Yut
Wan Misinari we i nogat nemtag
Long skul mi gat wan tija we i gat wan kaen fasin we i save mekem man i fraet blong serem tingting blong hem wetem hem agensem wan topik. Wan dei mifala i go long topik abaot ol Lata-dei Sent misinari. Mi save se mi save ansarem ol kwestin blong hem, be mi filim se mi no mas mekem. Hemia i mekem se mi talem smol nomo inaf blong hem i save fastaem.
Ol wik oli pas be mi no save stop blong tingting abaot storian blong mifala. Long en, wan tingting i kam long mi se mi sud givim hem wan Buk blong Momon wetem sam sot ves we mi haelaetem abaot misinari wok. Tingting i mekem mi fraet, be i stap pusum mi blong mekem. Mi save se hem i wan rimaenda long mi blong mi mas folem.
Samples tu manis afta, mi rere wetem Buk blong Momon. Tru aot long dei mi filim olsem we buk ia i stap bonem wan hol long skul bag blong mi. Long sotfala taem we i tekem mi blong givim buk ia long hem bifo mi lego skul blong go long holidei i wan taem long laef blong mi we mi bin fraet tumas.
Long fas dei we mi go bak long skul, mi pasem klasrum blong hem be mi fraet blong go insaed. Afta mi harem hem i singaot mi, mo givim mi wan kad. Mi ridim long aotsaed long veranda. Hem i raetem se hem i stadi “plante” long olgeta ves ia we mi makem, mo hem i stat blong luk sam risen biaen long fet blong mi.
Mi glad blong serem gospel naoia, mo mi mi glad moa blong givim seves long Papa long Heven blong go long wan misin samtaem.