Mensahe ti Umuna a Panguluen, Hunio 2017
Naawagan iti Aramid
Idi inawagan ni Propeta Joseph Smith ni Elder Heber C. Kimball (1801–68) tapno “manglukat iti ridaw ti pannakaisalakan” kas maysa a misionario iti England, nakarikna ni Elder Kimball iti kinakurang.
“O, Apo,” insuratna, “Maysaak a tao nga agbedda-beddal nga agsao ket saanak a maikari iti kasta a trabaho.”
Nupay kasta inawat ni Elder Kimbal ti awag, nga innayonna: “Dagitoy a kapanunotan ket saan a nanglapped kaniak iti panangsurotko iti dana ti pagrebbengak; iti kanito a naawatak ti pagayatan ti Nailangitan nga Amak, nariknak ti determinasion tapno mapanak iti baet ti amin a problema wenno pagrigatan, a mamati a tulongannakto babaen ti mannakabalin a bilegna, ket ipaayannak iti amin a pannakaikari a kasapulak.”1
Kakabsatko nga agtutubo a lallaki ken babbai a naawagan iti full-time missionary service, naawagankayo iti aramid gapu ta dakayo, kas ken ni Elder Kimball, “addaankayo iti tarigagay nga agserbi iti Dios” (DkK 4:3) ken gapu ta nakasagana ken maikarikayo.
Dakayo a senior couple, naawagankayo iti aramid iti kasta met la a rason. Nupay kasta, ikuyogyo saan laeng a ti tarigagay nga agserbi ngem ketdi ti pagsiriban pay a nagun-od kadagiti panawen ti sakripisio, ayat, ken padas a mabalin nga usaren ti Nailangitan nga Amayo tapno mangsagid iti puspuso dagiti annakna nga agsapsapul iti kinapudno. Awan duadua a nasursuroyon nga iti kaano man ditayo pudno a maayat ti Apo agingga a ditayo agserbi Kenkuana babaen ti panagserbi iti dadduma.
Kadagiti tarigagayyo nga agserbi kas misionario, nayonanyonto iti pammati ken kinatibker, kinatured ken panagtalek, keddeng ken panagannad, determinasion ken kinapasnek. Makaaramid dagiti napasnek a misionario kadagiti milagro iti tay-ak ti mision.
Ginupgop ni Presidente John Taylor (1808–87) dagiti napapateg a pakaikarian dagiti misionario iti kastoy: “Ti kita dagiti lallaki [ken babbai ken agassawa] a tarigagayanmi a kas mangitandudo iti daytoy a mensahe ti ebanghelio ket tattao nga addaan pammati iti Dios; tattao nga addaan pammati iti relihionda; tattao nga agdayaw iti priesthoodda; tattao a … pagtalkan ti Dios. … Tarigagayanmi dagiti tattao a napnuan iti Espiritu Santo ken iti bileg ti Dios … tattao nga addaan dayaw, integridad, saguday ken kinatarnaw.”2
Impakdaar ti Apo:
“Ta adtoy purawen ti kataltalonan a pagapitan; ket imutektekam, isu a mangipakan iti kumpayna iti amin a kabaelanna, isunto met laeng ti makaidulin tapno saanto a mapukaw, ngem mangidateng iti pannakaisalakan ti kararuana;
“Ket pammati, namnama, kaasi ken ayat, a naitalimudok ti imatangna iti gloria ti Dios, ti mangikari kenkuana iti aramid” (D&C 4:4–5).
Dimteng ti awagmo babaen ti inspirasion. Paneknekak nga asino man nga awagan ti Dios, aramiden ti Dios a maikari. Umawatkayonto iti nailangitan a tulong bayat ti nainkararagan a panagtrabahoyo iti bangkag ti Apo.
Ti napintas a kari nga inted ti Apo kadagiti misionario iti punganay daytoy a dispensasion, kas linaon ti Doktrina ken Katulagan, ket maitedto kadakayo: “Addaakto iti sangoyo. Addaakto iti makanawanyo ken iti makanigidyo, ket addanto ti Espirituk iti puspusoyo, ket likmutendakayonto dagiti anghelko, a mangtarabay kadakayo” (DkK 84:88).
Bayat ti panagserbiyo, mangbukelkayonto kadagiti agnanayon a lagip ken panaggagayyem. Awan ti ammok a tay-ak a mangparnuay iti nalablabon nga apit ti kinaragsak no di ti tay-ak ti mision.
Ita, ibagak kadagiti elder, sister, ken agassawa a misionario, nga iti ania man a rason, saan a makalpas iti naituding a panawenna iti tay-ak ti mision: Ay-ayatennakayo ti Apo. Bigbigenna ti pateg ti sakripisioyo. Ammona ti pannakapaayyo. Ammuenyo nga adda pay la trabaho a paaramidna kadakayo. Saanyo ipalubos a sabali ti ibaga ni Satanas kadakayo. Saankayo nga agliday, dikay maawanan iti namnama; saankayo a maupay.
Kas iti napaliiwko iti sapasap a komperensia kalpasan a naawaganak a mangidaulo iti Simbaan:“Saankayo nga agbuteng. Agragsakkayo. Naraniag ti masakbayan a kas iti pammatiyo.”3 Pumudno pay laeng dayta a kari para kadakayo. Isu a diyo koma pukawen ti pammatiyo, gapu ta saan a pinukaw ti Apo iti pammatina kadakayo. Agtungpalkayo kadagiti katulaganyo ket agtultuloykayo.
Kasapulan ti lubong ti ebanghelio ni Jesucristo. Bendisionan koma ti Apo ti amin a Santona—sadino man ti pagserbiantayo—nga addaan iti puso ti misionario.
© 2017 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/16 Pannakaanamongna a maipatarus: 6/16. Pannakaipatarus ti First Presidency Message, June 2017. Ilokano. 97926 864