Fas Presidensi Mesej, Jun 2017
Oli Singaot long Wok ia
Taem Profet Josef Smit i bin singaotem Elda Heber C. Kimball (1801—68) blong “openem doa blong fasin blong sevem man” olsem wan misinari long Inglan, Elda Kimbol hem i bin gat ol filing se hem i no save mekem wok ia.
“O, Lod,” hem i bin raetem, “Mi mi wan man blong mes mestem toktok, mo hemia i mekem mi no fit blong mekem wok ia.”
Elda Kimbol i akseptem koling nomata long hemia, hem i talem: “Lukluk long wok ia i no karemaot mi nating long wok we mi stap mekem; long taem we mi andastanem tingting blong Papa blong mi long Heven, mi filim wan strong tingting blong go tru long evri denja blong wok, bilivim se bae Hem i sapotem mi tru long Paoa blong Hem, mo fulumap mi wetem evri kwalifikesen we mi nidim.”1
Ol yang brata mo sista blong mi we yu bin kasem koling blong givim seves olsem wan fultaem misinari, oli bin singaotem yu from yu, olsem Elda Kimbol, “yu wantem tumas blong givim seves long God” (D&C 4:3) mo from yu rere mo klin inaf.
Ol kapol misinari, yufala i bin kasem koling long wok ia from ol semak risen. Be, yufala i no kam wetem tingting ia nomo blong wantem givim seves be tu waes tingting we yufala i kasem long ol taem blong sakrifaes, lav mo eksperiens we Papa long Heven i save yusum blong tajem ol hat blong ol pikinini boe mo gel blong Hem we oli stap lukaotem trutok. I nogat tu tingting se yufala i bin lanem se yumi no save lavem Lod wetem wan tru hat kasem taem yumi mekem wok blong Hem, taem yumi givim seves long ol narawan.
Wetem hat ia blong givim seves olsem ol misinari, bae yu ademap fet mo strong paoa blong go tru harem nogud, strong paoa long tingting mo tras, faenem ansa mo fesem hadtaem tru gud fasin, strong tingting mo dedikesen. Ol misinari we oli dediketem olgeta oli save mekem ol merikel long misin fil.
Presiden Jon Taylor (1808–87) i putum tugeta ol impotem fasin blong ol misinari olsem: “Ol kaen man [mo woman mo ol kapol] we yumi wantem blong oli serem mesej blong gospel ia i go ol man we oli gat fet long God; oli olgeta we oli gat fet long relijin blong olgeta; oli onarem prishud blong olgeta; oli ol man we … God i trastem. … Yumi wantem ol man we oli fulap long Tabu Spirit mo paoa blong God[,] … ol man blong ona, onesti, stret mo klin fasin.”2
Lod i talemaot se:
“From luk, garen i waet, i rere blong oli tekemaot kaekae; mo luk gud, man we i sakem huknaef blong hem wetem strongfala paoa, hem i stap putum gud kaekae i stap blong mekem se bae hem i no save ded, be bae hem i tekem fasin blong sevem man i kam long sol blong hem;
Mo fet, hop, mo bigfala hat mo lav, wetem wan ae we i lukluk nomo long glori blong God, bae i mekem hem i naf long wok ia. (D&C 4:4–5)
Koling blong yu i kam tru long insperesen. Mi testifae se man we God hem i kolem, God hem i kwalifaem. Yu bae kasem help blong heven taem yu gohed blong wok wetem prea long garen ia blong Lod.
Naesfala promes we Lod i bin givim long ol misinari long stat blong dispensesen ia, olsem we i stap insaed long Doktrin mo ol Kavenan, bae i blong yu: “Mi bae mi go fastaem long yu. Lod bambae i stap long raet han mo long lef, mo Spirit blong Hem bambae i stap long ol hat blong yu mo ol enjel blong Hem bae oli stap raon long yu, blong leftemap yu (luk long D&C 84:88)
Taem yu givim seves, bae yu bildimap ol rij memori we i no save finis mo ol frensip. Mi no save long wan garen we i givim plante frut blong fasin blong glad bitim long misin fil.
Naoia, wan toktok long olgeta elda, ol sista, mo ol kapol we, blong sam risen, oli no save finisim taem blong olgeta long misin fil long stret taem we oli sud finis: Lod i lavem yufala. Hem i luk save sakrifaes blong yu Hem i save long ol harem nogud blong yu. Save hemia se Hem i gat wan wok blong yu i stap yet blong yu mekem. No letem Setan i talem narafala samting long yu. No putum tingting blong yu i go daon, no slakem tingting, no wari.
Olsem we mi bin talem long jeneral konfrens i no longtaem afta we oli bin kolem mi blong lidim Jos: “No fraet. Leftemap Hed mo Stap Glad Fiuja blong yu i saen semak long fet blong yu.”3 Promes ia i tru yet blong yu. From hemia, yu no lusum fet, from Lod i no lusum fet long yu. Kipim ol kavenan blong yu mo muv igo fored.
Wol ia i nidim gospel blong Jisas Kraes. Bae Lod i blesem evri Sent blong Hem—nomata wea ples yumi givim seves—wetem wan hat blong wan misinari.
© 2017 i kam long Intellectual Reserve, Inc. Oli holem evri raet. Oli printim long USA. Oli letem long Inglis lanwis: 6/16 Oli letem translesen: 6/16 Translesen blong First Presidency Message, June 2017. Bislama. 97926 852