Klumech er a First Presidency, Ongerung el buil 2017
“El Uai Ngak el Betik a Renguk er Kemiu”
Mla er a President Thomas S. Monson
Sesei el rak er a mla memong e a sechelik er a Louis a uluchais er ngak el kirel a bekokeuii, e medemdemk a longedecheduch el delal. Se er a lemad, e ng dimlak el besterir a rengelekel sechal me a redil a betok el udoud e ng bai milsterir a dikesir er a betok el ungil okesiu, er a meringel ureor, me a blekongesenges.
Uriul er a le medung a tekoi er a kemeldiil me a omerael el mo er a olekull, e a tial telungalk a mlo omechederiib lomes a ikel kloklel a derrir. A Louis a miltik er a tetat el babier me a kiis, el teloi er a ikal klalo. Tial tetat el babier a millekoi el kmo: “Sel ta er a delmerab er a tkul a kboub, er sel riou el blil a bilek, a ngar ngii a kekerei el baks. Ng olab a ikel mekreos el kloklel a renguk. Tial kiis a kisel sel baks.”
Tir el rokui el mle mechas a rengrir el kmo ngera ikal mekreos el klalo el derrir a mengeseches.
Te ngiluu tial baks er a blil e mekekoterir el mkisii loba tial kiis. A Louis me tirkal bebil er ngii er a lomes er a chelsel tial baks, e te miltik a siasing er a dersta el ngalek, lobengkel a ngklir me a cherellir. E a Louis a mocha otebedii a card er a valentine el di ruul er a chim. A ikal diak el ungil llechukl, el lecheklel a kekerei el ngalk, e ng mlo medengei el kmo ng lecheklel, meng mocha menguiu a ikal tekoi leliluches er a okolem el rrak er a memong el kmo: “Chedil, Ng kmal betik a renguk er kau.”
Ng mlo mui a rengrir, e medediklokl a longedecheduch, e merael a iuechel a mederir. A mle mekreos er a rengul a derrir a sel diak a ulebengelel telungalk er ngii. A klisichel tial tekoi a ulsarch er a chelsel sel tekoi el kmo “Ng betik a renguk er kau.”
Chelechal beluulechad, e tial ulserechakl el beltik el reng a kmal usbechall er a blai. E diak a basio er a ngii di el ker er a beluulechad el debetik er a ungil okesiul tial tekoi er sel debetik er ngii er a chelsel a rekeblirir a Ruriul-klebesei el Santo el tir a mla rulii a beltik el reng meng dodai er a klengar er a telunglaek er tir.
Mo er kid el mla mo chedal a Osobel el Jesus Kristo, e Ngii a milskid tia kid el ngarbab el osisechakl:
“Beches el llach ak beskemiu, Ko mo kaubeltik el reng, el uai ngak el betik a renguk er kemiu, me ko mo kaubeltik el reng.
“Me tia ikid e a rokui el chad a mo medengei el kmo kom chedak, al sekum e ke oubeltik el reng el mo er a tang me a tang.” 1
Omko e ke de mo oltirakl er tial llach el mo kaubeltik el reng, e ng kired el mo chubechub e mengull er a ta me a tang, lochotii a beltik el reng er kid er a bek el sils. A beltik el reng odersii a ungil omelkoi, nger loba kllou el reng, meruul el kirir a rebebil, ungil orrenges, me a reng er a klausubes. Rokui el deleuill er kid, e a ika ikid me a lmuut el bebil er a blekeradel a ngosukid lochotii a beltikelreng er a rengud.
A President Gordon B. Hinckley (1910–2008) a millekoi el kmo: “A beltik el reng … a uaia le kolt el debetik er ngii er a ulebengelel orrekim. E ng di ng diak el di le nga er a ulebengelel orrekim el merekong. A beltik el reng a dirrek el omuchel er a uchelel, e sola oltobed a klebekelel liueklii a eanged er a taem le mekngit a eanged. A beltik el reng a ngii a sebecheklir a rengalk a llangel, me a rengeasek oureng er ngii, e bilel a deleuill er a chebechiil, e chilt el tomer a ikel mo telmellel a delengchokl; ng dirrek el budech el kirel a cheleuodel, e dichel a urunguled er a taem er a kodall. Ng kol uangerang el iilteet er a deurreng tirkel lobang er a chelsel a deluill er tir lobengkel a telungalk, resechelei, ikelesia, me a retonari.”2
A beltik el reng a kmal moktek er a ebangkelio, el ngii a kot el chetengakl el blekerdelel a chad. A beltik el reng a kerul a sochera el telungalk, me a sochera el basio, me a sochera el beluu. A beltik el reng a klikmechur, e uldars el chim, e bekokeuii el tekoi, me a ungil omelkoi. A beltik el reng a mo chuarm, e mesiou, e diak di lomdasuo el kirel.
Rsechal, bol betik a rengmiu er a re bechemiu. Mchat er tir e moureng a sulir. Rodos, bol betik a rengmiu er a rebechemiu. Mchat er tir e molisiich a rengrir.
Rechedam me a rechedil, bol betik a rengmiu er a rengelekiu. Moluluuch el kirir, molisechakl er tir, e mochotii a klaumerang el mo er tir. Rengalk, bol betik a rengmiu er a redemmiu me a redelemiu. Mochotii omengull, omereng el saul, me a blekongesenges el mo er tir.
A Mormon a mellach el kmo, a lak a bliochel el beltik el reng er a Kristo, “e [kid] a diak de ngerang.”3 A nglunguchek a kmo bo doltirakl er a tekingel a Mormon el mo nga er a “nglunguuch el mo er a Chedam loba rengud el rokir, me luchul [e] bo de mui er tial beltik el reng, el ngii a mla mesterir tirkel rokui el tir a meral loltirakl er a Ngelekel, el Jesus Kristo; me [bo] dulengakl el ngelekel a Dios; me sel lemei e bol sebeched el mo uai ngii.”4
© 2017 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/16. Kengei er a oidel: 6/16. Oidel a First Presidency Message, February 2017. Palauan. 97922 881
Osischeklel Tia el Klumech
A President Monson olisechakl er kid el kirel a klungel a belkul a dolecholt a meral blekerdelel a Kristo er a beltik el reng, oumesingd a chelsel a rekeblid. Momdasu el olengit er tirkal moldingel er tir el mo dmak el telungalk e losaod a ikel teletael el ngii a sebechir lochotii a beltik el reng el mo er a ta me a tang. Ng sebechem lolengit er tir me le ngiltii a tal tekoi el ruul a moktek er tir el mo kudmeklii el telungalk. Okesiul tiang, a rechedal a telungalk a sebechir el ngiltii a tal berrotel el teletael er a omesiou el mo er a chedal a telungalk er a bek el sandei. Ng sebechem loker tir ruriul el kmo sel bo loruul er tiang e ng mekerang e ngosuterir el choisisii a beltik el reng er tir er a blai.