ຊາວໜຸ່ມ
ຂ້ານ້ອຍໄດ້ຕັດສິນໃຈແລ້ວ
ຜູ້ຂຽນອາໄສຢູ່ລັດຢູທາ, ສະຫະລັດອາເມຣິກາ.
ຄັ້ງໜຶ່ງ ຂ້ານ້ອຍໄດ້ຮັບບົດຮຽນທີ່ມີຄ່າ ຢູ່ໃນຫ້ອງຮຽນກຸ່ມຍິງໜຸ່ມ ກ່ຽວກັບຄວາມບໍລິສຸດທາງເພດ—ເປັນຫົວຂໍ້ທີ່ເຮັດໃຫ້ຊາວໜຸ່ມຫລາຍຄົນ ນັ່ງກະດຸກກະດິກບໍ່ສະບາຍໃຈ ຢູ່ຕັ່ງຂອງຕົນ. ຂ້ານ້ອຍບໍ່ຈື່ທຸກສິ່ງ ທີ່ຂ້ານ້ອຍໄດ້ຮຽນໃນມື້ນັ້ນ, ແຕ່ຂ້ານ້ອຍຈື່ວ່າ ຄູສອນຂອງຂ້ານ້ອຍໄດ້ກ່າວກ່ຽວກັບມາດຕະຖານສ່ວນຕົວຢ່າງໜຶ່ງຂອງເພິ່ນ—ທີ່ຈະບໍລິສຸດທາງເພດສະເໝີ. ຖ້ອຍຄຳຂອງເພິ່ນໄດ້ຝັງຢູ່ໃນໃຈຂອງຂ້ານ້ອຍ, ແລ້ວຂ້ານ້ອຍໄດ້ຕັດສິນໃຈ ຮັບເອົາມາດຕະຖານຂໍ້ນີ້ ມາຮ່ວມໃສ່ກັບຄວາມເຊື່ອຖືສ່ວນຕົວຂອງຂ້ານ້ອຍ.
ມື້ໜຶ່ງ ໃນຂະນະທີ່ຂ້ານ້ອຍຂີ່ລົດເມກັບເມືອບ້ານ ຈາກການຫລິ້ນກິລາ, ບາງຄົນຢູ່ໃນລົດເມ ໄດ້ເລີ່ມຕົ້ນຫລິ້ນເກມ ບອກຄວາມຈິງ ຫລື ທ້າໃຫ້ເຮັດ. ໂດຍທີ່ບໍ່ມີຫຍັງເຮັດ, ໝູ່ຫລາຍຄົນກັບຂ້ານ້ອຍ ໄດ້ເຂົ້າຫລິ້ນ. ເມື່ອມັນເຖິງທີຂອງຂ້ານ້ອຍ, ຂ້ານ້ອຍໄດ້ຖືກທ້າໃຫ້ເຮັດບາງສິ່ງທີ່ຂ້ານ້ອຍຮູ້ວ່າ ເປັນສິ່ງທີ່ບໍ່ຄວນເຮັດ. ມັນອາດເປັນສິ່ງຍາກທີ່ຈະຕັດສິນໃຈສຳລັບຂ້ານ້ອຍ, ແຕ່ຖ້ອຍຄຳຂອງຄູສອນໃນຫ້ອງຮຽນຂອງກຸ່ມຍິງໜຸ່ມ ໄດ້ເຂົ້າມາສູ່ຈິດໃຈຂອງຂ້ານ້ອຍ, ແລະ ການເລືອກນັ້ນ ກໍເປັນສິ່ງງ່າຍທີ່ຈະເຮັດ. ຂ້ານ້ອຍໄດ້ບອກປະຕິເສດທັນທີ. ຂ້ານ້ອຍໄດ້ຕັດສິນໃຈແລ້ວ ວ່າຂ້ານ້ອຍຈະເຮັດແນວໃດ ເມື່ອຕົກຢູ່ໃນສະຖານະການແບບນັ້ນ.
ຂ້ານ້ອຍຮູ້ວ່າ ເມື່ອເຮົາໄປໂບດ ແລະ ຮັບເອົາສິ່ງທີ່ເຮົາໄດ້ຖືກສິດສອນຢູ່ທີ່ໂບດ, ແລ້ວເຮົາຈະໄດ້ຮັບພອນດ້ວຍພະລັງທາງວິນຍານອັນຍິ່ງໃຫຍ່ ແລະ ໄດ້ຮັບການປົກປ້ອງຈາກການລໍ້ລວງຂອງໂລກ.