Parau Poro’i a te Peresidenira’a Mātāmua, Tiunu 2017
Pi’ihia i te ’ohipa
I tō te peropheta Iosepha Semita pi’ira’a ia Elder Heber C. Kimball (1801–68) ’ia « ’īriti i te ’ūputa nō te fa’aorara’a » ’ei misiōnare i Peretāne, ’ua tae mai te mana’o ia Elder Kimball ē, ’aita ’oia i au maita’i nō te pi’ira’a.
’Ua pāpa’i ’oia ē : « E te Atua, e ta’ata reo maumau vau, ’e ’aita e tano nō teie huru ’ohipa ».
’Ua fāri’i rā ’o Elder Kimball i te pi’ira’a ma te parau ē : « ’Aita teie mau ferurira’a i hahi ’ē iā’u i te ’ē’a nō te hōpoi’a ; i te taime ’ua ta’a iā’u te hina’aro o tō’u Metua i te Ao ra, ’ua tae mai te fa’aotira’a iā’u ’ia haere i te mau vāhi ato’a, ma te ti’aturi ē e turu mai ’oia iā’u ma tōna pūai hope, ’e e fāri’i au i te mau ’ite ato’a o tā’u e hina’aro ».1
E tō’u mau taea’e ’e mau tuahine ’āpī tei pi’ihia nō te tāvini ’ei misiōnare rave tāmau, ’ua pi’ihia ’outou i te ’ohipa nō te mea, mai ia Elder Kimball, « e hina’aro tō ’oe i te tāvini i te Atua » (PH&PF 4:3) ’e nō te mea ’ua ineine ’outou ’e ’ua ti’amā ho’i.
E te mau hoa fa’aipoipo pa’ari, ’ua pi’ihia ’outou i te ’ohipa nō teie ato’a mau tumu. Terā rā, e’ita ’outou e hōpoi noa mai i te hina’aro ’ia tāvini, ’o tō ’outou ato’a rā pa’ari i ’apohia mai i te roara’a o te mau tau fa’atūsiara’a ’e te arohara’a ’e te ’itera’a ’o tā tō ’outou Metua i te Ao ra e nehenehe e fa’a’ohipa nō te ha’aputapū i te ’ā’au o tāna mau tamaiti ’e mau tamāhine e ’imi nei i te parau mau. E’ita e ’ore ē, ’ua ha’api’i mai ’outou ē e’ita ’outou e nehenehe e here mau i te Fatu e tae roa i te taime e tāvini ’outou iāna nā roto i te tāvinira’a ia vetahi ’ē.
I tō ’outou hina’aro ’ia tāvini ’ei mau misiōnare, e ’āmui atu ’outou i te fa’aro’o ’e te pūai vārua, te itoito ’e te ti’aturi, te fa’aotira’a ’e te ’ōteo-fa’ahou-ra’a, te tapitapi ’ore ’e te hina’aro mau. E nehenehe te mau misiōnare hina’aro mau e ’āfa’i mai i te mau semeio i roto i te ’āua misiōni.
’Ua ha’apoto mai te peresideni John Taylor (1808–87) i te mau ’aravihi e hina’arohia nō te mau misiōnare, mai teie te huru : « Te huru ta’ata [’e te vahine ’e te mau hoa fa’aipoipo] tā tātou e hina’aro nei nō te ta’ita’i i teie ’evanelia, ’o te mau ta’ata ïa e fa’aro’o tō rātou i te Atua ; te mau ta’ata e fa’aro’o tō rātou i tā rātou ha’apa’ora’a ; te mau ta’ata e fa’atura… i tō rātou autahu’ara’a ; te mau ta’ata… ’o tā te Atua e ti’aturi… Tē hina’aro nei tātou i te mau ta’ata tei ’ī i te Vārua Maita’i ’e i te mana o te Atua… ’ei mau ta’ata hi’ora’a tura, te ha’avare ’ore, te vi’ivi’i ’ore ’e te ’ā’au mā ».2
’Ua parau te Fatu ē :
« Nō te mea inaha ’ua teatea te ’āua ’e ’ua ineine nō te tau ’auhune ; ’e inaha, ’o ’oia ’o te māo’a i te mauha’a ’ō’oti ma tōna pūai, ’o ’oia ïa ’o te ha’aputuputu mai ’ia ’ore ’oia ’ia mou, e noa’a rā te ora noa i tōna vārua ;
« ’E nā te fa’aro’o, te ti’aturi, te aroha ’e te here, ma te mata rōtahi i te hanahana o te Atua, e fa’aineine iāna nō te ’ohipa » (PH&PF 4:4–5).
’Ua tae mai tā ’outou pi’ira’a nā roto i te fa’aurura’a. Tē fa’a’ite pāpū nei au ē tā te Atua e pi’i, tā te Atua ïa e ha’amaita’i. E fāri’i ’outou i te tauturu o te ra’i ’a ’ohipa ai ’outou ma te pure i roto i te ’ō vine a te Fatu.
Te fafaura’a a’ia’i tā te Fatu i hōro’a i te mau misiōnare mātāmua i roto i teie tau tu’ura’a ’evanelia, mai tē vai ra i roto i te Parau Ha’api’ira’a ’e te mau Parau Fafau, nō ’outou ato’a ïa : « E haere au nā mua i tō ’outou mata. E vai ho’i au i tō ’outou pae ’atau ’e i tō ’outou pae ’aui, ’e ’ei roto ho’i tō’u Vārua i tō ’outou mau ’ā’au, ’e ta’u mau melahi ho’i e ’ati noa a’e ia ’outou na, ’ia ha’amara’a mai ia ’outou i ni’a » (PH&PF 84:88).
’A tāvini ai ’outou, e patu ’outou i te mau ha’amana’ora’a faufa’a mure ’ore ’e te fa’ahoara’a. ’Aita vau i ’ite i te hō’ē aua e fa’atupu i te hō’ē hotura’a rahi a’e nō te ’oa’oa i te aua misiōni.
I teienei, hō’ē parau i te mau misiōnare tāne, mau misiōnare vahine, ’e te mau hoa fa’aipoipo ē, nō te tahi noa atu tumu rau, ’aita rātou e fa’aoti i tā rātou tau i roto i te aua misiōni : ’Ua here te Fatu ia ’outou. ’Ua māuruuru ’oia i tā ’outou tusia. ’Ua ’ite ’oia i tō ’outou māuruuru ’ore. ’Ia ’ite mai ’outou ē e ’ohipa fa’ahou tāna nā ’outou. ’Eiaha e vaiiho ia Sātane e parau ’ē mai ia ’outou. ’Eiaha e fa’atopa ia ’outou ; ’eiaha e ha’aparuparu ; ’eiaha e tapineva.
Mai tā’u i parau i roto i te ’āmuira’a rahi i muri noa iho i tō’u pi’ira’ahia ’ia fa’atere i te ’Ēkālesia : « ’Eiaha e mata’u. ’A ’oa’oa. E mea ’ana’ana tō ananahi mai tō ’outou fa’aro’o ».3 E parau mau tāmau teie fafaura’a nō ’outou. ’Eiaha tō ’outou fa’aro’o ’ia mo’e, nō te mea tē vai noa ra tō te Fatu fa’aro’o ia ’outou. Ha’apa’o i tā ’outou mau fafaura’a ’e ’a haere i mua.
Tē hina’aro nei tō te ao i te ’evanelia a Iesu Mesia. ’Ia ha’amaita’i mai te Fatu i tōna feiā mo’a ato’a—noa atu te vāhi tā tātou e tāvini ra—ma te ’ā’au misiōnare.
© 2017 nā Intellectual Reserve, Inc. Fatura’a pāruruhia. Nene’ihia i Marite. Parau fa’ati’a nō te reo peretāne : 6/16. Parau fa’ati’a nō te ’īritira’a : 6/16. ’Īritira’a nō First Presidency Message, June 2017. Tahitian. 97926 895