Lamharon
Misyonero nga wala sing Tarhita
Sa eskwelahan, may yara ako sang isa ka manunudlo nga may personalidad nga makapahadlok sa isa ka tawo nga magpaambit sang nagakontra nga mga panan-aw parte sa isa ka topiko. Isa ka adlaw, nakalab-ot kami sa topiko parte sa mga misyonero nga mga Santos sa Ulihing mga Adlaw. Nahibaloan ko nga mahimo ko kontani sabton ang iya mga pamangkot, apang nabatyagan ko nga indi ko dapat himuon. Gani, naghambal ako sang husto lang para makuntento gid lang sia anay.
Sa masunod nga pila ka semana, indi ako maributay parte sa amon paghambalanay. Sa katapusan, isa ka pamensaron ang nag-abot sa akon nga tagaan ko sia sang Libro ni Mormon nga may pila ka ginmarkahan nga mga tinaga parte sa pangmisyonaryo nga buluhaton. Ang pamensaron nagpahadlok sa akon, apang nagsige-sige ini. Nahibaloan ko nga isa ato ka pagpabatyag nga dapat nakon sundon.
Pagkatapos sang mga duha ka bulan, nahanda ko na ang Libro ni Mormon. Bilog nga adlaw ko nabatyagan ang pagtulod nga kuha-on ang libro sa akon backpack kag ihatag ini. Ang tatlo ka segundo sang pagduhol ko sadto sa iya sang magpauli ako para sa bakasyon sa tigtulugnaw amo ang pinakamahaladlukan nga tion sang akon kabuhi.
Sa una nga adlaw sang akon pagbalik, naglabay ako sa iya hulot-klasehan apang nahadlok ako magsulod. Nian akon nabatian nga ginatawag niya ako kag ginhatagan ako sang kard. Ginbasa ko ini sa alagyan. Ginsulat niya nga iya gintun-an “sing maayo” ang pila ka mga dinalan nga akon ginmarkahan, kag nasugdan na niya nga makita ang pila ka mga rason sa likod sang akon ginatuohan.
Nakunyag na ako nga magpaambit sang ebanghelyo karon, kag mas nakunyag pa gid nga mag-alagad sa akon Langitnon nga Amay sa misyon sa nagahilapit nga tion.