Cov Mus Saib Xyuas Tom Tsev tsab Xov, Xya Hli Ntuj 2017
Xwv Kom Lawv Yuav Koom Siab
Ua tib zoo thov Vajtswv kawm tej yam no thiab nrhiav kev tshoov siab seb koj yuav tsum qhia dab tsi. Qhov uas Vajtswv cov ntxhais to taub lub hom phiaj ntawm lub Koom Haum Niam Tsev yuav npaj lawv li cas kom txais tau cov koob hmoov ntawm txoj sia nyob mus ib txhis?
Kev Ntseeg Tsev Neeg Kev Pab
Txwj Laug D. Todd Christofferson ntawm Pawg Kaum Ob tug Thwj Tim qhia hais tias, “Yexus koom siab koom ntsws nrog Leej Txiv vim Nws ywj Nws tus Kheej rau Nws Leej Txiv lub siab nyiam, tsis hais sab cev nqaij daim tawv thiab sab ntsuj plig los yog.
“… Nyaj peb yuav tsis koom siab nrog Vajtswv thiab Khetos mus txog thaum peb xav xav kom muaj raws li Nkawd lub siab nyiam. Kev txo hwj chim zoo li no ntshe yuav siv sij hawm ntev dua li ib hnub, tiam sis dhau los ntawm tus Vaj Ntsuj Plig Dawb Huv, tus Tswv yuav qhia peb yog tias peb kam, ces thaum txog lub sij hawm, yuav hais tseeb thaum yus hais tias Nws nyob hauv peb ib yam li Leej Txiv nyob hauv Nws.”1
Linda K. Burton, Koom Haum Niam Tsev tus Tuam Thawj Tswj Hwm, qhia peb paub ua hauj lwm li cas kom koom siab li no: “Kev ua raws li peb tej kev khi lus qhia tias peb mob siab xav ua neeg zoo li tus Cawm Seej. Qhov zoo tshaj yog kev siv zog ua raws li tau hais nyob hauv zaj nkauj qhuas Vajtswv no hais tias: “Kuv yuav mloog koj txoj lus. … Kuv yuav hais li kojxav kom kuv hais. … Kuv yuav ua li koj xav kom kuv ua.”2
Txwj Laug Christofferson kuj hais kom peb nco ntsoov tias “thaum peb siv zog ua raws li Yexus Khetos qhia txhua hnub thiab txhua lub lim tiam, peb tus ntsuj plig muaj zog tuaj thiab kov yeej, thiab kev ntxias tsis tsim txom ntxiv.”3
Neill F. Marriott, tus Pab Cuam thib Ob hauv Koom Haum Ntxhais Hluas Pawg Tuam Thawj Tswj Hwm, ua tim khawv txog cov koob hmoov los ntawm kev rau siab hloov peb lub siab nyiam kom zoo li Vajtswv lub siab nyiam: “Yeej nyuaj rau kuv muab kuv tej kev xav kom muaj raws li kuv lub siab nyiam pov tsheg, thiab kawm tias kuv txoj kev yeej tsis tsim nyog thiab tsis zoo npaum li Yexus Khetos txoj kev.” “[Peb Leej Txiv Saum Ntuj Ceeb Tsheej] txoj kev yeej yog txoj kev uas coj peb mus rau txoj kev zoo siab hauv lub neej no thiab rau txoj sia nyob mus ib txhis hauv lub ntuj tom ntej no.”4 Thov kom peb yuav siv zog txo hwj chim hloov peb lub siab kom koom siab nrog Leej Txiv Saum Ntuj Ceeb Tsheej thiab Nws Leej Tub, Yexus Khetos.
Vaj Lug Kub thiab tej Ntaub Ntawv Xov Xwm Ntxiv
Yauhas 17:20–21; Efexus 4:13; Lus Qhuab Qhia thiab Kev Khi Lus 38:27; reliefsociety.lds.org
© 2017 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub txhais ua lus Akiv : 6/17. Pub txhais ua lus Hmoob: 6/17. Kev txhais Visiting Teaching Message, July 2017. Hmong. 97927 295