ຂ່າວສານຈາກຝ່າຍປະທານສູງສຸດ, ເດືອນມິນາ 2017
ມີອາວຸດຄື ຄວາມຊອບທຳ
ໂດຍ ປະທານເຮັນຣີ ບີ ໄອຣິງ
ທີ່ປຶກສາທີໜຶ່ງໃນຝ່າຍປະທານສູງສຸດ
ສາດສະດາຂອງພຣະເຈົ້າຢູ່ໃນໂລກນີ້, ປະທານທອມມັສ ແອັສ ມອນສັນ ໄດ້ສອນວ່າ, “ທຸກວັນນີ້, ເຮົາໄດ້ຕັ້ງຄ້າຍ ເພື່ອຕໍ່ສູ້ກັບຂະບວນການຂອງຄວາມຜິດບາບ, ຄວາມເສື່ອມຊາມ, ຄວາມຊົ່ວຮ້າຍອັນໃຫຍ່ທີ່ສຸດ ທີ່ເຄີຍເຕົ້າໂຮມຕົວເຂົ້າກັນຢູ່ຕໍ່ໜ້າເຮົາ.”1
ທ່ານແປກໃຈບໍ ກັບຖ້ອຍຄຳທີ່ປະທານມອນສັນໄດ້ກ່າວ ເມື່ອ 50 ປີກ່ອນ? ຖ້າຫາກເຮົາໄດ້ຕັ້ງຄ້າຍເພື່ອຕໍ່ສູ້ກັບຂະບວນການຂອງຄວາມຊົ່ວຮ້າຍທີ່ບໍ່ເຄີຍມີມາກ່ອນ ໃນເວລານັ້ນ, ແລ້ວຈະມີຄວາມຊົ່ວຮ້າຍຫລາຍພຽງໃດ ທີ່ຂູ່ເຂັນເຮົາໃນທຸກວັນນີ້? ດ້ວຍເຫດຜົນທີ່ດີ, ພຣະຜູ້ເປັນເຈົ້າໄດ້ປະກາດກ່ຽວກັບຍຸກສະໄໝຂອງເຮົາວ່າ, ສັດຕູໄດ້ເຕົ້າໂຮມຕົວເຂົ້າກັນ (ເບິ່ງ D&C 38:12).
ສົງຄາມທີ່ “ເຮົາເຂົ້າຮ່ວມ”2 ໄດ້ເລີ່ມຕົ້ນກ່ອນເຮົາມາເກີດຢູ່ໃນໂລກນີ້. ມັນໄດ້ເລີ່ມຕົ້ນແມ່ນແຕ່ກ່ອນໂລກໄດ້ຖືກສ້າງຂຶ້ນ. ມັນໄດ້ເລີ່ມຕົ້ນເມື່ອຫລາຍພັນປີກ່ອນ ຢູ່ໃນໂລກກ່ອນເກີດ, ບ່ອນທີ່ຊາຕານໄດ້ກະບົດ ແລະ ໄດ້ພະຍາຍາມທຳລາຍອຳເພີໃຈຂອງມະນຸດ (ເບິ່ງ Moses 4:3).
ຊາຕານໄດ້ເສຍໄຊໃນການຕໍ່ສູ້ນັ້ນ ແລະ “ໄດ້ຖືກຊັດຖິ້ມລົງເທິງແຜ່ນດິນໂລກ” (ພຣະນິມິດ 12:9), ບ່ອນທີ່ມັນຈະສືບຕໍ່ເຮັດສົງຄາມຂອງມັນ ໃນທຸກວັນນີ້. ຢູ່ໃນໂລກນີ້ ມັນຈຶ່ງເຮັດສົງຄາມກັບໄພ່ພົນຂອງພຣະເຈົ້າ, ແລະ ອ້ອມພວກເຂົາໄວ້ທຸກດ້ານ (ເບິ່ງ D&C 76:29) ດ້ວຍຄວາມຕົວະ, ຄວາມຫລອກລວງ, ແລະ ການລໍ້ລວງ.
ມັນຕໍ່ຕ້ານສາດສະດາ ແລະ ອັກຄະສາວົກ. ມັນຕໍ່ຕ້ານກົດພົມມະຈັນ ແລະ ຄວາມສັກສິດຂອງການແຕ່ງງານ. ມັນຕໍ່ຕ້ານຄອບຄົວ ແລະ ພຣະວິຫານ. ມັນເຮັດສົງຄາມຕໍ່ຕ້ານຄວາມດີ, ຄວາມບໍລິສຸດ, ແລະ ຄວາມສັກສິດ.
ເຮົາຈະຕໍ່ສູ້ສັດຕູເຊັ່ນນັ້ນໄດ້ແນວໃດ? ເຮົາຈະຕໍ່ສູ້ຕ້ານທານຄວາມຊົ່ວຮ້າຍ ທີ່ປະກົດວ່າ ປົກຄຸມໂລກຂອງເຮົາຢູ່ໄດ້ແນວໃດ? ຍຸດທະພັນຂອງເຮົາຄືຫຍັງ? ໃຜຄືພັນທະມິດຂອງເຮົາ?
ອຳນາດຂອງພຣະເມສານ້ອຍ
ສາດສະດາໂຈເຊັບ ສະມິດ ໄດ້ສອນວ່າ ຊາຕານ ມີອຳນາດເໜືອເຮົາ ພຽງແຕ່ເມື່ອເຮົາຍອມຕໍ່ມັນເທົ່ານັ້ນ.3
ໃນການເຫັນວັນເວລາຂອງເຮົາ, ນີໄຟ “ໄດ້ເຫັນອຳນາດຂອງພຣະເມສານ້ອຍຂອງພຣະເຈົ້າ ລົງມາເທິງໄພ່ພົນຂອງສາດສະໜາຈັກຂອງພຣະເມສານ້ອຍ, ແລະ ຜູ້ຄົນແຫ່ງພັນທະສັນຍາຂອງພຣະຜູ້ເປັນເຈົ້າ, ຊຶ່ງກະຈັດກະຈາຍໄປຕາມຜືນແຜ່ນດິນໂລກ; ແລະ ພວກເຂົາມີອາວຸດຄືຄວາມຊອບທຳ ພ້ອມກັບອຳນາດຂອງພຣະເຈົ້າໃນລັດສະໝີພາບອັນຍິ່ງໃຫຍ່” (1 ນີໄຟ 14:14; ເນັ້ນຄຳເນີ້ງ).
ເຮົາຈະມີອາວຸດຄືຄວາມຊອບທຳ ແລະ ອຳນາດໄດ້ແນວໃດ? ເຮົາຮັກສາວັນຊະບາໂຕໃຫ້ສັກສິດ ແລະ ໃຫ້ກຽດແກ່ຖານະປະໂລຫິດ. ເຮົາເຮັດ ແລະ ຮັກສາພັນທະສັນຍາທີ່ສັກສິດ, ເຮັດວຽກງານສືບປະຫວັດຄອບຄົວຂອງເຮົາ, ແລະ ໄປພຣະວິຫານ. ເຮົາພະຍາຍາມສະເໝີທີ່ຈະກັບໃຈ ແລະ ອ້ອນວອນຕໍ່ພຣະຜູ້ເປັນເຈົ້າ ທີ່ຈະ “ໃຊ້ໂລຫິດທີ່ຊົດໃຊ້ຂອງພຣະຄຣິດ ເພື່ອພວກຂ້ານ້ອຍຈະໄດ້ຮັບການໃຫ້ອະໄພຈາກບາບຂອງພວກຂ້ານ້ອຍ” (ໂມໄຊຢາ 4:2). ເຮົາອະທິຖານ ແລະ ຮັບໃຊ້ ແລະ ເປັນພະຍານ ແລະ ໃຊ້ສັດທາໃນພຣະເຢຊູຄຣິດ.
ເຮົາກໍມີອາວຸດຄືຄວາມຊອບທຳ ແລະ ອຳນາດນຳອີກ ເມື່ອເຮົາສະສົມຖ້ອຍຄຳແຫ່ງຊີວິດໄວ້ໃນຈິດໃຈຂອງເຮົາເລື້ອຍໄປ (ເບິ່ງ D&C 84:85). ເຮົາສະສົມຖ້ອຍຄຳເຫລົ່ານັ້ນ ໂດຍການສຶກສາພຣະຄຳພີທີ່ສັກສິດ ແລະ ຖ້ອຍຄຳຂອງຜູ້ຮັບໃຊ້ທີ່ຖືກເລືອກໄວ້ຂອງພຣະຜູ້ເປັນເຈົ້າ, ຜູ້ທີ່ຈະບອກເຖິງພຣະປະສົງຂອງພຣະອົງ, ຄວາມຄິດ, ແລະ ສຸລະສຽງຂອງພຣະອົງ (ເບິ່ງ D&C 68:4) ໃນລະຫວ່າງກອງປະຊຸມໃຫຍ່ສາມັນ ໃນເດືອນໜ້ານີ້.
ໃນການສູ້ຮົບຕໍ່ຕ້ານກັບຄວາມຊົ່ວຮ້າຍຂອງເຮົານັ້ນ, ເຮົາຕ້ອງຈື່ຈຳສະເໝີວ່າ ເຮົາມີກຳລັງຊ່ວຍເຫລືອ ທັງຢູ່ໃນໂລກນີ້ ແລະ ຈາກສະຫວັນ. ພັນທະມິດຂອງເຮົາແມ່ນຮ່ວມດ້ວຍ ພຣະເຈົ້າ ພຣະບິດານິລັນດອນ, ອົງພຣະເຢຊູຄຣິດເຈົ້າ, ແລະ ພຣະວິນຍານບໍລິສຸດ.
ພັນທະມິດຂອງເຮົາ ກໍຍັງຮ່ວມດ້ວຍກອງທັບຂອງສະຫວັນທີ່ຕາຫລຽວບໍ່ເຫັນນຳອີກ. “ບໍ່ຕ້ອງຢ້ານ,” ເອລີຊາ ໄດ້ບອກຊາຍໜຸ່ມທີ່ຢ້ານກົວ ໃນຂະນະທີ່ເຂົາເຈົ້າກຳລັງປະເຊີນໜ້າກັບກອງທັບແຫ່ງຄວາມຊົ່ວຮ້າຍວ່າ, “ຝ່າຍຂອງພວກເຮົາ ມີຫລາຍກວ່າຝ່າຍຂອງພວກເຂົາ” (ເບິ່ງ 2 ກະສັດ 6:15 16).
ເຮົາບໍ່ຕ້ອງຢ້ານ. ພຣະເຈົ້າຮັກໄພ່ພົນຂອງພຣະອົງ. ພຣະອົງຈະບໍ່ມີວັນປະຖິ້ມເຮົາ.
ຂ້າພະເຈົ້າຮູ້ວ່າ ໃນການຕອບຄຳອະທິຖານ, ພຣະເຈົ້າໄດ້ຕອບຄຳອ້ອນວອນຂອງຂ້າພະເຈົ້າ ເພື່ອປົດປ່ອຍຂ້າພະເຈົ້າຈາກຄວາມຊົ່ວຮ້າຍນັ້ນ. ຂ້າພະເຈົ້າເປັນພະຍານວ່າ ດ້ວຍຄວາມຊ່ວຍເຫລືອຂອງພຣະເຈົ້າອົງເປັນພຣະບິດາ, ພຣະຜູ້ຊ່ວຍໃຫ້ລອດຂອງໂລກ, ແລະ ພຣະວິນຍານບໍລິສຸດ, ເຮົາສາມາດແນ່ໃຈໄດ້ວ່າ ເຮົາຈະໄດ້ຮັບພະລັງທີ່ເກີນກວ່າເຮົາຕ້ອງການ ເພື່ອຕ້ານທານກັບພະລັງຂອງຄວາມຊົ່ວຮ້າຍ ທີ່ເຮົາປະເຊີນ.
ຂໍໃຫ້ເຮົາຈົ່ງມີອາວຸດຄືຄວາມຊອບທຳ ເພື່ອວ່າເຮົາຈະສາມາດໝັ້ນໃຈໄດ້ ໃນໄຊຊະນະທີ່ສູງສຸດ.
©2017 ໂດຍ Intellectual Reserve, Inc. ສະຫງວນລິຂະສິດທຸກປະການ. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/16. ການແປໄດ້ຮັບອະນຸຍາດ: 6/16. ແປຈາກ First Presidency Message, March 2017. Laotian. 97923 331