Mensahe iti Visiting Teaching, Hunio 2017
Bileg ti Priesthood babaen ti Panagtungpal kadagiti Katulagan
Nainkararagan nga adalenyo daytoy a material ken kalikagumanyo ti inspirasion tapno ammuen no ania ti ibinglayyo. Kasano a ti pannakaawat iti panggep ti Relief Society ket mangisagana kadagiti annak a babbai ti Dios para kadagiti bendision ti agnanayon a biag?
Pammati, Pamilia, Tulong
“Ti mesahek iti … amin ket makapagbiagtayo iti tunggal oras ‘a nabendisionan iti pigsa ti bileg ti priesthood,’ ania man ti kasasaadtayo,” kinuna ni Elder Neil L. Andersen ti Korum dagiti Sangapulo-ket-dua nga Apostol.
“… Bayat ti sikakari a pannakiramanyo kadagiti ordinansa ti priesthood, ikkannakanto ti Apo iti dakdakkel a pigsa, talna, ken agnanayon a pannirigan. Ania man ti kasasaadyo, ti balayyo ket ‘mabendisionanto iti pigsa ti bileg ti priesthood.’”1
Kasano nga awisentayo ti bileg ti priesthood iti biagtayo? Ipalagip ni Elder M. Russell Ballard ti Korum dagiti Sangapulo-ket-dua nga Apostol a “dagiti simrek iti danum ti panagbuniag ket inawatda iti agangay ti endowmentda iti balay ti Apo ket maikarida kadagiti nawadwad ken nakaskasdaaw a bendision. Ti kayat a sawen ti endowment ket maysa a sagut a bileg … [ken] manangisagut ti Amatayo iti Langit iti bilegna.” Ipalagipna kadatayo a dagiti lallaki ken babbai “ket agpada a naikkan iti maymaysa a bileg” iti templo, “a kaipapananna ti bileg ti priesthood.”2
Kinuna ni Linda K. Burton, Sapasap a Presidente ti Relief Society: “Gapu ta ti bileg ti priesthood ket maysa a banag a tartarigagayantayo amin a mapaadda kadagiti pamilia ken pagtaengantayo, ania ti naskentayo nga aramiden tapno maawis dayta a bileg iti panagbiagtayo? Kasapulan ti personal a kinalinteg tapno maaddaan iti bileg ti priesthood.”3
“No sipapakumbaba nga idatagtayo dagiti bagbagitayo iti sango ti Apo ket kiddawentayo Kenkuana nga isuronatayo, ipakitananto kadatayo no kasano a palawaentayo ti ipapantayo iti bilegna,” kinuna ni Presidente Russell M. Nelson, Presidente ti Korum dagiti Sangapulo-ket-dua nga Apostol.4
Mainayon a Nasantuan a Kasuratan ken Impormasion
1 Nephi 14:14; Doktrina ken Katulagan 121:36; 132:20; reliefsociety.lds.org
© 2017 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/16 Pannakaanamongna a maipatarus: 6/16. Pannakaipatarus ti Visiting Teaching Message, June 2017. Ilokano. 97926 864