Mulwol ko Bin Somm’on e Presidency, July 2017
Fare Tawa’ath nima Yib ko Athamgil
Nap’an ni kugub pagal, ma kug pigpig u lane fare Galasia ni fare counselor ko district president. Gubin ngiyal’ e ma fil ngog ban’en. Kugu manang e thin ni yoeg ngog: “Nap’an ni gara peri’eg be’, mag pi’ ngorad ni woed ni bay e magawon rorad, ma oren e ngiyal’ e gur e fel’ rom.” Kug lamnag ni’ir be’ nib moning e thin rok’. Chiney, 50 e duw nga tomren, kug guy rogon ni ke nangfan rogon fare fayleng nge yafos.
Gadad gubin ma bay e magawon rodad—nib thilthil ngiyal’, ma rib gel. Gadad manang ni fare Somoel e ma pi’ e pi magawon ney ngodad ni nge fal’eg rogodad ni ngad suled ngak’ ngad pired Rok’ ni manemus.
Fare Somoel e fil ngak’ Profet Joseph Smith u lan fare Liberty Jail ni fare tawa’ath ko pi magagawon rok’ era thapeg fare yafos ni manemus ngak’:
Fakag, nge yib e gapas nga daken e ya’al rom; ma tomal nge pi lumel rom e ra par ni dab ki n’uw napan;
“Ma fa’an, ni garam athamgil nib gel, ma Got era chibiyem ngalang; ni rib yo’or yay” (D&C 121:7–8).
Bo’or ban’en nibe gafgow nagdad ko biney e yafos ma woed ni rib momaw’ rogon ni ngan athamgil. Woed rogon e chonggin e tabinaw nibe taga’ ko n’uw ni nge rran nag e wuldug rorad. Ma bay niyad be tafiney nag, “Uw numungin nap’an ni ngad soen gad?” Ku woed rogon reb e fal’yangren nibe gay rogon ni dabi rin’ e tin tagan ban’en nge lumel. Ma ku woed rogon be’ nibe magagawon ni nge thapeg fa rin’ e skul rok’ nib t’uf ko murwel rok’ ni ngayog ni nge ayuweg e ppin rok’ nge chonggin e tabinaw rok’. Ku woed rogon be’ ni dariyog e murwel ngak’ fa kan n’ag ko murwel rok’ ma dariyog ni nge piri’eg bang ni rayog ni nge murwel riy. Ku woed rogon be’ ni bay e m’ar rok fa dariy gelngin, ni rayog ni nge buch e chiney fa ta’aboch riy ko picha’ ni rib tu’uf rorad.
Machane fare Got nib t’uf rodad e dar ma pi’ e tiney ni nge guy dad ni ngad gafgow gad machane nge gelnag dad me pi’ gelngindad.
Fare Bin Somm’on e Presidency e fil ngak Elder Parley P. Pratt (1807–57) nap’an ni kan pining ni nge mang rebi chonggin fare Quorum ko fare Ragag nge La’agruw e Apostles: “Kam un nga ban’en nib t’uf urngin e tiyan’ rom ngay; … ni nge mon’og nigem. … Thingar mu athamgil, mag murwel nib gel, ma bo’or e tin nib t’uf rom ni rayog ngom. … Ya Chitmangdad ni bay u Tharmiy e ke yoeg ni ngan rin’; ya fare milay’ e Faen; ma fare murwel Rok’; ma ra … pi’ e athamgil ngom … me chibiyem ngalang.”1
U lan fare babyor ko Hebrews, Paul e weliy mornga’agen fal’ngin ni fa’an ni rani murwel nib gel: “Ma gadad finey e ngiyal’ i n’em nire n’em nike yib ngodad e ban’en ni nge kireban’dad ngay; e aram e k yaag pulwon ngorad, ni ke gapas lanin’rad ma ke yal’uw pangirad u mit Got” (Hebrews 12:11).
Pi magagawon rodad nge lumel e rayog ni nge ayuwegdad nge gel nagdad, ma ku rayog ni nge thiliyeg rogon kanawo’en dad. Ni fa’an gadad ra sap’ ngak’ fare Tathapeg, ma fare yafos rodad e ran mon’og nag.
Aragon, ya n’en ni rib ga’fan ni ngan tafniyan riy e gubin ngiyal’ ma nga un meybil (mu guy ko D&C 10:5; Alma 34:19–29).
Bin migid ni ngan rin’ e ngan gay rogon ni ngan tay fal’ngin fapi motochiyel, ni dariy fan ni ba momaw’ fa fapi lumel ni kunuygad—(mu guy Mosiah 4:30).
Ma bin dalip e n’en ni ngan rin’ e ngan pigpig ngak fare Somoel (mu guy ko D&C 4:2; 20:31).
U lane pi pigpig ney ngak fare Gaa’, gadad ra nang Ir me t’uf rodad. Gadad ra rin’, ni fa’an ni gadad ra meybil u fithik e mich nge pigpig, ma gadad ra guy pa’ fare Tathapeg nge fare Kan ni Thothup u lane yafos rodad. Bo’or i gadad nike pigpig ni ke n’uw nap’an e bay e biney e tawa’ath ko kan thothup rok’. Fa’an garam sap ko ngiyal’ nem, ma garam guy me yib ngan’um e tin nib thil rom. Ma fare lumel ni ngam rin’ e tagan e ra lich. Fa fare adag ni ngan rin’ e tin nib mangil e ra ga’i yaan. Ma picha’an ni yad ma nangem ma gab t’uf rorad e ra ga’ar: “Ke gel e guman’ nge gol rom. Ma kam thil ni ko rogom ni kafram.”
Kam thil. Kam thil u daken fare Biyul rok’ Yesus Kristus ni bachane kam taga’ Ngak’ ko ngiyal’ ni ke momaw’rogom ko lumel rom.
Gube micheg ni fare Somoel e ra yib nge ayuweg nem ko pi magagawon rom ni fa’an garam pigpig Ngak ni nge bi’ech nag gumircha’em ko biney e kamawo’. Gube yoeg ngom ni nge pagan’um Ngak’ ko gubin e pi magagawon rom.
Gum nang ni Got ni Chitmangdad e ba fos ma be motoyil ngodad ma fulweg taban e meybil rodad. Gum nang ni Fak, Yesus Kristus, e fulweg taban fare malfith ko denen rodad ma ba’adag dad ni ngad suled Ngak’. Gum nang ni Chitmangdad nge fare Fak e be matangiydad ma kar fal’egnew e kanawo’ ni fan dad ni ngayog ni ngad suled ngak biyay.
© 2017 rok Intellectual Reserve, Inc. All rights reserved. Kan yoloey u Mariken. Kan micheg nag ko thin nu Ngalis: 6/17. Micheg nag i pilyeg: 6/17. Pilyeg thin ko First Presidency Message, July 2017. Yapese. 97927 905