Lamharon

Kalipay bilang Disipulo ni Jesucristo

Nakaagi bala kamo nga naguba ang inyo adlaw? Ano ang inyo ginhimo agud mangin masadya? Si Pangulong Uchtdorf nakahibalo nga “ang tagsa sa aton may aton nga mga kasakit, aton mga kapaslawan, kag aton mga kalisud. Mahimo gani kita magbatyag sang katalaw kag kon kaisa pagkapierde.”

Ang iya solusyon amo ang magpangabuhi sang iya ginatawag nga “kabuhi sang isa ka disipulo”: “magpabilin nga tampad kag magpadayon sa pagsulong nga may pagtuo.” Kon magpadayon kita sa pagsulong nga may pagtuo, makasalig kita sa Dios, makatuman sang iya mga kasugoan, kag makaalagad sa iban—kag makabatyag sang kalipay mientras ginahimo ini tanan! Pareho sang siling ni Pangulong Uchtdorf, “Ang mga nagapangabuhi sang kabuhi sang isa ka disipulo … amo ina sila nga ang ila magagmay nga mga binuhatan sa masami nagahimo sing daku nga kinalain.”

Hunahunaa ang paglista sang mga pamaagi nga mapangabuhi mo ang kabuhi sang isa ka disipulo. Halimbawa, mahimo kamo maglista sang isa ka ideya sa pag-alagad pareho sang “Magbulig sa isa ka ginikanan sa paghanda sang panyapon” ukon isa ka ideya sa pagtuman sang mga kasugoan pareho sang “Pagpangamuyo para sa dugang nga pasensya sa akon mga utod.” Sa madason nga tion nga makabatyag ka sang pagkapaslaw ukon pagkapierde, kuhaa ang inyo listahan, magpili sang isa ka ideya kag himoa ini!