Cov Hluas
Thaum Kuv tus Phooj Ywg Tas Sim Neej
Tus sau zaj no nyob hauv Utah, USA.
Thaum kuv kawm ntawv qib siab kawm qib kaum ib, kuv tus phooj ywg hlab ntshav tawg hauv nws lub hlwb thiab tso lub ntiaj teb no tseg ib hnub tom qab ntawd. Txawm yog kuv yog ib tug mej zeej ntawm lub Koom Txoos, kuv tseem nyuaj siab heev. Kuv twb kawm tas kuv lub neej hais tias kuv thov tau kuv Leej Txiv Saum Ntuj Ceeb Tsheej thiab tus Cawm Seej yog muaj teeb meem, tiam sis kuv yeej ib txwm tsis tau muaj kev nyuaj siab npaum li no.
Kuv quaj ntev loo, nrhiav ib yam dab tsi uas yuav pab kuv nyob kaj siab lug. Ib hmo tom qab nws xiam, kuv qhib phau nkauj qhuas Vajtswv. Thaum kuv saib cov ntawv, ua rau kuv pom zaj “Nyob Nrog Nraim Kuv; Twb Tsaus Ntuj Lawm” (Cov Nkauj Qhuas Vajtswv, zaj 70). Nqe peb tshoov kuv lub siab heev:
Nyob nrog nraim kuv; twb tsaus ntuj lawm,
Hmo no kho kuv lub siab
Yog tsis muaj koj nrog kuv txuas lus,
Tsis muaj koj ci ntsa iab.
Kev tsaus ntuj yuav nyob hauv kuv lub tsev
Thiab ua rau kuv ntshai kawg.
Cawm Seej, nyob nrog nraim kuv hmo no;
Saib seb, twb tsaus ntuj lawm.
Nqe no ua rau kuv nyob kaj siab lug. Thaum ntawd kuv paub tias tus Cawm Seej yuav nrog nraim kuv nyob hmo ntawd thiab Nws kuj paub tias kuv xav li cas hauv kuv lub siab tiag tiag. Kuv paub tias txoj kev hlub uas kuv hnov los ntawm zaj nkauj qhuas Vajtswv no tsis yog pab kuv hmo ntawd xwb tiam sis kuj pab kuv nyiaj tej kev sim siab ntxiv kom dhau.