Mensahe sa Visiting Teaching, Agosto 2017
Pagkabuhi sang Nakonsagrar nga Kabuhi
Tun-i sing mainampuon ining materyal kag magpangamuyo agud mahibaloan kon ano ang ipaambit. Paano bala ang paghangop sang katuyuan sang Relief Society nagahanda sa mga anak nga babayi sang Dios para sa mga bugay sang kabuhi nga wala’y katapusan?
Pagtuo, Pamilya, Bulig
“Ang pagkonsagrar amo ang pagpain ukon pagdedikar sang isa ka butang bilang sagrado kag nahalad para sa balaan nga mga katuyuan,” siling ni Elder D. Todd Christofferson sang Korum sang Napulo‘g Duha ka mga Apostoles. “Ang matuod-tuod nga kadalag-an sa kabuhi mabaton sa pagkonsagrar sang aton mga kabuhi—nga amo ang aton panahon kag mga pagpili—sa mga katuyuan sang Dios.”1
Si Elder Neal A. Maxwell (1926–2004) sang Korum sang Napulo‘g Duha ka mga Apostoles nagsiling, “May huyog kita nga tamdon ang pagkonsagrar bilang ang paghalad lamang kon ginapangayo sang Dios, sang aton mga materyal nga pagkabutang. Pero ang pinakamataas nga pagkonsagrar amo ang paghalad sang kaugalingon sa Dios.”2
Sa aton pagkonsagrar sang aton mga kaugalingon sa mga katuyuan sang Dios, ang aton pagtuo kay Jesucristo kag sa Iya Pagpasag-uli magadugang. Sa aton pagpangabuhi sang kabuhi nga nakonsagrar, mapakabalaan kita paagi sa sinang mga hinimoan.
Si Carole M. Stephens, Unang Manuglaygay sa Pangulohan sang Relief Society nagsiling: “Si Elder Robert D. Hales nagpanudlo, ‘Kon nagahimo kita kag nagatuman sang mga kasugtanan, nagagwa kita sa kalibutan kag nagasulod sa ginharian sang Dios.’
“Ginabag-o kita. Nagaliwat ang aton dagway, kag nagaliwat ang aton pagginawi. Ang mga butang nga aton ginapamatian kag ginabasa kag ginahambal nagaliwat kag ang aton ginasuksok nagaliwat bangod mga anak na kita nga babayi sang Dios nga nahugpong sa Iya paagi sa kasugtanan.”3
Ang pagkonsagrar amo ang kasugtanan nga ginahimo sang Dios “upod sa panimalay sang Israel; sa tapos sadtong mga adlaw, nagasiling ang Ginuo: Ibutang ko ang akon kasugoan sa sulod nila, kag isulat ko ini sa ila tagipusuon; kag ako mangin ila Dios, kag sila mangin-akon katawhan” (Jeremias 31:33). Ang pagpangabuhi sang nakonsagrar nga kabuhi kabagay sa plano sang Dios para sa aton.
Dugang nga Balaan nga mga Kasulatan
1 Mga Taga-Tesalonica 1:3; tan-awa sa Doctrine and Covenants 105:5;
© 2017 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/17. Petsa sang pagtugot sa paglubad: 6/17. Paglubad sang Visiting Teaching Message, August 2017. Hiligaynon 97928 861