Mensahe sang Unang Pangulohan, Agosto 2017
Ang Kabuhi sang Isa ka Disipulo
Traynta anyos na ang nagligad sa Ghana, isa ka bataon nga estudyante sa kolehiyo nga ang ngalan si Doe nagsulod sa isa ka meetinghouse sang Simbahan sa una nga tion. Ginhagad si Doe sang isa ka abyan nga mag-upod sa iya, kag si Doe interesado nga mahibaloan kon daw ano ang Simbahan.
Manami gid kaayo kag mainabyanon ang mga tawo didto nga indi sia makapugong sa paghunahuna, “Ano nga klase sang simbahan ini?”
Nakabatyag si Doe sing daku nga pagdayaw nga nagdesisyon sia nga magtuon pa gid parte sa Simbahan kag sa mga tawo sini nga tuman kamalipayon. Apang pagsugod pa lang niya nga himuon ini, ang iya pamilya kag kaabyanan sa maayo nga tuyo, nagpamalabag sa tagsa niya ka tikang. Naghambal sila sang madamo nga malain nga mga butang parte sa Simbahan kag ginhimo nila ang tanan agud punggan sia.
Apang si Doe nakabaton sang panaksihon.
May pagtuo sia, kag ginhigugma niya ang ebanghelyo nga nagapuno sang iya kabuhi sang kalipay. Kag gani, nagpabunyag sia.
Pagkatapos, nagpaayaw sia sa pagtuon kag pagpangamuyo. Nagpuasa sia kag nagtinguha nga maangkon ang impluwensya sang Balaan nga Espiritu sa iya kabuhi. Bilang resulta, ang panaksihon ni Doe kag ang iya pagtuo nangin mas mabakod kag mas madalom. Sang ulihi, nagdesisyon sia nga magserbe sang isa ka full-time nga misyon para sa Ginuo.
Pagbalik niya halin sa misyon, nakig-date sia kag nagpakasal sa isa ka returned missionary—nga amo mismo ang nagbunyag sa iya mga pila ka tuig ang nagligad—kag sang ulihi ginhugpong sila sa Templo sa Johannesburg South Africa.
Madamo na karon nga tinuig ang nagligad humalin sang naeksperiyensyahan ni Doe Kaku ang kalipayan sang ebanghelyo ni Jesucristo. Sa sulod sina nga tinion, ang kabuhi indi tanan kalipayan para sa iya. Nagbatas sia sang iya bahin sang kalisod kag kasakit, lakip na ang pagkamatay sang duha ka mga anak—ang madalom nga kasubo sadtong mga eksperiyensya sa gihapon nagapabug-at sang iya tagipusuon.
Pero sia kag ang iya bana nga si Anthony nagpaninguha sa pagpalapit sa isa kag isa kag sa ila pinalangga nga Amay nga Langitnon nga ila ginahigugma sa ila bug-os nga tagipusuon.
Karon, 30 anyos pagkatapos sia nagpabunyag, si Sister Kaku sang sini lang nagtapos sang isa pa gid ka full-time nga misyon—sa sini nga tion kaupod ang iya bana, nga nangin mission president sa Nigeria.
Ang mga nakakilala kay Sister Kaku nagasiling nga may yara sang pinasahi sa iya. Nagasilak sia. Mabudlay nga indi ka mismo magbatyag sang dugang nga kalipay kon kaupod mo sia.
Ang iya panaksihon piho: “Nakahibalo ako nga ang Manluluwas nagatamod sa akon bilang Iya anak kag abyan (tan-awa sa Mosias 5:7; Eter 3:14),” siling niya. “Kag nagatuon ako kag nagahimakas sing todo nga mangin Iya man abyan—indi lamang sa akon ginapanghambal kundi man sa akon ginahimo.”
Iya Kita mga Disipulo
Ang istorya ni Sister Kaku pareho man sang iya sang madamo nga iban pa. Naghandum sia nga mahibaloan ang kamatuoran, ginbayaran niya ang bili agud maangkon ang espirituhanon nga kasanag, ginpakita niya ang iya paghigugma sa Dios kag iya isigkatawo, kag sa proseso nakaeksperiyensia sia sang mga kabudlayan kag kalisud.
Apang bisan ano pa ang mga sablag, bisan ano pa ang kalisud, nagpadayon sia sa pagsulong nga may pagtuo. Kag pareho lang ka importante, nagpadayon sia nga malipayon. Nakakita sia sang paagi indi lang agud mabatas ang mga kabudlayan sang kabuhi kundi man ang mag-uswag wala sapayan sang mga ini.
Ang iya istorya pareho sa inyo kag sa akon.
Talagsa lang nga mahapos ukon wala sang pagtilaw ang aton pagpanglakaton.
Ang tagsa sa aton may aton nga mga kasakit, aton mga kapaslawan, kag aton mga kalisud.
Mahimo gani kita magbatyag sang pagpanalaw kag kon kaisa pagkapierde.
Apang ang mga nagapangabuhi sang kabuhi sang isa ka disipulo—nga nagapabilin nga tampad kag nagapadayon sa pagsulong nga may pagtuo; nga nagasalig sa Dios kag nagatuman sang Iya mga kasuguan,1 nga nagapangabuhi sang ebanghelyo adlaw-adlaw kag oras-oras; nga nagahatag sang Cristohanon nga pag-alagad sa sinang yara sa ila mga palibot, isa ka maayo nga buhat sa tagsa ka tion—amo ina sila nga ang ila magagmay nga mga binuhatan sa masami nagahimo sang daku nga kinalain.
Inang mga mas maayo, mas mapinatawaron, kag mas maluluy-on amo ang mga maluluy-on nga makabaton sang kaluoy.2 Inang mga nagahimo sining kalibutan nga mas maayo nga lugar, isa ka maluluy-on kag mapinalanggaon nga buhat sa tagsa ka tion, kag nagatinguha nga ipangabuhi ang balaan, makalilipay kag mahidaeton nga kabuhi sang isa ka disipulo ni Jesucristo amo ina sila ang makasalapo sang kalipay sa ulihi.
Mahibaloan nila nga ang “gugma sang Dios, nga nagatugob sa mga tagipusuon sang mga anak sang tawo … ini ang labing tilinguhaon labaw sa tanan nga mga butang … kag ang labing makalilipay sa kalag.”3
© 2017 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/17. Petsa sang pagtugot sa paglubad: 6/17. Paglubad sang First Presidency Message, August 2017. Hiligaynon 97928 861