Cov Mus Saib Xyuas Tom Tsev tsab Xov, Peb Hlis Ntuj 2017
Lub Hwj Chim ntawm Yexus Khetos thiab Nws txoj Kev Theej Txhoj
Ua tib zoo thov Vajtswv kawm tej yam no thiab nrhiav kev tshoov siab seb koj yuav tsum qhia dab tsi. Qhov uas Vajtswv cov ntxhais to taub lub hom phiaj ntawm lub Koom Haum Niam Tsev yuav npaj lawv li cas kom txais tau cov koob hmoov ntawm txoj sia nyob mus ib txhis?
Kev Ntseeg, Tsev Neeg, Kev Pab
“Vim Yexus Khetos txhawb kuv lub zog, kuv thiaj tiv taus txhua tsav yam huv tib si” (Filipis 4:13). Thawj Tswj Hwm Dieter F. Uchtdorf, tus Pab Cuam thib Ob hauv Thawj Pawg Thawj Tswj Hwm hais tias,“Txawm peb txhua tus muaj tej kev qaug zog, peb kov yeej tau tej ntawd.” “Muaj tseeb tiag dhau los ntawm Vajtswv txoj kev tshav ntuj, yog peb txo hwj chim thiab muaj kev ntseeg, tej yam qaug zog yuav hloov los ua tej yam uas muaj zog.”1
Nyob hauv phau Lus Qhuab Qhia thiab Kev Khi Lus tus Cawm Seej hais tias Nws yuav mus ua peb ntej. Nws yuav nyob ntawm peb sab xis thiab ntawm peb sab laug, thiab Nws tus Ntsuj Plig yuav nyob hauv peb lub siab, thiab Nws cov tim tswv saum ntuj yuav nyob ib ncig ntawm peb, kom thiaj txhawb nqa tau peb (Q&K 84:88).
Txwj Laug David A. Bednar ntawm Pawg Kaum Ob tug Thwj Tim hais tias, “Nifais coj yam ntxwv txog ib tug uas paub, to taub, thiab tso siab rau tus Cawm Seej lub hwj chim. Nifais cov tij laug tau muab txoj hlua khi nws thiab xav muab nws tua tuag. Cia li mloog Nifais tej lus qhov hais tias, ‘Au tus Tswv, raws nraim li kuv txoj kev ntseeg uas muaj nyob hauv koj, thov koj cawm kom kuv dim ntawm kov cov tij laug tes; muaj tseeb tiag, ib yam li muab lub zog rau kuv xwv kom kuv yuav tu tau cov hlua uas khi kuv lawm’ (1 Nifais 7:17; ntxiv qhov uas ntawv qaij).
“… Nifais tsis tau thov kom hloov tej xwm txheej uas nws raug. Tiam sis, nws thov kom nws muaj zog hloov tej xwm txheej uas nws raug. Thiab kuv ntseeg tias nws thov li no vim nws paub, to taub thiab tau txais lub hwj chim ntawm txoj Kev Theej Txhoj.
“Kuv tsis xav tias cov hlua uas khi Nifais cia li xoob thiab poob ntawm txhais tes thiab dab teg. Tiam sis, kuv xav tias nws tau koob hmoov kom muaj zog thiab muaj kev rau siab tshaj nws ib txwm muaj kom nws thiaj li muaj ‘tus Tswv lub zog’ (Mauxiyas 9:17) thaum nws rub ntswj cov hlua mus txog thaum nws muaj zog txaus tu cov hlua.”2
Vaj Lug Kub thiab tej Ntaub Ntawv Xov Xwm Ntxiv
© 2017 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Akiv: 6/16. Pub txhais ua lus Hmoob: 6/16. Kev txhais Visiting Teaching Message, March 2017. Hmong. 97923 295