Yut
Mi Bin Mekem Desisen blong Mi Finis
Hem we i raet i stap long Yuta, YSA.
Mi bin kasem wan gudfala lesen long wan klas blong Ol Yang Woman abaot fasin blong stap klin long saed blong seks–wan topik we i mekem plante i mekem ol noes long ol jea blong olgeta. Mi no tingbaot evri ting we mi bin lanem long dei ia, be mi save tingbaot nomo se lida blong mi ia i tokbaot wan long ol standet blong hemwan–blong oltaem stap klin long saed blong seks. Toktok blong hem i stap wetem mi, mo mi mekem desisen blong tekem olsem wan valiu blong miwan.
Wan dei taem mi stap sidaon long bas blong gobak hom afta long wan gem, wan i statem wan gem blong talem trutok o traem. From se i no gat samting gud blong mekem, mi mo sam narafala pikinini i joen. Taem i kam kasem mi, mi mas traem wan samting we mi save we i no stret. Hemia i olsem wan had desisen blong mi blong mekem, be ol toktok blong yang woman lida blong mi oli kam long long hed blong mi, mo joes i kam isi nomo. Kwiktaem nomo mi no wantem mekem. Mi bin mekemap tingting blong mi finis long wanem bae mi mekem long situesen olsem.
Mi save we taem yumi go long jos mo mekem rum blong ol samting we oli tijim yumi longwe, bae yumi kasem blesing ia blong gat moa bigfala paoa long saed blong spirit mo proteksen long ol temtesen blong wol ia.