Agtutubo
Misionario nga awanan iti Tag
Iti eskuela adda maestrok nga addaan iti galad a mabalin a mamagbuteng iti maysa a tao iti inna panangibinglay kadagiti maisupadi a pannirigan iti maysa a topiko. Maysa nga aldaw napagsasaritaanmi maipapan kadagiti misionario a Santo iti Ud-udina nga Aldaw. Ammok a nasungbatak koma dagiti saludsodna, ngem nariknak a nasken a diak sungbatan. Isu a nangibagaak laeng iti umdas a mangpennek kenkuana iti dayta laeng a kanito.
Kadagiti simmaruno a sumagmamano a lawas diak agsardeng a mangpampanunot maipapan iti saritaan mi. Kamaudiananna, dimteng iti panunotko a nasken nga ikkak isuna iti Libro ni Mormon nga adda dagiti binatog a naugedan a maipapan ti aramid ti misionario Nangpabuteng kaniak dayta a panunot, ngem nagtalinaed daytoy. Ammok a maysa daytoy a parikna a nasken a surotek.
Kalpasan ti dua a bulan, naisaganakon ti Libro ni Mormon. Agmalmalem a nariknak a kasla adda ur-uramen ti libro a maysa nga abut iti backpackko. Iti uneg ti tallo a segundo a panangyawatko iti daytoy kenkuana bayat ti ipapanawko iti bakasion iti panawen ti lamiis ket isu ti kabubutngan a kanito ti biagko.
Iti umuna nga aldaw iti panagsublik, nalabsak ti classroomna ngem nagbutengak a sumrek. Idi kuan nangngegko nga inawagannak, ket inikkannak iti maysa a kard. Binasak daytoy iti pasilio. Insuratna nga inadalna “iti kamaudiananna” dagiti binatog a minarkaak, ket nangrugi a nakitana dagiti sumagmamano a rason iti likudan ti pammatik.
Naragsakanak a mangibinglay itan ti ebanghelio, ken ad-addan a naragsakak nga agserbi iti Nailangitan nga Amak iti mision iti kabiitan a panawen.