President a Odzi Kan na n’Apamfo Amandzɛɛbɔ, Ebɔw 2017

Yɛdze Ndzeyɛtsenenee ayɛ Akontar

President Henry B. Eyring ne kasaa

Ɔpamfo a Odzi Kan wɔ President a Odzi Kan na n’Apamfo mu

Nyankopɔn No nkɔnhyɛnyi a ɔwɔ asaase do ndɛ yi, President Thomas S. Monson apaamu akã dɛ, Ndɛ, bɔn akɛse, dza omuo na ndzeyɛɛkyew ahyehyɛ abɔ hɛn ntoa wɔ hɛn enyim a ne nsaso mbaa pɛn¹

Ana ɔbɛyɛ wo nwanwa dɛ President Monson kãa dɛm nsɛm yinom no mfe 50 abasen kɔ a? Sɛ dɛm mber no abasen no mpo nna emumuyɛdze a ɔmmbaa da na wɔahyehyɛ etsĩa hɛn a, nna ndɛ bɔn mbordo bɛn na ohunãhunã hɛn? Siantsir pa ntsi, Ewuradze apaa mu akã afa hɛn mberano yi ho dɛ, “Hwɛ, ɔtamfo no ayɛ kor” (N&A 38:12).

Ɔkõ no a “hɛn nyina yɛkã ho no”² hyɛɛ ase ansaana wɔrowo hɛn aba asaase do. Ɔhyɛɛ ase mpo ana wɔrobɔ asaase no. Ɔhyɛɛ ase mfe ɔpepeepe a abasen no wɔ asetsena a ansaana yɛreba wiadze no, bea a Satan tseew etua no na “ɔpɛɛ dɛ ɔsɛɛ nyimpa ne pɛ” (Moses 4:3).

Satan dzii nkõgu wɔ dɛm ɔkõ no mu na “wɔtoow no kyeen asaase” (Nyikyerɛ 12:9) bea a ndɛ ɔtoa no kõ no do. Asaase yi do no “ɔnye Nyankopɔn n’ahotseweefo no kõe, na otwaa hɔn ho hyiae” (N&A 76:29) a ɔdze ator, ndaadaa, na nsɔhwɛ.

Ɔkõ tsĩa nkɔnhyɛfo na asomafo. Ɔkõ tsĩa ahosie ho mbra na awar n’ahotsew ho. Ɔkõ tsĩa ebusua na temple no. Ɔkõ tsĩa dza oye, ɔyɛ krɔnkrɔn, na dza ɔsɛ enyidzi.

Yebesi dɛn nye otsĩafo a ɔtse dɛm akõ? Yebesi dɛn nye bɔn a ɔyɛ dɛ ma ɔremen hɛn wiadze yi akõ? Hɛn akontar nye ebɛnadze? Woananom na wɔwɔ hɛn afã?

Eguambaa no no Tum

Joseph Smith Nkɔnhyɛnyi no kyerɛkyerɛɛ dɛ kwan dodow a yɛdze ma Abɔnsam no na odua do nya hɛn do tum.³

Ɔrohwɛ hɛn da yi no Nephi, “hun Nyame Eguambaa no no tum, dɛ oesian aba Eguambaa no n’asɔrmba a wɔyɛ ahotseweefo no do, nye Ewuradze n’ahyɛmu mba no a wɔapetse wɔ asaase nyinara enyi no do; na wɔdze ndzeyɛtsenenee na enyimnyam nye Nyankopɔn no tum kɛse ayɛ akontar (1 Nephi 14:14; woetsĩmu akã ho).

Yesi dɛn fa ndzeyɛtsenenee na tum dze yɛ hɛn akontar? Yesie Ahomgyeda no krɔnkrɔn na yedzi asɔfodzi no nyi. Yɛyɛ ahyɛmu krɔnkrɔn na yedzi do, yɛyɛ hɛn ebusua abakɔsɛm ho ndwuma, na yɛkɔ temple. Yɛper dɛ daa yebonu hɛnho na yɛatotɔ aserɛ Ewuradze “ma Christ no werdam bɔgyaa no nyɛ edwuma mma yenya bɔnfakyɛ” (Mosiah 4:2). Yɛbɔ mpaa na yɛsom na yɛdze gyedzi wɔ Jesus Christ mu dzi dwuma.

Yɛdze ndzeyɛtsenenee na tum so yɛ hɛn akontar ber a [yɛ]kora nkwa nsɛm wɔ [hɛn] adwen mu aber nyina” (N&A 84:85). Yɛkora dɛm nsɛm no do ber a yɛdze hɛnho hyɛ kyerɛwsɛm krɔnkrɔn no nye Ewuradze N’asomfo a Ɔasan mu eyi no hɔn nsɛm mu, hɔn na wɔbɛkyɛ Ne pɛ, N’adwen, na Ne ndze (hwɛ N&A 68:4) wɔ wiadze mfɛndzanan ehyiadzi ber mu wɔ bosoom a odzi do yi.

Ɔkõ a yɛdze ritsĩa bɔn no, otwar dɛ daa yɛkaa dɛ yɛwɔ mboa a ofi ntwamutam n’afã ebien nyina. Nyankopɔn, Onnyiewiei Egya, Ewuradze Jesus Christ, na Sunsum Krɔnkrɔn no kã hɔn a wɔwɔ hɛn afã ho.

Ɔsorsor dɔm kuw a enyi nntum nnhu hɔn no so wɔ hɛn afã. Elisha see aberantsɛ a n’akoma etu no ber a wohyiaa nsordaafo abɔnfo no dɛ, “Mma nnsuro, osiandɛ hɔn a wɔkã hɛn ho no dɔɔ sõ sen hɔn a wɔkã hɔn ho no” (hwɛ 2 Ahemfo 6:15–16).

Onnyi dɛ yesuro. Nyankopɔn dɔ N’Ahotseweefo. Orinngyaa hɛn ekyir dzi da.

Minyim dɛ Nyankopɔn, edua mpaabɔ ne nyiano do, Ɔahyɛ mo ntotɔserɛ mã dɛ Ɔbɛgye me efi ɔbɔnfo nsa. Megye dase dɛ yɛdze Nyame Egya, wiadze no n’Agyenkwa no, na Sunsum Krɔnkrɔn hɔn mboa no, yebotum enya enyidado dɛ wɔbɛma hɛn tum a ɔsõ ara yie ma yɛdze egyina abɔnfo dɔm biara a yehyia hɔn no ano

Nkyɛ wɔmma daa yɛmfa ndzeyɛtsenenee nyɛ akontar ama yeetum eenya awerɛhyɛmu wɔ konyimdzi a ɔbɛba no mu.