Fas Presidensi Mesej, Maj 2017
Gat Stret mo Gud Fasin Olsem Tul blong Faet
I Kam long Presiden Henry B. Eyring
Fas Kaonsela long Fas Presidensi
Profet blong God long wol, Presiden Thomas S. Monson, i talem se: “Tedei, yumi stap faet agens long wan bigfala grup blong sin,ol nogud fasin we oli stap kam antap long fored blong yumi.1
?Bae yu no sapraes blong save se Presiden Monson i talem ol toktok ia 50 yia i pas finis? Sapos yumi stap faet agens paoa blong sin we yumi neva save long hem bifo, ?hamas moa nao hem i stap traem blong spolem gud yumi tedei? From gudfala risen, Lod i talemaot long taem blong yumi tedei, “Luk, enemi i stap kam tugeta” (luk long D&C 38:12).
Bigfala taem blong faet we “yumi evriwan i putum nem blong faet”2 i bin stat bifo we yumi bon i kam long wol ia. Hem i bin stat bifo we oli mekem wol ia. Hem i bin stat plante taosen yia i pas long laef bifo laef long wol ia, taem we Setan i go agens mo lukaot blong karemaot fridom blong joes blong ol man (luk long Moses 4:3).
Setan i lusum faet ia mo oli bin “sakemaot hem i kam daon long wol ia” (Revelesen 12:9), mo i gohed blong mekem faet tedei. Long wol ia, hem i mekem faet wetem olgeta tabu man blong God, mo raonem gud olgeta D&C 76:29 wetem ol giaman, ol trik mo ol temtesen.
Hem i faet agens ol Profet mo olgeta Aposol. Hem i faet agens loa blong jastiti mo fasin we mared i wan tabu samting. Hem i faet agens famli mo tempol. Hem i faet agens wanem we i gud mo tabu.
?Olsem wanem nao bae yumi save faet agens long enemi olsem? ?Olsem wanem nao bae yumi save faet agens long ol nogud fasin we i stap kam antap bigwan long wol blong yumi tudei? ?Wanem nao i klos blong faet blong yumi? ?Huia i ol man we bae oli stap long saed blong yumi?
Paoa blong Smol Sipsip
Profet Josef Smit i tijim se Setan i gat paoa long yumi nomo taem yumi givim hem janis.3
From se hem i bin luk taem blong yumi, nao Nifae “i bin luk paoa blong Smol Sipsip blong God, we i bin kamdaon long ol sent blong Jos blong Smol Sipsip, mo long ol kavenan pipol blong Lod, we i bin seraot olbaot long ful fes blong wol; mo oli blokem olgeta wetem stret fasin mo paoa blong God long bigfala glori.” 1 Nifae 14:14; oli ademap italik).
?Olsem wanem nao bae yumi save protektem yumi wetem stret mo gud fasin mo paoa? Yumi kipim Sabat dei i tabu mo givim ona long prishud. Yumi mekem mo kipim ol tabu kavenan, mekem ol famli histri blong yumi, mo go long tempol. Yumi traehad blong oltaem sakem sin mo askem long Lod blong “sevem [yumi] tru long atonmen mo blad blong Kraes blong [Hem i] save fogivim ol sin blong [yumi]” Mosaea 4:2 Yumi prea, mo givim seves, mo testifae, mo praktisim fet long Jisas Kraes.
Yumi save holem stret mo gud fasin mo paoa olsem tul blong faet taem yumi, “holem taet gud long tingting blong yumi oltaem ol toktok blong laef” (luk long D&C84:85). Yumi holemtaet gud ol toktok ia taem yumi putum yumi i go insaed long ol tabu skripja mo long ol toktok blong ol wokman blong Lod we Hem i bin jusum olgeta, we oli save serem wanem Hem i wantem, maen blong Hem, mo voes blong Hem (luk long D&C 68:4) long jeneral konfrens blong nekis manis.
Long faet ia blong yumi agens long ol nogud fasin, yumi mas oltaem tingbaot se yumi gat help i stap long tugeta saed blong vel. Olgeta long saed blong yumi oli God Papa we i no save finis, Lod Jisas Kraes, mo Tabu Spirit.
Olgeta long saed blong yumi tu i ol man blong faet blong heven we yumi no luk. “Yu no fraet,” Elisha i talem long wan yang man we i fulap long fraet taem oli stap rere blong faet agens long ol man blong faet blong nogud fasin, “olgeta long saed blong yumi oli plante moa, i winim olgeta ia.” (luk long Seken King 6:15-16).
Yumi no nid blong fraet. God i lavem ol Sent blong Hem. Bae Hem i neva lego yumi.
Mi save we God, tru long ansa blong prea, i mekem i kamtru wanem mi askem Hem blong sevem mi aot long ol nogud fasin. Mi testifae se wetem help blong God Papa, Sevya blong wol, mo Tabu Spirit, yumi save save se bae Hem i givim moa paoa we i inaf blong save stanap agens long ol nogud fasin we yumi stap fesem.
Bae yumi oltaem holem stret mo gud fasin olsem tul blong faet blong mekem yumi save gat strong tingting blong win long faet ia.
© 2017 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/16. Oli letem translesen: 6/16. Translation of First Presidency Message, March 2017. Bislama. 97923 852