President a Odzi Kan na n’Apamfo Amandzɛɛbɔ, Ayɛwoho 2017

Iritsim Yie Ekodu Ewiei ho Akatua

President Henry B. Eyring ne kasaa

Ɔpamfo a Odzi Kan wɔ President a Odzi Kan na n’Apamfo mu

Mber a nna meyɛ aberantsɛ no, mosoom dɛ ɔpamfo wɔ Asɔr no mu maa mansin president nyansafo bi. Ɔbɔɔ mbɔdzen dɛ daa daa ɔbɛkyerɛkyerɛ me. Mekaa afotu bi a mpɛn bi ɔdze maa me: “Sɛ ihyia obi a, hwɛ hɔn dɛ wɔwɔ ɔhaw dzendzen bi mu, na mber ne kɛsenara no, ɔbɛyɛ nokwar.” Ber no modwen ho dɛ ɔmmpɛ dza oye. Afei, mfe 50 na no mboree ekyir no, mutum hu mbrɛ ma osi tsee wiadze na abrabɔ ase yie no.

Nsɔhwɛ da hɛn nyina enyim—ɔtɔfabi a, nsɔhwɛ dzendzen papa. Yenyim dɛ Ewuradze ma hɛn kwan ma yedua nsɔhwɛ mu ama woeesiesie hɛn na yedzi mu ama yeetum yɛnye No atsena afebɔɔ.

Ewuradze kyerɛkyerɛɛ Nkɔnhyɛnyi Joseph Smith wɔ Liberty Efiadze dɛ ɔrosɔw no nsɔhwɛ yie no bɔboa no ma ɔafata onnyiewiei nkwa:

“Me ba, asomdwee nkã wo kra; w’akotorka na w’amandzehu na ɔnnkɛkyɛr;

“Na afei, sɛ esɔw no yie a, Nyankopɔn bɛma wo do wɔ sor; na ibedzi konyim wɔ w’atamfo nyina do” (N&A 121:7–8).

Ndzɛmba pii hyɛ hɛn do wɔ abrabɔ mu dɛ ɔyɛ dzen dɛ yebotum etsim yie ekodu ewiei. Obotum ayɛ dɛm dze ama ebusua bi a wɔdan hɔn nduadzewa ber a nsu anntɔ. Wɔbɔdwen ho dɛ, “Mber tsentsen bɛn na yebotum asɔw?” Obotum ayɛ dɛm dze ama ɔbabun a origyina etsĩa efĩfĩdze na nsɔhwɛ a wɔatahye a ohyia no. Obotum ayɛ dɛm dze ama aberantsɛ bi a ɔreper dɛ obenya nwomasũa anaa ntsetsee bi a ohia dze enya edwuma a ɔdze bɔhwɛ ne yer na ebusua no. Obotum ayɛ dɛm dze ama obi a onnyi edwuma anaa n’edwuma biara fi ne nsa ber ndwuma ndwuma so rugu no. Obotum ayɛ dɛm dze ama hɔn a hɔn apɔwmudzen na ahoɔdzen no do retsew, anaa hɔn a wɔdɔ hɔn no, a obotum aba ntsɛm wɔ abrabɔ mu anaa abrabɔ ekyir no.

Naaso Nyame dɔfo mmfa nsɔhwɛ a ɔtsetse dɛm nnsisi hɛn enyim ara dɛ Ɔrohwɛ dɛ sɛ yebotum asɔw ahokyer a, mbom Ɔrohwɛ sɛ yebotum asɔw no yie na yɛdze esiesie hɛn ho a.

President a Odzi kan na N’apamfo kyerɛkyerɛɛ Elder Parley P. Pratt (1807–57) ber a nna ɔafrɛ no dɛ Asomafo Duebien Quorumba fofor dɛ, “Edze woho abɛhyɛ edwuma a ohia wo mber nyina mu;…yɛ afowa a ɔayɛ ndam. … Otwar dɛ esɔw ɔhaw, edwumadzen, na nkodzen pii ma wo ndamyɛ no edzi mu. … Wo Sor Egya hia no dɛm; haban no yɛ Ne dze; edwuma no yɛ Ne dze; na Ɔbɛma … edzi dɛw … na Ɔama wo do.”¹

Hebrewfo nwoma mu no, Paul kã iritsim yie ekodu ewiei n’aba ho asɛm dɛ: “Na sesei dze ntsẽa nyina nnyɛ enyigye, na mbom awerɛhowdze a; na n’ekyir no ɔsow asomdwee aba dze ma hɔn a wɔdze asɔ hɔn ahwɛ no, mekyerɛ tsenenee aba” (Hebrewfo 12:11).

Hɛn nsɔhwɛ na nkodzen ma hɛn akwanya ma yesũa na yenyin, na obotum mpo asesa hɛn awosu ankasa. Sɛ yetum dan kɔ Agyenkwa no wɔ hɛn nkõdzen ber mu a, hɛn akra ho botum atsew yie ber a yɛsɔw no.

Dɛm ntsi, dza odzi kan nye yɛkaa dɛ yɛbɔbɔ mpaa daa (hwɛ N&A 10:5; Alma 34:19–29).

Dza otsĩa ebien nye dɛ yɛkɔdo per dɛ yebesie mbrasɛm no—dza ɔko tsĩa biara no, nsɔhwɛ biara no, anaa begyabegya a etwa hɛnho ehyia biara tse no(hwɛ Mosiah 4:30).

Dza otsĩa ebiasa a ohia tsitsir a yɛbɛyɛ nye yɛbɔsom Ewuradze (hwɛ N&A 4:2; 20:31).

Owura no som mu no, yɛba bohu No na yɛdɔ No. Sɛ yɛwɔwdo wɔ mpaabɔ na nokwar som mu a, yɛbɛhyɛase ehu Agyenkwa no Ne nsa na Sunsum Krɔnkrɔn no wɔ hɛn abrabɔ mu. Hɛn mu pii ama ɔsom a ɔtse dɛm mber bi na yɛatse dɛm anyɛnkoyɛ no. Sɛ edwen dɛm mber no ho kɔ ekyir a, ibɛkaa dɛ nna nsesa bi aba wo mu. Nsɔhwɛ dɛ ibɛyɛ bɔn no do huan. Wo pɛ dɛ ibɛyɛ papa no nyin. Hɔn a nna wonyim wo yie na wɔdɔ wo no bɛkã dɛ : “Enya ayamuyie na abotar mbordo. Ayɛ nyimpa fofor.”

Nntse dɛ mbrɛ itse no. Jesus Christ no Werdambɔ no do na ɔsesaa wo osiandɛ idaan No wɔ wo nsɔhwɛ ber mu.

Mobɔ wo ahohoba dɛ Ewuradze bɛyɛ wo mboa wo wɔ nsɔhwɛ ber mu sɛ ihwehwɛ na isom No a, na wo kra ho betsew ber no mu. Moto wo tafɛrbanyinmbɔmu dɛ fa wo werɛ hyɛ No mu wɔ w’abɛbrɛsɛ nyina mu.

Minyim dɛ Nyankopɔn Egya no tse ase na Otsie na Obua mpaabɔ biara. Minyim dɛ Ne Ba, Jesus Christ, tuaa hɛn bɔn nyina ho kaw na Ɔpɛ dɛ yɛba No hɔ. Minyim dɛ Egya na Ɔba no weɔn hɛn na woesiesie kwan bi ama hɛn ma yetsim yie ekodu ewiei na yɛaba fie bio.