຜູ້ທີ່ຊື່ນຊົມກັບຄວາມຮັກ ໃນຄວາມສຳພັນຂອງເຂົາເຈົ້ານຳຄອບຄົວ, ໝູ່ເພື່ອນ, ສາດສະໜາຈັກ, ແລະ ເພື່ອນບ້ານຂອງຕົນ ຈະມີຄວາມສຸກຫລາຍພຽງໃດນໍ.”2
ຄວາມຮັກເປັນແກ່ນສານຂອງພຣະກິດຕິຄຸນ, ເປັນຄຸນສົມບັດທີ່ປະເສີດທີ່ສຸດຂອງຈິດວິນຍານຂອງມະນຸດ. ຄວາມຮັກເປັນຫວ້ານຢາສຳລັບຄອບຄົວທີ່ປ່ວຍໂຊ, ຊຸມຊົນທີ່ປ່ວຍໂຊ, ແລະ ປະຊາຊາດທີ່ປ່ວຍໂຊ. ຄວາມຮັກຄືຮອຍຍິ້ມ, ການທັກທາຍ, ຄວາມຄິດຄວາມເຫັນທີ່ດີ, ແລະ ຄຳຍ້ອງຍໍ. ຄວາມຮັກຄືການເສຍສະລະ, ການຮັບໃຊ້, ແລະ ຄວາມບໍ່ເຫັນແກ່ຕົວ.
ສາມີທັງຫລາຍ, ຈົ່ງຮັກພັນລະຍາຂອງທ່ານເດີ. ຈົ່ງປະຕິບັດຕໍ່ເຂົາເຈົ້າດ້ວຍການໃຫ້ກຽດ ແລະ ການຮູ້ບຸນຄຸນ. ເອື້ອຍນ້ອງທັງຫລາຍ, ຈົ່ງຮັກສາມີຂອງທ່ານເດີ. ຈົ່ງປະຕິບັດຕໍ່ເຂົາເຈົ້າດ້ວຍການໃຫ້ກຽດ ແລະ ການຊຸກຍູ້.
ພໍ່ແມ່ທັງຫລາຍ, ຈົ່ງຮັກລູກໆຂອງທ່ານເດີ. ຈົ່ງອະທິຖານເພື່ອພວກເຂົາ, ສອນພວກເຂົາ, ແລະ ເປັນພະຍານຕໍ່ພວກເຂົາ. ລູກໆທັງຫລາຍ, ຈົ່ງຮັກພໍ່ແມ່ຂອງພວກເຈົ້າເດີ. ຈົ່ງປະພຶດຕົນດ້ວຍຄວາມຄາລະວະ, ຄວາມກະຕັນຍູ, ແລະ ການເຊື່ອຟັງ.
ປາດສະຈາກຄວາມຮັກອັນບໍລິສຸດຂອງພຣະຄຣິດ, ມໍມອນແນະນຳວ່າ, “[ເຮົາ] ບໍ່ເປັນອັນໃດເລີຍ.”3 ຂ້າພະເຈົ້າອະທິຖານວ່າ ເຮົາຈະເຮັດຕາມຄຳແນະນຳຂອງມໍມອນ ທີ່ຈະ “ອະທິຖານຫາພຣະບິດາດ້ວຍສຸດພະລັງແຫ່ງໃຈ, ເພື່ອ [ເຮົາ] ຈະເຕັມໄປດ້ວຍຄວາມຮັກນີ້, ຊຶ່ງພຣະອົງປະທານໃຫ້ທຸກຄົນຊຶ່ງເປັນຜູ້ຕິດຕາມທີ່ແທ້ຈິງຂອງພຣະເຢຊູຄຣິດ, ພຣະບຸດຂອງພຣະອົງ; ເພື່ອ [ເຮົາ] ຈະໄດ້ກາຍມາເປັນບຸດຂອງພຣະເຈົ້າ; ເມື່ອພຣະອົງສະເດັດມາ ເຮົາຈະເປັນເໝືອນດັ່ງພຣະອົງ.”4
© 2017 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/16. ການແປໄດ້ຮັບອະນຸຍາດ: 6/16. ແປຈາກ First Presidency Message, February 2017. Laotian. 97922 331