Mensahe sa Visiting Teaching, Hunyo 2017

Gahum sang Priesthood paagi sa Pagtipig sang mga Kasugtanan

Tun-i sing mainampuon ining materyal kag magpangayo sang inspirasyon agud mahibaloan kon ano ang ipaambit. Paano bala ang paghangop sa katuyuan sang Relief Society nagahanda sa mga anak nga babayi sang Dios para sa mga bugay sang kabuhi nga wala’y katapusan?

“Ang akon mensahe sa … tanan amo nga sarang kita magkabuhi sa tagsa ka oras nga ‘nabendisyunan sa kusog sang gahum sang priesthood’, ano man ang aton sirkumstansya,” siling ni Elder Neil L. Andersen sang Korum sang Napulo’g Duha ka mga Apostoles.

“… Sa inyo takos nga pagpartisipar sa mga ordinansa sang priesthood, ang Ginuo magahatag sa inyo sang mas dako nga kusog, katawhay, kag wala’y dulunan nga panan-aw. Ano man ang inyo sitwasyon, ang inyo puluy-an ‘pagapakamaayuhon sang gahum sang priesthood’”.¹

Paano naton ginaagda ang gahum sang priesthood sa aton mga kabuhi? Si Elder M. Russell Ballard sang Napulo’g Duha ka mga Apostoles nagapahanumdom sa aton nga “sila nga nagpabunyag kag nagbaton sang ila endowment sa balay sang Ginuo nagakabagay nga magbaton sang bugana kag matahum nga mga bugay. Ang endowment matuod nga isa ka dulot sang gahum … [kag] ang aton Amay sa Langit maalwan sa Iya gahum.” Iya kita ginapahanumdum nga ang mga lalaki kag mga babayi “pareho nga gindulotan sang alangay nga gahum” sa templo, “nga ang buot silingon gahum sang priesthood.”²

Si Linda K. Burton, Pangkabilugan nga Pangulo sang Relief Society, nagsiling: “Tungod kay ang gahum sang priesthood isa ka butang nga aton tanan ginahandum nga maangkon sa aton mga pamilya kag mga puluy-an, ano ang aton dapat himuon agud agdahon ina nga gahum sa aton mga kabuhi? Ang kinaugalingon nga pagkamatarong importante sa pag-angkon sang gahum sang priesthood.”³

“Kon mapainubuson naton nga ipresentar ang aton mga kaugalingon sa atubang sang Ginuo kag pangabayon Sia nga tudloan kita, Iya ipakita sa aton kon paano madugangan ang aton pag-ambit sang Iya gahum,” siling ni Pangulong Russell M. Nelson, Pangulo sang Korum sang Napulo‘g Duha ka mga Apostoles.⁴

Dugang nga Balaan nga mga Kasulatan kag Impormasyon

1 Nefi 14:14; Doctrine and Covenants 121:36; 132:20; reliefsociety.lds.org

© 2017 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/16 Petsa sang pagtugot sa paglubad: 6/16. Paglubad sang Visiting Teaching Message, June 2017. Hiligaynon. 97926 861