Agtutubo

Kaadda ti Rag-o iti Panagbalin a Maysa a Disipulo ni Jesucristo

Naaddaanka kadin iti naliday nga aldaw? Ania ti inaramidmo tapno agragsak? Ammo ni Presidente Uchtdorf nga “addaantayo kadagiti pakaburiboran, pannakapaay, ken panagleddaang. Mabalin a mariknatayo pay ti kinaawan namnama ken no dadduma makatalipupos.”

Ti pangrisut ket panangbiag iti awagna a “panagbiag ti maysa a disipulo”: “agtalinaed a napudno ken agtalinaed a dumur-as iti pammati.” No dumur-astayo iti pammati, kabaelantayo ti agtalek iti Dios, agtungpal kadagiti bilin, ken agserbi kadagiti dadduma—ken agrag-o kabayatan ti panangaramid iti amin daytoy! Kas iti kinuna ni Presidente Uchtdorf, “Dagiti agbiag a kas iti panangbiag ti maysa a disipulo … ket isuda dagiti addaan babassit nga aramid a masansan nga agbalin a dakkel a pagdumaan.”

Ibilangyo ti panagaramid iti listaan dagiti wagas a pakapagbiaganyo kas iti biag ti maysa a disipulo. Kas pagarigan, mabalinyo nga isurat ti maysa a kapanunotan maipapan ti serbisio kas iti “Tulongan ti maysa a nagannak a mangisagana iti pangrabii” wenno maysa a kapanunotan para iti panagtungpal kadagiti bilin kas iti “Panagkararag para iti ad-adu pay nga anus kadagiti kakabsatko.” Iti sumaruno a gundaway a mariknayo a napaay wenno natalipuposkayo, iruaryo ti listaanyo, mangala iti kapanunotan, ket padasenyo daytoy!