Mensahe sang Unang Panguluhan, Hunyo 2017

Gintawag sa Buluhaton

Ni Pangulong Thomas S. Monson

Sang gintawag ni propetang Joseph Smith si Heber C. Kimball (1801–68) nga “buksan ang ganhaan sang kaluwasan” bilang isa ka misyonaryo sa England, si Elder Kimball nagbatyag sang pagkaalang-alang.

“O, Ginuo,” sia nagsulat, “Isa ako ka tawo nga pitla, kag lubos nga indi bagay para sa buluhaton.”

Bisan pa, ginbaton ni Elder Kimball ang tawag sa pag-alagad, nga nagdugang sa pagsiling: “Ining mga pamensaron wala nagpugong sa akon sa dalan sang pag-alagad; sa tion nga akon nahangpan ang kagustuhan sang akon Amay nga Langitnon, akon nabatyagan ang determinasyon nga maglakat sa bisan ano pa man nga kabudlayan, nga nagapati nga Iya ako sakdagon paagi sa Iya dako nga gahum, kag pagahatagan ako sang tagsa ka kwalipikasyon nga akon kinahanglan.”¹

Bataon ko nga mga kauturan nga ginatawag para sa full-time nga pag-alagad sa misyon, gintawag kamo sa pagtrabaho tungod kamo, pareho kay Elder Kimball,“may mga handum sa pag-alagad sa Dios” (D&C 4:3) kag tungod nakahanda kag nagakabagay kamo.

Mga may edad nga mga mag-asawa, gintawag kamo sa amo man nga mga rason. Kamo, ugaling, nagadala indi lamang sang handum sa pag-alagad kundi subong man kaalam nga naangkon gikan sa kadugayon sang pag-sakripisyo, pagpalangga, kag inagihan nga sarang gamiton sang inyo Amay nga Langitnon sa pagtandog sang mga tagipusuon sang Iya mga anak nga lalaki kag babayi nga nagapangita sang kamatuoran. Wala’y duda nga natun-an ninyo nga indi gid naton tunay nga mapalangga ang Ginuo tubtob nga aton Sia maalagaran paagi sa pag-alagad sa iban.

Sa inyo mga handum sa pag-alagad bilang mga misyonero, idugang ninyo ang pagtuo kag kabakod sa pag-atubang sa mga pag-antos, kaisog kag kumpyansa sa kaugalingon, kapasidad sa pagsolbar sa mga problema kag, kapasidad sa pagbangon sa mga problema, determinasyon kag dedikasyon. Ang mga dedikado nga mga misyonero sarang makapahanabo sang mga milagro sa patag sang misyon.

Ginplastar sa malip-ot ni Pangulong John Taylor (1808–87) ang mga kinahanglanon nga mga kinaiya sang mga misyonero sa sini nga paagi: “Ang klase sang mga lalaki [kag mga babayi kag mga mag-asawa] nga luyag namon nga mangin tagdala sining mensahe sang ebanghelyo amo ang mga tawo nga may pagtuo sa Dios; mga tawo nga nagatuo sa ila relihiyon; mga lalaki nga nagatahod sang ila priesthood; mga tawo nga sa ila … ang Dios may kumpiyansa. … Luyag namon ang mga tawo nga puno sang Balaan nga Espiritu kag sang gahum sang Dios[,] … mga tawo nga may dungog, integridad, putli kag puraw.²

Ang Ginuo nagpahayag:

“Yari karon, ang uma gulang na, kag bulahan sia nga nagagulo sang iya garab sa iya ikasarang, amo man sa iya nga nagatigana para sa palaabuton agud indi sia madula, kundi magadala sang kaluwasan sa iya kalag.

“Kag ang pagtuo, paglaum, kaluoy kag gugma, nga ang mata nakasentro lamang sa himaya sang Dios, magapabagay sa iya para sa buluhaton (D&C 4:4–5).

Ang imo tawag nag-abot paagi sa inspirasyon. Nagasaksi ako nga kon sin-o ang gintawag sang Dios, Iya sia ginapabagay. Magabaton kamo sang diosnon nga bulig kon kamo mapinangamuyuon nga nagatrabaho sa ulubasan sang Ginuo.

Ang matahum nga promisa sang Ginuo sa mga misyonero sang temprano pa sining dispensasyon, nga nasulat sa Doctrine and Covenants, mangin inyo: “Magalakat ako sa inyo unahan. Mangin yara Ako sa inyo natuo nga kamot kag sa inyo nawala, kag ang akon Espiritu mangin yara sa inyo mga tagipusuon, kag ang akon mga anghel magapalibot sa inyo, sa pagtib-ong sa inyo” (DC 84:88).

Sa inyo pag-alagad, magapasad kamo sang wala’y katapusan nga mga handurawan kag pag-inabyanay. Wala ako sing nahibaloan nga kaumhan nga nagapatubas sang mas sobra pa kabugana nga ani sang kalipayan sangsa patag sang misyon.

Karon, isa ka tinaga para sadtong mga elder, mga sister kag mga mag-asawa nga wala makatapos sang ila nakatakay nga tion sa patag sang misyon: Ang Ginuo nagapalangga sa inyo. Ginakalipay Niya ang inyo pagsakripisyo. Nakahibalo Sia sang inyo mga kapaslawan. Hibaloa nga may yara Sia sa gihapon sang buluhaton nga ipahimo sa inyo. Indi pagtuguti si satanas nga hambalan ka sang lain. Indi magpaluya, indi madismaya; indi magdula sing pag-asa.

Subong sang akon nabatyagan sa pangkabilugan nga kumperensya pagkatapos gid lang nga gintawag ako nga magdumala sang Simbahan: “Indi magkahadlok. Magpakalig-on ka. Ang palaabuton subong kasanag sang imo pagtuo.”³ Ina nga promisa para man sa inyo. Gani indi pagdulaa ang inyo pagtuo, tungod ang Ginuo wala nagdula sang iya pagtuo sa inyo. Tipigi ang inyo mga kasugtanan kag magsulong.

Ang kalibutan nagakinahanglan sang ebanghelyo ni Jesucristo. Kabay nga ang Ginuo magbendisyon sang tanan Niya nga mga santos---wala sapayan kon diin man kita nagaalagad---nga may tagipusuon sing isa ka misyonero.

© 2017 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipnas. Petsa sang pagtugot sa Ingles: 6/16 Petsa sang pagtugot sa paglubad: 6/16. Paglubad sang First Presidency Message, June 2017. Hiligaynon. 97926 861

Pagtudlo gikan sa Sining Mensahe

Nagaalagad man kita bilang fulltime nga mga misyonero ukon wala, ang tagsa sa aton may yara sing oportunidad sa pagpaambit sang ebanghelyo kag mag-alagad sa ila nga yara sa aton palibot. Binagbinaga ang pagpares sining mensahe sa pamulongpulong sa pangkabilugan nga kumperensya sang sini lang parte sa sini nga topiko, pareho sang “Sharing the Restored Gospel” ni Elder Dallin H. Oaks sang Korum sang Napulo’g Duha ka mga Apostoles (Liahona, Nob. 2016, 57). Mahimo man ninyo hambalan ang pulong nga “kon sin-o ang ginatawag sang Dios, Iya ini ginapabagay” sa inyo ginatudloan. Paano nila nabatyagan ang Dios nga nagasakdag sa ila sa ila pangmisyonaryo nga buluhaton kag sa ila mga palangakoan sa simbahan? Mahimo ninyo agdahon ang inyo ginatudloan nga magpangamuyo para sa kusog kag inspirasyon agud mahibaloan kon paano magpaambit sang ebanghelyo sa ila panimalay, mga kaabyanan, kag mga kaingod.