Thawj Pawg Thawj Tswj Hwm tsab Xov, Peb Hlis Ntuj 2017
Muab txoj Kev Ncaj Ncees Los Ua Ntaj Riam
Los ntawm Thawj Tswj Hwm Henry B. Eyring
Tus Pab Cuam thib Ib hauv Thawj Pawg Thawj Tswj Hwm
Vajtswv tus yaj saub nyob hauv lub ntiaj teb no Thawj Tswj Hwm Thomas S. Monson, tau tshaj tawm hais tias, “Hnub no, peb tawm tsam kev txhaum, thiab kev phem kev qias loj tshaj peb ib txwm pom dhau los.”1
Nej puas xav tsis thoob yog nej kawm tias Thawj Tswj Hwm Monson tau hais cov lus no 50 xyoo tas los Yog tias peb tawm tsam kev phem kev qias loj tag npaud thaum ntawd ces, muaj kev phem kev qias ntxiv npaum li cas niaj hnub no? Tsim nyog uas tus Tswv tau hais txog peb lub caij nyoog hais tias cov yeeb ncuab yeej koom ua ke tawm tsam peb (Q&K 38:12).
Kev tsov kev rog uas peb sawv daws ntaus tam sim no2 yeej pib ua ntej peb yug los rau hauv lub ntiaj teb no. Kev tsov rog no pib ua ntej ntuj tsim teb raug. Kev ua tsov ua rog no pib puag thaum ub nyob hauv lub neej ua ntej lub neej no, es nyob ntawd Dab Ntxwg Nyoog ntxeev siab thiab xav rhuav tib neeg txoj kev ywj siab xaiv (Mauxes 4:3).
Dab Ntxwg Nyoog swb lawm thiab raug “pov rau hauv ntiaj teb” (Tshwm Sim 12:9), es nyob no nws tseem tawm tsam peb niaj hnub no. Nyob hauv lub ntiaj teb no nws ua tsov ua rog tawm tsam Vajtswv haiv neeg ntseeg, thiab nyob ib puag ncig lawv (Q&K 76:29) nrog nws txoj kev dag kev ntxias.
Nws tawm tsam cov yaj saub thiab cov thwj tim. Nws tawm tsam kev cai coj dawb huv thiab kev sib yuav. Nws tawm tsam tsev neeg thiab lub tuam tsev. Nws tawm tsam tej yam uas zoo, dawb huv, thiab dawb ceev.
Peb yuav ua li cas kom tawm tsam ib tug yeeb ncuab zoo li no? Peb yuav ua li cas kom tawm tsam kev phem uas tab tom kov yeej peb lub ntiaj teb? Peb cov ris tsho ua rog yog dab tsi? Leej twg tuaj peb tog?
Tus Me Nyuam Yaj lub Hwj Chim
Tus Yaj Saub Yauxej Xamiv qhia tias Dab Ntxwg Nyoog muaj hwj chim kov yeej peb tsuas yog peb cia nws ua li ntawd xwb.3
Thaum Nifais pom peb lub caij nyoog nws, “tau pom Vajtswv tus Me Nyuam Yaj lub hwj chim, [lub hwj chim ntawd] tau nqis los rau saum cov ntseeg ntawm tus Me Nyuam Yaj lub koom txoos, thiab tau nqis los rau saum tus Tswv cov neeg uas tau khi lus tseg, cov uas tau tawg ri niab mus thoob plaws hauv lub qab ntuj no; thiab lawv tau muab txoj kev ncaj ncees los ua ntaj riam thaiv lawv thiab nrog rau Vajtswv lub hwj chim uas muaj yeeb koob heev” (1 Nifais 14:14; ntxiv qhov uas ntawv qaij).
Peb yuav ua li cas kom muab txoj kev ncaj ncees thiab lub hwj chim ua ntaj riam thaiv peb? Peb hwm Hnub Caiv kom dawb huv thiab saib lub pov thawj hwj rau nqi. Peb ua kev khi lus dawb ceev, nrhiav peb tsev neeg zaj keeb kwm, thiab mus rau lub tuam tsev. Peb yeej meem hloov siab lees txim thiab thov tus Tswv kom “muab Khetos cov ntshav theej txhoj xwv kom peb yuav tau txais txoj kev zam txim rau peb tej kev txhaum” (Mauxiyas 4:2). Peb thov Vajtswv thiab pab lwm tus thiab ua tim khawv thiab siv peb txoj kev ntseeg Yexus Khetos.
Peb kuj muab kev ncaj ncees thiab lub hwj chim ua ntaj riam thaum peb xav txog tej lus uas cawm neeg txoj sia tsis tu tsis tseg (Q&K 84:85). Peb xav txog tej lus ntawd thaum peb nyeem cov vaj lug kub dawb huv thiab tus Tswv cov tub qhe tej lus, uas hais raws li Nws lub siab nyiam, lub siab xav, thiab lub suab hais (saib Q&K 68:4) hauv lub tuam rooj sab laj lub hlis tom ntej no.
Thaum peb ua rog tawm tsam kev phem, peb yuav tsum nco ntsoov tias peb muaj kev pab nyob no thiab nyob ntawm sab ntsuj plig thiab. Peb cov phooj ywg yog Vajtswv Leej Txiv Nyob Mus Ib Txhis, tus Tswv Yexus Khetos, thiab tus Vaj Ntsuj Plig Dawb Huv.
Peb cov phooj ywg kuj yog cov tim tswv uas peb tsis pom. Elisas tau qhia ib tug tub hluas uas txaus ntshai thaum nkawd yuav tawm tsam ib pawg tub rog phem hais tias, “Tsis txhob ntshai. Peb tog muaj coob dua lawv tog” (saib 2 Vaj Ntxwv 6:15–16).
Peb tsis tas ntshai. Vajtswv hlub Nws ib Tsoom Haiv Neeg Ntseeg. Nws yeej yuav tsis tso peb tseg.
Kuv paub tias Vajtswv, tau teb kuv tej lus thov, kom pab kuv dim kev phem. Kuv ua tim khawv tias yog muaj Vajtswv Leej Txiv, tus Cawm Seej, thiab tus Vaj Ntsuj Plig Dawb Huv txoj kev pab, peb paub tseeb tias peb yuav muaj hwj chim txaus sawv ruaj khov kho txawm kev phem tawm tsam peb npaum li cas los xij.
Thov kom peb yuav coj ncaj ncees peb thiaj yuav paub tias peb yuav kov yeej thaum kawg.
© 2017 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Akiv: 6/16. Pub txhais ua lus Hmoob: 6/16. Kev txhais First Presidency Message, March 2017. Hmong. 97923 295