Klumech er a First Presidency, Ongedei el buil 2017

Bleiull er a Llemalt

Mla er a President Henry B. Eyring

Kot el Counselor er a First Presidency

A profet er a Dios el nga er a beluulechad, el President Thomas S. Monson, a mla melekoi el kmo, “Chelechal taem, e kid a ulsiseb er a chelsel a kot el mesisiich el mekngit, cheleblad, me a klengit el di iliuekl er medad.”¹

Ng locha mo mechas a rengmiu el mo medengei el kmo a President Monson a millekoi a ika el tekoi er a okeim el rak er a memong? Alsekum e ke de mle ulsiseb er a chelsel a mesisiich el mekngit e risei el taem, e ng locha lmuut el kmal mesisiich a klisichel a diablong er chelechal sils? Ng mla er ngii a ungil el uchul, e a Rubak a millekoi el kirel chelechal taem er kid el kmo, “Ng mla, mo uldekdak a mekngit” (D&C 38:12).

A mekemad el kid el “rokui a ulecherangel er a chelsel”² a ulemuchel ruchei er a demechell el mei er a beluulechad. Ng dirrek el ulemuchel ruchei er a blebelel a beluulechad. Ng ulemuchel er a chelsel a betok el rak er a memong er sel klengar ruchei, el Diablong a mlo omtok e “ulsiik el mo melemall er sel lemeltel a chad el melilt” (Moses 4:3).

A Diablong a mlo mechitechut er tial mekemad me ng “mlo dik e tuobed el mei er a beluulechad” (Ocholt 12:9), e melemolem er a mekemedil el me el muut er chelechal sils. Me chelechal le nga er a beluulechad “e ng oumekemad er a resanto er a Dios, e mengesuseu er tir lolab a” (D&C 76:29) blulak, cheleuid, me a ongetikaik.

Ng omtok er a reprofet me a reapostol. Ng omtok el kirel a llach er a klikiid er a tekoi er a deleboes me a chedolel a chebechiil. Ng omtok a telungalek me a templo. Ng omtok er sel ngii a ungil, chedaol, e cheledaol.

Me ng mekera doumekemad el kirel tia el teletael? Ng mekera doumekemad el kirel a mekngit el ngii a mla mo chemolt el di roureur a beluulechad? Ngera sel mo sebechekled? Te rengera mo mesebechakl er kid?

Sel Klisichel a Ngelekel a Dios

A Profet Joseph Smith a ulisechakl el kmo a Diablong a ngar ngii a klisichel er kid alsekum e ke de mecherei me ngengelakl er sel ngii a ultekelel a klisichel er kid.³

“Ma Nephi a milsang a klisichel a Ngelekel a Sib er a Dios, el mle metengel er a resanto er a ikelesia er a Ngelekel a Sib, me a rolab a telbiil el chedal a Rubak, el tir a mle berriid er a beluulechad; te mle bleiull er a llemalt me a klisichel a Dios el ngarbab el klebkall.” (1 Nephi 14:14; smisichii a belkul).

Ke de mekera e mo bleiull er a llemalt me a klisiich? Ke de kullii a Chedaol sils e mengull er a priesthood. Ke de remuul e oltirakl a chedaol telbiil, e oureor el kirel a reksi er a telungalek er kid, e omais el mo er a templo. Ke de melasm el melemolem el ouchel a rengud er a kngtid e olengit er a Rubak me le “beskid a tngakireng er a rsechel a Kristo me luchul e bo dengai a klausubes el kirel a kngtid” (Mosiah 4:2). Ke de meluluuch e mesiou e ouchais e melisiich a klaumera er kid er a Jesus Kristo.

Ke de dirrek el mo bleiull er a llemalt me a klisiich sel “dolemolem lomekeek a uldesued er a ungil tekoi er a klengar” (D&C 84:85). Ke de mo urrekodel a ika el ungil tekoi sel donguiu chedaol llechukl me a tekingir a re mla mengilt el mesiungel a Rubak, el tir a mo ouchais a ikel nga er a rengul, uldesuel, me a ngerel (mesa D&C 68:4) er tial merael mei el buil er a temel a klou el ongdibel.

Me a chelsel tial mekemedid lobengkel a mekngit, e ng kired el mo medengei el kmo ngar ngii a ngeso el dengai er a ikal eru el beluulechad. A re mo mesebechakl er kid a ngar ngii a Dios el Diak a Ulebengelel Chedam, me a Rubak el Jesus Kristo, me a Chedaol Reng.

A dirrek el uldimukl er tir a tirkel diak desterir el soldau er a babeluades. “Lak ko medakt,” A Elisha dilu er a medekta el ngeasek el chad er a lesterir a resoldau er a mekngit, “le tirkel lobengked a lmuut el betok er tirkel lobengterir” (mesa 2 Kings 6:15–16).

Ng diak el kired el medakt. A Dios a betik a rengul er a Resanto er Ngii. Ngii a kmal diak bo lechitid.

Ngokiu a nger er a nglunguchek, e ak medengei el kmo a Dios, a mla onger ongtik el choridak er a mkengit. A kuchais el kmo ngultuil er a ngeso er a Dios el Chedam, me a Osobelel a beluulechad, me a Chedaol Reng, e ng sebeched el mo mui el medengei el kmo ke de mo nguu a lmuut el ngarbab el klisiich el mo odngakl a ngii di el mekngit el bo dechebangel.

Bo de blechoel bleiull er a llemalt me luchul e bo le klou a rengud el kmo ke de mo kats.

© 2017 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/16. Kengei er a oidel: 6/16. Oidel a First Presidency Message, March 2017. Palauan. 97923 881