Naan in Katak an Kōrā, Māe 2017
Kajoor eo an Bok in Mormon eo
Ij kajjitōk ippān aolep bwe jen lukkuun ekkatak im kejōkļo̧kjeņ kōn Bok in Mormon eo kajjojo raan.
Ro jeiū im jatū, ij lewaj aō iakwe eo emāņāāņtata n̄an kom̧ ilo ad bar kobatok ippān doon ilo kweilo̧k in eļap an Kabun̄ eo an Jisōs Kraist im Armej ro Rekwojarjar ilo Raan-ko Āliktata. Mokta jān aō jino ennaan in aō rainin, ikōņaan kōjjeļļā kōn tampeļ ko ļalem renaaj ekkaļ ilo jikin kein rej ellaajrak: Brasilia, Brazil; greater Manila, Philippines, jikin; Nairobi, Kenya; Pocatello, Idaho, USA; im Saratoga Spring, Utah, USA.
Jibbon̄ in ij kōnono kōn kajoor eo an Bok in Mormon eo im aikuj ko reļļap ippād āinwōt membōr ro an Kabun̄ in n̄an katak, kejōkļo̧kjeņ, im mour kōn katak ko an ilo mour ko ad. Aorōk eo bwe en wōr juon ad naan in kam̧ool epen im em̧ool kōn Bok in Mormon eo.
Jej mour ilo juon tōre eļap jorrāān im nana ie. Ta eo enaaj kōjparok kōj jān jerawiwi im nana rej waļo̧k ilo laļ in rainin? Ij dāpij wōt juon naan in kam̧ool kōn ad Rilo̧mo̧o̧r, Jisōs Kraist, im kōn gospel eo An enaaj jipan̄ kōj kōn kōjparok. N̄e kwōj jab riiti Bok in Mormon eo kajjojo raan, jouj im riiti. N̄e kwōj tiljek ilo am̧ riiti im kōn juon ikdeelel em̧ool n̄an jeļā bwe em̧ool, Jetōb Kwojarjar eo enaaj kwaļo̧k m̧ool eo n̄an eok. Eļan̄n̄e em̧ool—im ij kam̧ool bwe em̧ool—innām Josep Smith ekar juon rikanaan eo ekar lo Anij Jemān im Nejin, Jisōs Kraist.
Kōnke Bok in Mormon eo ej m̧ool, Kabun̄ eo an Jisōs Kraist im Armej ro Rekwojarjar ilo Raan-ko Āliktata ej Kabun̄ eo an Irooj ioon laļ in, im priesthood eo ekwojarjar an Anij em̧ōj an jepļaaktok n̄an em̧m̧an im jeraam̧m̧an eo an ajri ro Nejin.
N̄e ejjeļo̧k juon am̧ naan in kam̧ool epen kōn men kein, kōm̧m̧ane men eo emennin aikuj n̄an bōk juon. Eaorōk n̄an kwe bwen wōr juon am̧ make naan in kam̧ool ilo iien kein reppen, bwe naan in Kam̧ool an ro jet renaaj ļōn̄aj eok ium̧win jidik wōt iien. Ijoke, n̄e em̧ōj am̧ bōke, naan in kam̧ool eo ej aikuj dim im kajoorļo̧k itok jān pokake kien ko an Anij im jān jar aolep iien im ekkatak jān jeje ko Rekwojarjar.
Rijerbal ro m̧ōtta ilo jerbal in an Irooj, ij kajjitōk ippādwōj kajjojo bwe jen lukkuun ekkatak im kejōkļo̧kjeņ kōn Bok in Mormon kajjojo raan. Ilo ad kōm̧m̧an āindein, jenaaj likūt kōj ilo juon wāween jemaron̄ ron̄ ainikien Jetōb eo, n̄an jum̧ae kapo, n̄an anjo jān pere im mijak, im n̄an bōk jipan̄ an lan̄ ilo mour ko ad. Kōn menin ij kam̧ool kōn aolepān būruwō ilo etan Jisōs Kraist, amen.
© 2017 jān Intellectual Reserve, Inc. Aolep jim̧we ko rej pād ippan. Jeje ilo USA. Kōmālim ilo Kajin English: 6/16. Kōmālim an ukook: 6/16. Ukook eo an Visiting Teaching Message, Māe 2017. Marshallese 97925 874