Mensahe ti Umuna a Panguluen, Mayo 2017
Ti Naan-anay nga Ayat ti Mangpaksiat iti Butengtayo
Ni Presidente Dieter F. Uchtdorf
Maikadua a Mammagbaga iti Umuna a Panguluen
Iwaksitayo koma dagiti butengtayo ket agbiagtayo nga addaan rag-o, pakumbaba, ken natured a panagtalek nga adda kadatayo ti Apo.
Patpatgek a kakabsatko, ay-ayatek a gagayyem, anian a pribilehio ken rag-o ti panaguummong kas sangalubongan a Simbaan a nagkaykaysa iti pammatitayo ken ayat para iti Dios ken kadagiti annakna.
Naipangpangruna nga agyamanak iti kaadda ti patpatgentayo a propeta, ni Thomas S. Monson. President, kanayonto nga ipapusomi dagiti balikasmo maipapan ti panangiturong, balakad, ken pagsiriban. Ay-ayatendaka, President Monson, ket kanayon nga ikarkararagandaka.
Kadagitii napalabas a tawen, idi agserserbiak a stake president iti Frankfurt, Germany, inasitgannak ti maysa a maipatpateg ngem naliday a kabsat a babai iti gibus ti maysa kadagiti mitingmi iti stake.
“Saan kadi a makapadismaya?” kinunana. “Mabalin nga adda uppat wenno lima a tattao ti matmaturog kabayatan ti panagsaritam!”
Nagpanunotak iti apagkanito ket insungbatko, “Masiguradok a ti panagturog iti Simbaan ti makapasalun-at a turog iti amin a pannaturog.”
Nangngeg ti ay-ayatek nga asawak, ni Harriet, daytoy a panagsaritami ket kinunana a daytoy ti maysa kadagiti kapintasan a sungbat a naitedkon.
Ti Naindaklan a Pannakariing
Sumagmamano a ginasgasut a tawen ti napalabas iti North America, maysa a tignay a maawagan iti “Great Awakening” [Dakkel a Pannakariing] a nagsaknap iti pagilian. Maysa kadagiti umuna a panggepna ket mangriing kadagiti tao a kasla matmaturog no maipapan kadagiti banag a naespirituan.
Naimpluensiaan ni ubing a Joseph Smith kadagiti banag a nangngeganna kadagiti agikaskasaba a paset daytoy a panagriing a mainaig iti relihion. Maysa kadagiti gapu no apay nga inkeddengna ti agkararag nga agmaymaysa tapno sipapasnek a gun-odenna ti pagayatan ti Apo.
Dagitoy nga agikaskasaba ket naindramaan, napnuan emosion ti estilo ti panagikasabada, a maam-ammo dagiti panangisuroda gapu iti nalaus a panangyunay-unayda kadagiti bumegbeggang nga impierno nga agur-uray iti managbasol.1 Saan a nangpaturog kadagiti tao dagiti panagsaritada—ngem mabalin a nagtagtagainepanda iti dakes. Kasla pangbutbuteng kadagiti tao ti panggep ken wagasda a mangpilit kadagiti tao a kumappeng iti simbaan.
Pammutbuteng kas Panagmanipula
Idi pay laeng, a masansan a mausar ti pammutbuteng kas maysa nga tapno mapilit dagiti tao nga aggunay. Inusar daytoy dagiti nagannak kadagiti annakda, dagiti amo kadagiti empleadoda, ken dagiti politiko kadagiti botanteda.
Ammo dagiti eksperto iti marketing nga epektibo ti pammutbuteng ket masansan a mausar daytoy. Daytoy ti gapu no apay kasla isingsingasing ti sumagmamano nga advertisement a no ditayo gumatang iti breakfast cerealda wenno ti kabaruan a video game wenno cell phone, mabalin a nakaay-ay-ay ti panagbiagtayo, matay nga agmaymaysa ken naladingit.
Katawaantayo daytoy ket panunotentayo a ditayo mapapati iti kasta a panagmanipula, ngem no dadduma ar-aramidentayo. Pagdaksanna, no dadduma usarentayo dagiti isu met la a wagas tapno mapilit dagiti dadduma nga aramiden ti kayattayo.
Adda dua a panggep ti mensahek ita: Ti umuna ket guyugoyennatayo a mangutob ken mangpanunot no sadino ti pagpatinggaan ti panangusartayo iti pammutbuteng a mangguyugoy kadagiti dadduma—agraman dagiti bagbagitayo. Ti maikadua ket mangisingasing iti nasaysayaat a wagas.
Ti Dakes a Gapuanan ti Buteng
Umuna, pagsasaritaantayo ti dakes a gapuanan ti buteng. Asino kadi kadatayo ti saan pay pulos a napilit gapu iti buteng tapno mangan a nasayaat, agusar iti seat belt, agwatwat, agurnong iti kuarta, wenno agbabawi iti basol?
Pudno nga adda nabileg nga impluensia ti buteng kadagiti tignay ken ugalitayo. Ngem saan nga agpaut ken narabaw laeng dayta nga impluensia. Manmano nga adda bileg ti buteng a mangbalbaliw kadagiti pusotayo, ken saan a pulos a mangbalbaliw kadatayo nga agbalin a tattao a mangipateg no ania ti umno ken no asino ti aggusto nga agtungpal iti Nailangitan nga Ama.
Mabalin a sawen ken aramiden dagiti tao a managbutbuteng dagiti umno a banag, ngem dida marikna dagiti umno a banag. Masansan a mariknada nga awan maaramidda ken agbabbabawi, ken makagurada. Iti agangay agbalin dagitoy a rikna iti panagduadua, pammasakit, ken panagalsa.
Daksanggasat a saan a limitado iti sekular a lubong daytoy saan a makaiturong a wagas iti panagbiag ken panangidaulo. Malidayanak a makadamag ti maipapan dagiti miembro ti Simbaan nga agaramid iti saan a nalinteg a panangituray—kadagiti man pagtaenganda, kadagiti awagda iti Simbaan, iti trabahoda, wenno iti inaldaw a pannakipulapolda kadagiti dadduma.
Masansan, a dillawen dagiti tao dagiti mangparparigat iti dadduma, ngem dida makita nga isuda mismo ti agar-aramid iti kastoy. Kayatda nga ipilit nga ipatungpal dagiti bukodda nga annuroten iti turay, ta no saan a suroten dagiti tao dagitoy nga annuroten, pagsawsaw-anda ida, pasakitanda iti nakemda, ken no dadduma dangranda no dadduma tibagida.
Kinuna ti Apo a “no datayo ket … mangtimbeng wenno mangituray wenno mangpilit kadagiti kararua dagiti annak ti tattao, iti ania man a kinadagsen ti kinikillo,, … adaywan ida ti langit {ken} maldaangan ti Espiritu ti Apo.”2
Mabalin nga adda dagiti kanito a masulisogtayo ketikalintegan dagiti tignaytayo babaen ti panamati nga ania man a tignay ket maawat no la ketdi ti panggepda ket manggun-od iti nasayaat a resulta. Mabalin nga ipagaruptayo a no pengdantayo dagiti dadduma, manipulaen, ken kapungtottayo ida ket pagsayaatandanto. Madi daytoy, gapu ta inlawlawag ti Apo a “ti bunga ti Espiritu ket ayat, rag-o, talna, naunday a panangitured, kinadungngo, kinaimbag, pammati, kinaemma, [ken] kinamanagteppel.”3
Maysa a Nasaysayaat a Wagas
Iti ad-adda pay a pannakaammok iti Nailangatan nga Amak, ad-adda met a makitak no kasano a paregtaen ken iturongna dagiti annakna. Saan a makagura, ken managibales.4 Ti mismo a panggepna—ti aramidna ken gloriana—ket tapno suruannatayo, itan-oknatayo, ken iturongnatayo iti kina-an-anayna.5
Inlawlawag ti Dios ti Bagina ken ni Moises kas “manangngaasi ken managparabur, nainnayad nga agpungtot, ken aglaplapusanan iti kinaimbag ken kinapudno.”6
Ti ayat ti Amatayo iti Langit para kadatayo, nga annakna, ket nangnangruna pay ngem iti kabaelantayo a maawatan.7
Kayat kadi a sawen daytoy nga ilunod wenno baybay-an ti Dios dagiti ugali a maisuppiat kadagiti bilinna? Saan, saan iti kaano man!
Ngem kayatna nga ad-adda pay a balbaliwan saan laeng a dagiti ugalitayo. Kayatna a balbaliwan dagiti mismo a kinataotayo. Kayatna a balbaliwan dagiti puspusotayo.
Kayatna nga agkagumaantayo ken kumpettayo a naimbag iti landok a pagkaptan, sanguentayo ti buteng ken natured nga umaddang nga agpasango ken agpangato nga agturong iti nailet ken akikid a dalan. Kayatna daytoy para kadatayo gapu ta ay-ayatennatayo ken gapu ta daytoy ti dalan nga agturong iti kinaragsak.
No kasta, kasano a guyugoyen ti Dios dagiti annakna a sumurot Kenkuana iti panawentayo?
Imbaon ti Dios ti Anakna!
Imbaon ti Dios ti Bugbugtong nga Anakna, ni Jesucristo, tapno ipakita kadatayo ti umno a wagas.
Paregtaennatayo ti Apo babaen ti panangguyugoy, naunday a panagitured, kinaanus ken kinaemma, ken ti di managinkukuna nga ayat.8 Adda ti Dios iti sibaytayo. Ay-ayatennatayo, ket no maitublaktayo, kayatna a bumangontayo, padasen manen, ket agbalin a natibtibker.
Isu ti mangisuro kadatayo.
Isu ti naindaklan ken napateg a namnamatayo.
Tarigagayanna a mangallukoy kadatayo iti pammati.
Agtalek kadatayo a makasursuro manipud kadagiti bidduttayo ken agaramid kadagiti umno a pili.
Daytoy ti nasaysayaat a wagas!9
Ania dagiti Dakes ti Lubong?
Maysa kadagiti wagas a kayat ni Satanas a pangmanipulatayo kadagiti dadduma ket ti panangitalimudok ken panangpasaknap iti kinadakes iti lubong.
Awanen ti panagduadua a kanayonen a saan a perpekto ti lubong, idi pay laeng, ken ita, ken agtultuloyto latta. Adu dagiti inosente a tao a nagsagaba gapu kadagiti pasamak ti nakaparsuaan kasta met iti panagranggas ti tao. Ti kinadangkes ken kinatiri iti panawentayo ket naidaddaduma ken nakaam-amak.
Ngem iti baet ti amin kadagitoy, diak isukat ti panagbiagko iti daytoy a panawen iti ania man a sabali pay a panawen iti pakasaritaan ti lubong. Naparaburantayo iti nakalablabon tapno agbiagtayo iti maysa a panawen nga adda saan a mapantayan a panagdur-as, pannakalawlawag, ken pagimbagan. Kangrunaan iti amin, naparaburantayo iti kaadda ti pakabuklan ti ebanghelio ni Jesucristo, a mangted kadatayo iti naidumduma a pannirigan kadagiti pagpeggadan ti lubong ken mangipakita kadatayo no kasano a liklikantayo dagitoy a pagpeggadan wenno sanguentayo dagitoy.
No panunotek dagitoy a parabur, kayatko ti agparintumeng ket iruknoy ti panagdayaw iti Nailangitan nga Amatayo para iti saan nga aggibus nga ayatna para iti amin kadagiti annakna.
Diak mamati a kayat ti Dios nga agbalin a managbutbuteng dagiti annakna wenno makiramanda kadagiti kinadakes ti lubong. “Ta saannatay nga inikkan ti Dios ti espiritu ti kinatakrot; no di ti kinatibker, ken ti ayat ken ti naimbag a nakem.”10
Inikkannatayo iti adu a rason tapno agragsak. Nasken laeng a sapulen ken bigbigentayo dagitoy. Masansan nga ipalagip kadatayo ti Dios a “dikay agbuteng,” ken “agragsakkayo,”11 ken “dikay agbuteng, bassit nga arban.”12
Makirangetto ti Apo kadagiti Dangadangtayo
Kakabsat, datayo dagiti “bassit nga arban” ti Apo. Datayo dagiti Santo iti ud-udina nga aldaw. Naikasigudan iti nagantayo ti panagkumittayo nga agur-uray iti panagsubli ti Mangisalakan ket isaganatayo ti bagbagitayo ken ti lubong iti panangawat Kenkuana. Ngarud, agserbitayo koma iti Dios ket ayatentayo dagiti padatayo a tao. Aramidentayo koma daytoy nga addaan gagangay a panagtalek, addaan pakumbaba, a saan nga uy-uyawen iti kaano man ti ania man a sabali a relihion wenno grupo dagiti tattao. Kakabsat, nabilintayo nga agadal iti balikas ti Dios ken dumngeg iti timek ti Espiritu,tapno mabalintayo a “maammuan dagiti tanda ti panawen, ken dagiti tanda ti yaay ti Anak ti Tao.”13
Ngarud, saantayo nga ignorante kadagiti pannubok ti lubong, wenno ditayo ammo dagiti rigat ti panawentayo. Ngem saan a kayat a sawen daytoy a nasken parigatentayo ti bagbagitayo wenno ti dadduma iti kanayon a panagbuteng. Imbes a panangitalimudoktayo iti kaadu dagiti karittayo, saan kadi a nasaysayaat nga italimudoktayo ti maipapan ti awan inggana a kinaindaklan, kinasayaat, ken naan-anay a bileg ti Dios, nga agtaltalek Kenkuana ken agsagsagana nga addaan naragsak a puso para iti isusubli ni Jesus a Cristo?
Kas natulagan a tattaona, nasken a saantayo nga agbuteng gapu kadagiti dakes a banag a mabalin a mapasamak. Ketdi, makapagaddangtayo nga addaan pammati, tured, determinasion, ken panagtalek iti Dios iti panangsangotayo kadagiti karit ken gundaway nga agur-uray.14
Saantayo a magna iti dalan ti kinadisipulo nga agmaymaysa. “Ti Apo a Diosmo … makikuyog kenka; dinto agkurang kenka, wenno di met mangliway kenka.”15
“Ti Apo makibakalto gapu kadakayo, ket dakayo agtaengkayo a sitatalna.”16
Iti imatang ti buteng, makitatayo koma ti tured, papigsaentayo ti pammatitayo, ken addaan panagtalek iti kari nga “awan ti igam a naaramid a maibusor kenka ti rumang-ayto.”17
Agbibiagtayo kadi iti panawen ti peggad ken didigra? Siempre agbibiagtayo.
Kinuna ti Dios Mismo, “Ditoy lubong addanto rigatyo: ngem mananginanamakayo; siak pinarmekko ti lubong.”18
Maaramattayo kadi ti pammati tapno mamati ken agtignay a siaannurot? Matungpaltayo kadi dagiti panagkumit ken sagrado a katulagantayo? Kabaelantayo kadi a tungpalen dagiti bilin ti Dios uray kadagiti mapannubok a paspasamak? Siempre kabaelantayo!
Kabaelantayo gapu ta inkari ti Dios, “Agkaykaysanto ti amin a banag para iti pagimbaganyo, no magnakayo a sililinteg.”19 Ngarud, iwaksitayo koma dagiti butengtayo ket agbiagtayo ketdi nga addaan iti rag-o, pakumbaba, namnama, ken natured a panagtalek nga adda kadatayo ti Apo.
Ti Naan-anay nga Ayat ti Mangpaksiat iti Butengtayo
Patpatgek a gagayyemko, ay-ayatek a kakabsatko ken Cristo, no matakuatantayo ti bagbagitayo nga agbibiag iti buteng wenno danag, wenno no matakuatantayo a dagiti bukodtayo a balikas, galad, wenno tignay ti makaigapu iti panagbuteng dagiti dadduma, ikararagko iti amin a pigsa ti kararuak tapno mawayawayaantayo manipud iti daytoy a buteng babaen ti nadiosan a naituding a pangsuppiat iti buteng: ti natarnaw nga ayat ni Cristo, gapu ta “ti naan-anay nga ayat ti mangpaksiat iti buteng.”20
Ti naan-anay nga ayat ni Cristo ket mangparmek kadagiti sulisog iti panagdangran, panagpilit, pammutbuteng, wenno panangirurumen.
Ti naan-anay nga ayat ti Cristo ket mangpalugod kadatayo a magna nga addaan pakumbaba, dignidad, ken natured a panagtalek kas pasurot ti patpatgentayo a Mangisalakan. Ti naan-anay nga ayat ni Cristo ket mangted kadatayo iti panagtalek bayat ti panagtultuloytayo nga agtignay iti baet dagiti butengtayo ket agtalektayo a naan-anay iti bileg ken kinaimbag ti Nailangitan nga Amatayo ken ti Anakna, ni Jesucristo.
Kadagiti pagtaengantayo, kadagiti lugar ti negosiotayo, kadagiti awagtayo iti Simbaan, kadagiti puspusotayo, sukatantayo koma ti buteng iti naan-anay nga ayat ni Cristo. Ti ayat ni Cristo ti mangsukatto iti buteng nga addaan pammati!
Ti ayatna ti mangted kabaelan kadatayo a mangilasin, agtalek, ken maaddaan iti pammati iti kinaimbag ti Nailangitan nga Amatayo, iti nadiosan a planona, iti ebangheliona, ken kadagiti bilinna.21 Ti panagayat iti Dios ken iti padatayo a tattao ket mamagbalinto ti panagtungpaltayo kadagiti bilin ti Dios a maysa a parabur imbes a maysa a dagensen. Tulongannatayto ti ayat ni Cristo nga agbalin a nasaysayaat bassit, ad-adda a managpakawan, nadungdungngo, napaspasnek iti aramidna.
No punnuentayo ti puspusotayo iti ayat ni Cristo, mariingtayonto nga addaan iti napabaro a naespirituan a kinasadiwa ket magnatayo a sirarag-o, sitatalek, siririing, ken sibibiag iti silaw ken dayag ti patpatgentayo a Mangisalakan, ni Jesucristo.
Paneknekak, kaduak ni Apostol Juan, “Awan buteng iti ayat ni Cristo.”22 Kakabsat, patpatgek a gagayyem, ammonakayo unay ti Dios. Ay-ayatennakayo unay. Ammona no ania ti agur-uray a masakbayanyo. Kayatna a “dikay agbuteng, mamati laeng”23 ken “agtalinaed iti [naan-anay nga] ayatna.”24 Daytoy ti kararag ken pammendisionko iti nagan ni Jesucristo, amen.
© 2017 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/16 Pannakaanamongna a maipatarus: 6/16. Pannakaipatarus ti First Presidency Message, May 2017. Ilokano. 97925 864