Klumech er a Roldingel e Olisechakl, Ongerung el Buil 2017
A Tngakireng er a Kristo a Olchotel a Beltik el Reng er a Dios
Mosuub er tial tekoi lokiu a nglunguuch e mosiik el mo medengelii a bo mobang lolisechakl.
Klaumerang, Telungalk, Ngeseu
Sel bo dodengei el kmo a Chedam er a Babeluades a uldureklii a Di Chimong el Ngelekel me luchul e lak deluut el mo er a kodall e bol sebeched el mo nguu a diak a ulebengelel klengar a ngosukid el mo melchesuar sel diak a smodii el beltkil a rengul el mei er kid. A Osobeled a dirrek el betik a rengul er kid.
“Ng techa sebechel choridid er a beltik el reng er a Kristo? …
“Le ngak a mui el medengei el kmo, ng diak a kodall, malechub a klengar, malechub a reanghel, malechub a beluu, malechub a klisiich, malechub a ngii di el ngera er chelechang, malechub a ngii di el ngera el mei ruriul,
“Malechub a telongeklel, malechub a delechel, malechub a ngii di el ngera el mla obeob, el sebechel choridid er a beltik el reng er a Dios, el ngii a nga er a Kristo el Jesus el Rubak” (Rom 8:35, 38–39).
A Elder D. Todd Christofferson er a Chelechad er a Teruich me a terung el Apostol a millekoi el kirel a Tngakireng er a Jesus Kristo el kmo: “ A ringel le blo er ngii Osobel er a Gethsemane me a kerus a osebelid er a klengit leng mo sumecheklii sel longerchir ngii a llemalt el kired. Ng odersii a chubechub e sobechekelterir tirkel ouchel a rengrir er a kngterir. A Tngakireng er a Jesus Kristo a dirrek el sebecheklii a belsel a llemalt el kired el mo omekungil e sobecheklid er a ikel ringel el kid outekangel el nga er a chelsel. ‘Le ngii el mlo er a ringel el kirir a rokui el chad, oi, ringel er a rokui el ngar el chad, a rsechal, me a redil, me a rengalk, el tir a uldimukl er a telungalk er a Adam’ (2 Nephi 9:21; dirrek el mesa Alma 7:11–12).”1
A Kristo a “mla [luchesid] er a chereuel a [Chimal]” (Isaiah 49:16). A Linda K. Burton, el Merredel er a Cheldellel a Relief Society, a melekoi el kmo, “Tial olchotel a ngarbab el beltik el reng a kirel rullid el mo outubaruach e nga er a delemdemk el nglunguuch loureng a sulel a Demad er a Babeluades el kmal betik a rengul er kid me Ngii uldureklii a Chimong el cherrungel el Ngelekel el mo odersii a klengar ngii el kirel a kngtid, me a ringel el de ngar ngii, me a ikel rokui el diak el tabesul er a klengar er a dersta er kid.”2
Muut el bebil er a Chedaol llechukl me a Omesodel
© 2017 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/16. Kengei er a oidel: 6/16. Oidel a Visiting Teaching Message, February 2017. Palauan. 97922 881
Ka Momdasu er Tiang
Ke de mekerang e ochotii a omereng el saul me a beltik el reng er kid el mo er a Dios me a Jesus Kristo el kirel a sengk er a Tngakireng er a Osobel?